العربية حظرت تجوالي

[mghualy]

نظرا لظروف العمل فضلت العربية مركونة اكتر من ثلاث اسابيع و طبعا البطارية نامت تماما بالتالي السنتر لوك فصل و العربية مش بتستجيب للريموت.
المشكلة ان العربية (جين 2 موديل 2007) مركونة في الجراج و ناحية باب السائق ملاصقة للحائط و هو الباب الوحيد اللي فيه كالون.
و طبعا علشان اوصل للبطارية محتاج افتح الكبوت من داخل العربية, يا ترى في اي افكار تساعد في حل الموقف ده غير اني اكسر زجاج اي من الابواب.

[RIDER 2050]

اى حد بتاع ابواب او مفاتيح يفتحهالك من غير ما تكسر اى حاجة

[M I D O]

مفيش حل غير ان العربية تتقطر وتتسحب لحد ما يبقي في مساحة لفتح الباب

[saddam]

حط حبل قطر أو جنزير صغير من المقص شدها بشويش ناحية اليمين توسعلك شبرين تخش تفتح الباب و زمان كان عندي عربية بي إم 12 سلندر حجم 750 إل آي كان الكوالين بتاعتها كهرباء يعني فيها مكان مفتاح بس لو البطارية نايمة يخش المفتاح بس ميفتحش العربية ونظرا لتكرر الموضوع كذا مرة معاية رحت لكهربائي حبيبي وقلت له نزل لي تحت العربية بطريقة شيك سلك سالب وسلك موجب وكل متنام البطارية أجيب كبل وأوصله من أي بطارية للسلكين دول ثم أفتح الباب ولا كسر زجاج ولا كوالين ولا أذية وعيش اللحظة

[Trondo]

تجيب عيل صغير ميكنش تقيل و ينام على السقف و يمد ايده و انت تمسكه يفتح الطبله بالمفتاح
طبعا الباب مش لازق فى الحيطه يعنى فيه مكان يحط المفتاح

و بعدها يبقى فتح الباب .. المفروض سنتر باب السواق يفتح لوك العربيه كلها

مش عارف تنفع ولا ... بس انا بفكر معاك :))

[yousefsemsem]

شيل وشها انت واتنين وﻻ تلاته وهاتها شمال شويه لغايه لما تعرف تفتح الباب

[amr011111]

طبعا متكسرش الازاز
عيل رفيع وصغير يفتحهالك

او تشيل العربيه انت واتنين كمان

[bondok20002002]

ههههههه لا والله جامد الموقف ده حصل معايا مرة كنت راكن ف الجراج وعربيتين قفلوا عليا من الناحيتين احاول اجي يمين شمال مش عارف رحت فاتح الباب الي ورا اداني مساحة ودخلت نزلت فرامل اليد وزقتها بس انت اعتقد انك فعلا تشدها لبرة شوية وربنا يعينك والله العربيات دي بتحط الواحد ف موقف صعب قوي

[mghualy]

العربية اتفتحت

شكرا يا شباب على الافكار و التفاعل
الحمد لله فتحت العربية من باب السواق كان بيفتح حوالى 5 سم و نزلت سلكة من ناحية السقف فتحت بيها شداد الشنطة و منها فتحت باقى العربية.
(Saddam) فكرة سلك الكهرباء كويسة جدا ممكن طرف واحد للموجب بس على اعتبار ان باقي جسم العربية بيمثل الطرف السالب بس لازم تتعمل بطرقية تحمي العربية من حدوث قفلة في حالة التلامس بينها و بين جسم العربية

[amr011111]

شكرا يا شباب على الافكار و التفاعل
الحمد لله فتحت العربية من باب السواق كان بيفتح حوالى 5 سم و نزلت سلكة من ناحية السقف فتحت بيها شداد الشنطة و منها فتحت باقى العربية.
(saddam) فكرة سلك الكهرباء كويسة جدا ممكن طرف واحد للموجب بس على اعتبار ان باقي جسم العربية بيمثل الطرف السالب بس لازم تتعمل بطرقية تحمي العربية من حدوث قفلة في حالة التلامس بينها و بين جسم العربية

طيب ازاى زقيت ضهر الكنبه
اللى اعرفه ان ضهر الكنبه فيه فوق شدادين ترفعهم الاول من الباب الخلفى

[mghualy]

طيب ازاى زقيت ضهر الكنبه
اللى اعرفه ان ضهر الكنبه فيه فوق شدادين ترفعهم الاول من الباب الخلفى

عربيتي جين2 (لفت باك) مش محتاج تقلب الكنبة لو فتحت الشنطة يبقى انت جوه العربية خلاص