محل قطع غيار بروتون في السويس عنده حاجات كويسه خاصه للساجا

[yaseenmohamed]

السلام عليكم ورحمة الله
النهارده عديت علي محل قطع غيار لبروتون والمحل ده كنت بتردد عليه من فتره لفتره ومكنش عنده اي حاجه للساجا
النهارده رحت وقلت اشوف لقيت عنده حاجات كويسه للساجا منها جميع الفوانيس وجميع السيور والفلاتر والتيل وفوجئت ان عنده مساعدين الساجا الزوج الخلفي عنده حاليا ماليزي بس مش الاصلي ب 550 جنيه والامامي قالي حيجيبه يوم الجمعه ان شاء الله والزوج أصلي ب 1300 جنيه
ولقيت عنده حاجات كويسه للجين تو وكمان الواجا منها الطنابير والمقصات
المحل ده هو ابوغبان اللي خلف بنك اسكتدريه عند مدرسة قاسم امين وصاحبه اسمه أ / طارق
انا كتبت المشاركه دي لاني من فترة قابلت واحد وقالي انه دايخ علي مساعدين الساجا

[mo7a_mo7a]

شكرا علي المعلومات

[msa142]

الله ينور عليك والله ابو غبان دا راجل ميه ميه انا مش معايا بروتون بس معايا ماروتى :d وكل قطع غيارها عنده برضه ومن احسن الناس الى ف السويس بأمانه وبلاش تتعامل مع نصر كار الى جنبه فى نفس الشارع حتى ولو فى قطعه اكسسوار

[falcon44]

استاذ ياسين
انا من السويس معاكو وان شاء الله ناوى على شراء عربيه جديده والفلوس اللى معايا فى رنج 82 وممكن تزيد باكو او اتنين
والساجا دخلت ضمن الاختيارات ومعاها الفيرنا واللانوس واللوجان وان شاء الله ناوى العربيه تكون مانوال مش اوتوماتيك
بس انا كنت مقلق شويا من حكاية قطع الغيار وفى ناس كتير حظرونى من التوكيل بالذات مع انا العربيه عجبانى جدا وقالولى ان قطع الغيار اغلى من ال3 عربيات التانيه ومش هتلاقيها بسهوله لانها مش موجوده فى التوكيل من الاساس
وحضرتك مشكورا عرفت الناس مكان لقطع غيار الساجا فى السويس بس ياريت حضرتك تقولى ايه اخبار قطع الغيار بالمقارنه بالعربيات التانيه وايه رايك فى العربيه عموما ولو مكانى ورجع بيك الزمن هتختار الساجا تانى ولا هتفكر فى حاجه تانيه وياريت حضرتك تكلمنى على اهم الميزات اللى شايفها فى العربيه وايه العيوب عشان اعرف اقارن كويس بين ال4 عربيات
طولت عليك معلش بس ده العشم ومستنى ردك ورد كل الناس ونصايحهم وشكرا جزيلا

[yaseenmohamed]

اخي الحبيب
في البدايه بعتذر عن التاخر في الرد
المقارنه بين العربيات بالنسبه لي ( وده مجرد راي ) انا باستبعد الفيرنا من المقارنات دي وده بسبب اني بسافر كتير بحكم شغلي فمينفعش الفيرنا دي في السفر(وده عن تجربه) اما جوه البلد فهي عربيه حلوة أوي
اللانوس عربيه حلوه جدا جدا وكانت معايا وكانت مريحاني جدا ولما بعتها مش عايز اقولك انها اتباعت في ساعتين زمن وبسعر كويس جدا بس مش حتكون حاسس انك راكب عربيه مميزة وعندنا في السويس زي مانت عارف الملاكي منها شغال تاكسي ودي حاجه كانت معقداني لان الناس وبالذات في الصيف كانت بتشاور لي عل اساس انها تاكسي
اللانوس والفيرنا قطع غيارهم متوفره جدا جدا جدا ودي ميزة قاتلة وده اللي بيخلي سعر اعادة البيع ممتازة وده مش موجود في الساجا وكمان استهلاك البنزين الفيرنا واللانوس اقتصاديين جدا في البنزين وده برضه مش كويس في الساجا للاسف
اللوجان الحقيقه معرفش عنها حاجه غير انها الداتشيا الروماني
نيجي للساجا العربيه والحمد لله كويسه لكن قطع الغيار نقطه مش في صالح العربيه خالص للاسف وده بيضعف من انتشارها وبالتالي حتي في سعر اعاده البيع لكن في المقابل فالعربيه ما شاء الله قوية بمعني الكلمه
بالنسبه لي :
ان كان معايا المبلغ ده كاش لا حجيب دي ولا دي ولكن حشوف حاجه مستعمله بحاله ممتازة زي مثلا لانسر او كورولا او جين تو( معشوقتي ) وحتكون بحاله ممتازة
لو متحبش المستعمل فانت هنا مفيش ادامك غير الاربع عربيات دول فلو مش فارق معاك موضوع شكل اللانوس هاتها لكن لو حتكون مخنوق من شكلها يبقي توكل علي الله وهات الساجا وان شاء الله ربنا يوفقك