الجين 2 هتجننى بجد ساعدونى برأيكم

[Boody8882]

يا جماعة الجين 2 هتجننى بجد زى ما جنننت نــاس كتير قبل كده وده بسبب كلامكم الرائع عنها وتشكيركم فيها وخصوصآ الاستاذ توت ربنا يباركله مش مخلى حاجه مش موضحها عن العربية
أنا بقى كنت محتار ما بين أربع عربيات وهما اللانسر 1600 والجيتز والسيريون وأخير المتألقة الجين 2 , وبأمانه أنا كنت مايل طبعآ لللانسر خصوصآ إنى فعلا بحبها وبثق فى إمكانيتها وكمان مين فينا ميعرفش اللانسر ولا مركبهاش . وكنت بفكر فى الجيتز والسيريون لما فكرت إنى أجيب هاتش باك خصوصآ إنى السيريون يابانى والجيتز فى ناس كتير بتشكر فيها , لحد مبدأت أتجنن بسبب المنتدى بتاكو وعشقكو للجين 2 ودلوقتى أنا مصمم عليها بس كل مكلم حد قريب منى وقولوا أنا خلاص نويت على الجين 2 يقولى يا سلام يعنى تسيب اللانسر اليابانى اللى كل الناس عرفاها وتركب ماليزى ! ما ناقص تركب صينى بقى كمان طالما الموضوع إن الناس بتشكر فى العربية وخلاص ويقولى أسئل آى حد من اللى راكبين الجين 2 دى وإسئله تركب الجين 2 ولا اللانسر مثلا
بجد إعذرونى بس أنا موهوم بالعربية بس الكل معرضنى . ومعلش دوشتكوا وكل سنة وإنتو طيبين

[Powert]

برضه كل لما اقول لحد على الجين2 يقولى هات لانسر ياباني واضمن

ولما سألت كام واحد معاهم الجين2 قالولي لأ طبعاً دي برقبة الجين2



ماليزا دلوقتي من اكبر الدول الاسيوية ومن ضمن النمور الاسيوية

ومتفوقة جداً في مجال التكنولوجيا وعمر الماليزي مكان صيني ولا هيكون صيني


بروتون بتصنع عربيتها دلوقتي بخبرة من لوتس , و لوتس بتصمم العربية وبتصنع بس في ماليزا



نصيحة ماتركبش عربية علشان دي ماليزي ولا صيني ولا الماني

اركب اكتر عربية بتحبها وتستريحلها

[AhmedGen2]

ولما سألت كام واحد معاهم الجين2 قالولي لأ طبعاً دي برقبة الجين2

برقبة الجين تو ولا الجين تو هى اللى برقبتها؟.

[Powert]

برقبة الجين تو ولا الجين تو هى اللى برقبتها؟.

انا اسف على الغلطة المطبعية

الجين2 برقبتها يعني الجين2 احسن من الانسر

واسأل اي حد معاه الجين2 ( اوعى تسأل بنات او ستات)( اسأل شباب)

[mody_halawa]

انا بصراحة مجربتش الجين 2 بس انا لو بشترى هجيب لانسر 1600

[Powert]

انا بصراحة مجربتش الجين 2 بس انا لو بشترى هجيب لانسر 1600

انت عارف ليه هتشتري اللانسر ومش هتجيب الجين2

لانك مجرابتش الجين2

[ahmedsiyam]

من وجهة نظرى اللانسر عربية مبالغ جدا فى سعرها
بس هى كصالون و سعر اعادة بيع افضل بكتير من الجين 2

[mazagnge]

أرسل أصلا بواسطة Powert

ولما سألت كام واحد معاهم الجين2 قالولي لأ طبعاً دي برقبة الجين2

علي رأي الست سعاد حسني :

بانوا ... بانوا ... بانوا

[ahmad alshaaer]

انا من مالكي جين 2 سبورت 2008 العربيه تكيف افندينا ولا لانسر ولا دياولو
بس البيع طبعا تقيل
والعمر الافتراضي ماقدرش افتيلك فيه لاني لسه جايبها ومشيت بيها 2500 كلم فقط
وربنا يبارك لكل واحد في سيارته

