والله العظيم اللي بقوله ده حصل معايا في الزفت عز العرب

[hesham1978mmmm]

عز العرب ابو رواش ده اصلا مينفعش يتقال عليه توكيل لنهم اقل من كده بكتير وكمان كلمة ورشة كتير عليهم انا بقالي سنة باشتكي من رجة معينة في العربية مع المطبات والحفر قالوا ده عيب مساعد شمال عايز يتغير في الضمان بس هو مش موجود احجزه قولت ماشي وبعد 3 شهور روحت ركبته ومشيت لقيت العيب هو هو رجعتلهم تاني قالو ده عيب علبة دركسيون معقولة يا جماعة ده العربية لسه 10 الاف كيلو قالو عادي عيب صناعة المهم حجزتها وركبتها بعد شهرين والمفجأة نفس العيب والرجة موجودة روحت يوم تاني واشتكيت مع صيانة ال 15 الف قالو ده عيب مساعد ومقص يمين حجزتهم وروحت اركبهم شهر 6 اللي فات وبعدين قولت لازم اجرب المرة دي قبل ما امشي ولقينا نفس العيب والمهندسين قالوا المساعد اللي ركب يرجع تاني عشان المساعد بتاعك سليم بس فعلا المقص كان بايظ قولت ماشي طب يا جماعة العيب لسه موجود جابوا طقم مهندسين وصنايعية وعملوا كونصلتوا علي العربية والنتيجة برده عيب علبة دركسيون وهنحجزها وهتيجي كمان اسبوعين المهم صدقتهم وكل اسبوعين اكلمهم ينفضولي اشتكيت للعضو المنتدب اتصلوا بيا روحت يوم الأربعاء قبل الماضي عشان اركب العلبة وعلي الساعة 2 قالوا كله تمام قولت حد يطلع يجرب معايا والمفجأة لسه العيب موجود قالو مش ممكن عربيتك غريبة اول مرة تعدي علينا حاجة زي كده المهم راحوا غيروا مقص كمان وبعدين كاوتش ميزان برده نفس العيب المهم كانت الساعة وصلت 6 قالو سيب العربية رفضت عشان عندي مشاوير وقولت هجيبها يوم تاني بس انتوا عرفتوا العيب قالو اه ده الميزان عايز يتغير المهم روحت يوم الثلاثاء الماضي وطبعا حوار يوم الأربعاء المهندس امر اتدخل فيه ورجعوا علبة الدركسيون القديمة بتاعتي عشان طلعت سليمة المهم يوم الثلاثاء غيروا الميزان والمفجأة لسه الرجة موجودة طب يا جماعة ايه الحل احنا بنجرب المهم تقريبا فكوا العربية كلها من قدام ويغيروا حاجات ويروحوا يجربوا يلقوا نفس العيب والساعة دخلت علي 4.30 قالو حضرتك لازم تسيب العربية عشان تقريبا احنا جربنا كل حاجة ومش عارفين العيب بس هو غالبا بكرة هنغير القنطرة العرضية المهم سيبتها واتصلت تاني يوم قالوا تعالي روحت لقيت العيب اتصلح والرجة اختفت سألتهم ايه العيب قالوا والله طلعت حاجة بسيطة الكبالن كانت مش مربوطة كويس قرطنا عليها العيب اختفي طبعا انا كان هيجرالي حاجة من الغيظ بس مسكت نفسيي ده انتم تقريبا فكيتوا العفشة كلها وفي الخر يطلع عيب زي ده المهم جربت فعلا لقيت الرجة راحت روحت بس ما شاء الله تاني يوم لقيت العفشة كلها بدب وصوت تنفيس هواء مع لما ادوس بنزين جامد واكبس علي العربية طبعا الحاجات دي مكنتش موجودة خالص يعني العفشة كانت كويسة وعمري مسمعت صوت التنفيس ده المهم انا حلفت ما انا رايح عندهم تاني وزهقت من العربية بس والله العظيم يا جماعة ده اللي حصل معايا يعني انا باشتكي من عيب في العربية بقالي سنة رايح جاي عليهم واجازات من شغلي وفي الخر يطلع كوبلن عايز يتربط ايه رأي سيادتكم

[eng wael]

لا حول ولا قوة الا بالله
معلش نصيبك كده والحمدلله
انا شايف ان الناس متعاونين جدا يعنى كنت منتظر ان فى اخر الموضوع تسيب عربيتك وتاخد عربيه تانيه وتلاقى فيها نفس العيب هههههههه متزعلش انا بضحك معاك علشان حاسس بيك والله
المشكله انهم ماشاء الله عليهم لا يفقهو شئ فى الصيانه وده السبب الحقيقى فى المشكله
بس انت لازم ترجعلهم تانى وده حقك

