الفرامل !

[SHEVA11111]

انا قريت فى المنتدى كتير عن الفرامل والمفروض انى هستلم كمان 10 ايام الجين 2 .. ودى اول عربية هركبها ومتعلم سواقة جديد كمان .. يعنى المفروض اللى تقف جنبى اول فترة هى الفرامل .. ناس تكتب كويسة وناس تكتب لا مش تمام .. واللى يقولك حلوة بس بدالها طويل مع انى مش فاهم اصلا يعنى ايه بدالها طويل .. واللى يقلك ده كله عشان ال ABS .. فمعلش حد يقولى الفرامل نظامها ايه بكل امانة .. بالاضافة ازاى الواحد يتعامل معاها ؟

وهل لو الواحد شال فيوز ال abs .. هتبقى زى اى فرامل تانية عادية ؟ وهل فى طريقة لتعديل الفرامل عشان تبقى الفرامل زى اى فرامل عربية تانية ؟

[svneleven]

يا سيدي في الأول أمشي علي مهلك و ما تجريش جامد لحد ما تتقن القيادة و تتعود علي العربية. ال abs بياخد مسافة أكبر لكن وجودة أفضل بكتير من عدم وجودة و بالعكس كويس أنك جبت عربيه فيها abs.

[SHEVA11111]

مانا عاوز افهم نظام الفرامل لان ناس كتير بتشتكى منها .. ولقيت ناس بتكتب انها كانت ماشية على ال 80 وتيجى تفرمل متفرملش ويقوم لابس وخابط !! فكنت عاوز افهم اكتر .. فياريت لو حد يساعدنى

[eng.m7md.ali]

ياباشا انا هقولك حاجة .. اللي يركب اي عربية كوري وبعد كدة يركب البروتون هيحس ان فراملها مش قوية

المشكلة مش في الفرامل المشكلة في البدال انك بتحتاج تدوس شوية عشان تقف وتهدي والمسألة نسبة وتناسب .. تدوس اكتر فرصتك في الوقوف تكتر

اما لو كنت راكب كوري هتلاقي الوضع مختلف .. هتدوس خفيف هتلاقي العربية بتقف بردو

يعني الموضوع عايز تعود مش اكتر

واوعي تشيل فيوز ال abs

[eng.m7md.ali]

وانصحك تجرب العربية الاول في التوكيل وتجرب الموضوع ده عشان تستريح

[SHEVA11111]

للاسف مفيش تست درايف فى المنصورة على الجين 2 .. قالى لو عاوز تجرب ممكن اخليك تجرب البيرسوناوبيقول هى هى نفس فرامل الجين 2 .. فهل الكلام ده صح ؟

[eng.m7md.ali]

هيا هيا فعلاً في كل حاجة

[msami2k]

القصة دي ملهاش دعوة بال abs
ال abs بيشتغل لو العربية زحفت منك (اتزحلقت على التراب أو المياه او مع السرعة الشديدة) وساعتها بتسمع صوته وبتحس بيه جامد في دواسة الفرامل (هز مستمر جامد طول ما هوا شغال)

نيجي للفرامل ونفترض مثلا أن انت ممكن تدوس على البدال بتاع الفرامل تزقه لحد 10 سنتيمتر أقصى حاجة ..... هتلاق العربيات فيها مدرستين

الأولى الكوري واللي شبهها كل ما تدوس سنتي تاخد شوية فرملة على قد دوستك فلو دوست خمسة سنتي تاخد نص فرملة (نص فرملة دي على فكرة جامدة جدا وتخليك تقف بسرعة فيما عدا الحوادث)

المدرسة التانية هيا الأوربي وهنا هوا بيقسلمك دوسة الفرامل لجزئين أول خمسة سنتي وآخر خمسة
الخمسة سنتي الأولانيين دول بتوع التهدئة .... يعنى لو دوست وجبتهم كلهم يبقى انت بتهدي وده مثلا يكافئ مثلا ضغطة قيمتها 2 سنتي في الكوري ............ والخمسة التانيين بتوع الفرملة الجامدة ودول بيوقفو العربية في ساعتها

المدرسة التانية بتديك تحكم سهل في درجة التهدئة لكن الكوري أعتقد أسهل في التصميم وينفع سواقة الستات

من الآخر الموضوع ميفرقش وبعد أسبوع مش هتحس بفرق وأنا باركب عربيتين في نفس الوقت من المدرستين وأوتوماتيك رجلك بتتبرمج ...... بحس بالفرق لو اتنقلت من واحدة للتانية من غير فارق زمني .... لكن لو استنيت ربع ساعة مباخدش بالي