[creative]

بص ياباشااااا ,,, انا لو مكانك هاجيب الجين 2 بس طبعا انا هاحط نفسى مكانك
كل الاراء ستراها متجهة ناحية الجين 2 بس فى حاجة بسيطة طبعا تتحط فى الحسبان ان اى حد طبعا بيبقا معاه فلوس وتعبان فيها وعاوز يضمن فلوسه فى عربية مضمونة
طبعا الجين 2 جميلة بس لسها مش بقالها سنين زى الانسر
بس ده مايمنعش انى فعلا بموت فى العربية دى جدا جدا جدا
والاختيار ليك

[MoDyBeNz2008]

وكنت بفكر فى الجيتز والسيريون لما فكرت إنى أجيب هاتش باك

الجين 2 هاتش باك على فكرة والسيدان منها اسمه مشفاكره
انا كنت عاشق احاجة اسمها لانسر و جين 2 لو كنت موجود من زمان كنت شوف التوقيع بتاعي وانت تعرف اني كنت بحب الانسر بس لما ركبت الجين 2 عربية مختلفة تماما تابلوه بسيط وجميل له مضهر رياضي الشكل من برة احسن من اللانسر اللي بقلهة 6 سنينن في السوق و مرطرطة في الشوارع بس الجن تو فيها مثبت سرعة اللانسر مفيهاش الاتنين فيهم abs اير باج اللانسر سهلة في اعادة البيع قطع غيار اللانسر مالية السوق خش منتدى ميتسوبيشي وشوف راي الناس في اللانسر
و الصراحة سعر اللانسر مبالغ فيه و الجين2 رخيصة زيادة عن اللزوم و ممكن تفكر في تيدا هاتش باك ياباني 100% تابلوه رائع و فخم وسع رهيب لا غبار عليها انا ارشحهالك بدل لانسر و جين 2 و ان فاتك الياباني ميرجعش تاني
التيدا ياباني 100%

[hazem_khidr]

شوف انت ترتاح لايه
و في انتظار رد الاستاذ توت علينا:)

[mohamed ibiza]

العربية اللي ترتاحلها هاتها بس لانسر متجربة و معروفة من سنيييييييييييييييين و عربية بتاعت شغل الي حد ما يعني انما الجين 2 لسه متجربتش بس بجد بقي اللي في الجين2 برقبة لانسر الصاج بتاع الجين 2 ممتاااااااااااز

[tutankhamoun]

السلام عليكم يا رجال نايل موتورز ..... و تحياتي للأستاذ حازم خضر

و شكرا لصاحب الموضوع لثقته في كلامي و رأيي عن السيارة


الاثنين حلوين ........
اللانسر فيها مميزات مش موجودة في الجين 2
و الجين 2 فيها مميزات مش موجودة في اللانسر

طيب مميزات اللانسر اللي مش موجودة في الجين 2
سوق اعادة بيع ........ ممتاز
قطع غيار موجودة في كل مكان و من كل نوع ( صيني و تايواني و أصلي )
أوتوماتيك اللانسر 1600 ......... أفضل من أوتوماتيك الجين 2


مميزات الجين 2 اللي مش موجودة في اللانسر
موضوع الثبات ........ اللي ناس كتير أتفقوا عليه في الجين 2 و لم يتفقوا عليه في اللانسر بس برضه أحنا بنتكلم عن سرعات عالية يعني فوق 120 و ده نادر لما حد يمشي عليها
أوتوماتيك الجين 2 فيه مثبت سرعة و ده مش موجود في اللانسر و مفيد جدا لو إستخدام السيارة دائم على طرق سريعة إنما لو إستخدام مدن و ضواحي دائم يبقى العربيتين ملهومش لزمة و خليك في حاجة 1300

الجين 2 شكلها أحلى من اللانسر البومة بكتير و برضه دي أذواق
صاج الجين 2 أقوى من صاج اللانسر
الجين 2 مع ثباتها مش بتحك مع أي مطب أنا بشوف لانسر محمل ناس بتبقى على الأرض ( مجرد رؤية من بعيد )