[Eng_hatemfathy]

انا حاسس انك بتتكلم على الاسكى محروس والواد بلية
مش على عز العرب

[S O P H O S]

توكيل ايه ده
مش عاوز يتقدم اابدا

[Dr.Karim Emam]

الله يكون في عونك يا باشا
بس أنا شايف ان بما انك استحملت كل العك ده معاهم يبقى بجملة تربيط العفشة عشان ماتفضلش تدبدب معاك و إن شاء الله تكون بسيطة المرة دي

[abdo7000]

قدر الله ما شاء فعل معلش هو دة حال التوكيل في مصر

[Silent~Dream]

ربنا يكون فى عونك و بصراحه لا تعليق على اداء التوكيل

[A.Adel]

والله أنا شايف من كلامك الناس بتحاول وكل الحاجة بتغيرلك في الضمان

ساعات كده بيبقى فيه مشاكل معقربة وحلها عبيط بس مايجيش على بال حد
أنا مقدر زعلك على البهدلة دي
ومعاك كل الحق


بس إنت تزعل أكتر لو التوكيل قال لك إنه عمل حاجة و طلع كذب
أو قصر معاك في الضمان أو تعاملهم وحش

انما كل التوكيلات في مصر بلا استثناء , أي حاجة بره الصيانة
بيلفوا حوالين نفسهم عشان يجيبوها

بس مش عارف ليه دايما مش موفرين حاجة proton كده
كذا واحد يقول إنه بيستنى قطعة الغيار
مش فاهم ليه مهملين proton كده
مبروك عليك العربية واستمتع بيها و متضايقش نفسك


ملحوظة : أنا مش بدافع عنه
أصل فيه ناس أول ما تشوف إن معاك citroen
تقول ده داخل يدفع على طول

[eng.m7md.ali]

طبعاً توكيل زي الزفت ومش فاهمين حاجة ودي حقيقة

لكن موضوع التنفيس ده طبيعي جداً في اي مساعد حالته زيرو

[Khaled Lanos]

ربنا يكون في عونك..ارجع ليهم اخى مرة معلش خليهم يربطو العفشة كويس عشان الأصوات اللي ظهرت دي..وربنا معاك هنعمل ايه بقى.

[د.هشام]

هم في التوكيل أكيد مبسوطين باللي إنت كاتبه، علشان كده محدش حيروحلهم تاني

[saddam]

صديقي المواطن
والله عجزنا وياما نصحنا التوكيلات في مصر محدش يرضى يشتغل بيها إلا كسر المهندسين وبواقي اﻷسطوات وعشان كده عمري مدخل توكيل وأنا في الضمان إلا أما أكشف بره وأشوف الدنيا فيها إيه التوكيل ليه حاجات معينة غير كده موضوعك مكانش محتاج توكيل ودمتم للنضال

[M I D O]

لا حول ولا قوة الا بالله .. دول ميتقالش عليهم غير بقالين مش مهندسين طلع العيب من الكبالن مش مربوطة في اخر الليلة بعد المرمطة دي وياريتهم صلحو العيب لا بوظو باقي العربية بسبب عيب زي دة حسبنا الله ونعم الوكيل فيهم وربنا معاك ورحلهم تاني عشان الاصوات الي بتسمعها دي

[bondok20002002]

معلش والله بس لازم تستحمل علشان كل حاجة فى مصر لازم تيجى بالجرى والزق لازم كلل حاجة نقعد نجرى وراها كده بجد حاجة صعبة معلش قدر الله وما شاء فعل وانا برده رايح التوكيل قريب علشان التكييف عنده فى مشكلة شحنته مرتين وفى الأخر حسيت بالفريون بيترسب من جوه العربية تحت التابلوه فى الكرسى إلى جنب السواق فحروح لهم واشوف الموضوع إيه وربنا يستر
بس بجد إنت بطل

[Ahmed.Ali]

صراحه هم طبعا يستاهلوا البهدله لانهم طلعوا عنيك و معرفوش العيب من الاول بس نقطه تحسب للتوكيل انه كان بيغير من غير و يوجع دماغك انت لو عرفت سعر كل قطعه بتتغير هتتصدم دا كفايه علبه الدركسيون. طبعا دا حق اصيل ليك هم مش بيتكرموا عليك بحاجه و كدا كدا الحساب علي بروتون بس مش كل التوكيلات كدا