بالنسبة للأدا ء الخاص بالمحرك يكاد يكون متقارب و ده عن تجربة


لو عايز تشتري الجين 2 لازم تتخلص من الحيرة الأول و من عقدة الياباني و الكلام ده
لأنك لو خايف ........... أوعى تشتريها ......... و خليك في اللي قلبك يطمنلوه أحسن
أنا زيك بالظبط .......... قبل ما أشتري الجين 2 .......... و لا واحد قالي أشتريها ......... كل البشر اللي سألتهم ......... قالولي هات لانسر
بس بعد ما شافوه العربية و جربوها ......... غيروا رأيهم و عرفوا أنها عربية حلوة
للآسف أحنا في مصر دايما نعيب على حاجة مش عارفين عنها حاجة

عموما برضه لو أنت مش مطمن و خايف ......... هات لانسر ....... أهي عربية مضمونة و حلوة و قطع غيارها متوفرة
لو أنت صاحب مزاج و عايز تركب اللي على مزاجك .......... أشتري جين 2 و إن شاء الله ........ العربية مفيهاش أي حاجة
أنا لي واحد صاحبي عامل بيها دلوقتي فوق 85 ألف ( أخر مرة قابلته ) و مفيش مشاكل من أي نوع معاه و عربيته موديل 2006 أول السنة يعني داخل على ثلاثة سنوات و مفيش مشاكل
و لا غير حاجة في الموتور و لا عفشة و لا أي حاجة
طبعا أنا بقولك على هذا المثال علشان أثبتلك إن العربية ما شاء الله عليها ......... شغالة كويس بدون أي مشاكل

صحيح نسيت أقول حاجة
إستهلاك الجين 2 للبنزين ............ أحسن من اللانسر شوية
المعدل العام
لو العربية فاضية مفيهاش غيرك ........ و مش بتقرص على الموتور ممكن تعمل معاك من 15 إلى 17 كم لكل لتر
لو محمل ناس و برضه مش بتقرص عليها و بالتكييف بيكون من 12 إلى 13 كم لكل لتر بنزين
ده الإستهلاك على الطرق السريعة طبعا و بسرعة 100 كحد أقصى

و بالنسبة لموضوع السعر ....... طبعا فيه فرق مش هين ما بين السيارتين في السعر
يبقى الجين 2 كصفقة عامة .,......... أفضل من اللانسر
بتديك إمكانيات عالية و كماليات عالية بسعر معقول بس بتفتقد لحاجتين
سعر اعادة البيع بالمقارنة مع اللانسر ....... و توافر قطع الغيار أيضا بالمقارنة مع اللانسر

و عليك بصلاة الإستخارة و اللي قلبك يرتحالوه أشتريها على طول خصوصا إن الاثنين حلوين و متخافش من الجين 2 إن شاء الله

----------------

ملحوظة صغيرة
لو كل الناس أول ما الياباني نزل مصر و ماشتروهوش علشان خاطر الأوروبي .......... مكنش بقى فيه حاجة أسمها ياباني في السوق المصري
و نفس الكلام على الكوري

[tutankhamoun]

فيه حاجة كمان نسيت أقولها
لو ظروف سواقتك دايما جوه البلد ....... سواقة محلية و نادرا لما بتطلع بالعربية على طرق سريعة
و مش محتاج قوة موتور 1600

سيبك من اللانسر و سيبك من الجين 2
و فكر في السيريون و كمان معاها ..... البونتو كلاسيك و الياريس
عربيات موفرة في البنزين و محترمة
إنما لو معظم سواقتك على طرق سريعة و أنت ميال لموتور قوي
زي ما قلت في المداخلة السابقة
عندك الللانسر و عندك الجين 2

و سيبك من الجيتز تماما
عربية صغيرة و موتور شديد ......... يعني مفيش ثبات ......... و العربية كمان عالية عن الأرض مش زي الميني كوبر مثلا
و اللي قلبك يرتحاله .......... أشتريه و متسمعش كلام الناس اللي مجربتش العربية