يوم فى مركز عصام صفا !!!!!!

[a_samy]

قررت إمبارح أروح أعمل الصيانه اللى أعلن عنها عز العرب فى حملة الصيانه المجانيه,
أتصلت بمركز عصام صفا وقالى تعالى وروحت على الساعه 1:30 ظهرا,كان زحمه جدااااااااا وقالى حتستنى معانا كتير قولتله ماشى (منا معنديش وقت تانى فاضى أعمل فيه الصيانه والصيف داخل),
المهم فضلت قاعد من 1:30 لحد الساعه 5:30 دخلوا العربيه,
انا كنت عاوز أشيك على دورة التبريد وانضف الفلاتر وكان الزجاج الأمامى يمين بايظ والفيوز بتاع الولاعه ضرب (للمره التانيه مش عارف ليه)وكنت عاوز أعمل رجلاش للفوانيس الأماميه عشان مش بشوف حاجه من العالى وأصلح المالتى فانكشن,المهم بدون إطاله والعربيه على الكوريك لقيت الأستاذ عصام بينادينى وبيقولى أنت ليه شيلت الإستيكر بتاعى وإيه المركز اللى انت حاطط الإستيكر بتاعه على العربيه ده؟(المركز ده عباره عن ميكانيكى شغال فى المعادى وبيفهم فى البروتون)..
طبعا عصام بك أضايق جدااااااا وابتدى يتعصب ويتنرفز لدرجة انه فضل 10 دقايق بيزعق لموظف عنده من كتر الغيظ لأن كل العربيات اللى كانت واقفه مش عليها الإستيكر بتاعه... ولما جه العامل يحطلى الإستيكر على العربيه خليته يحطه على الإزاز الخلفى تحت لوجو عز العرب راح جاى عصام بك شايله وقالى انت حاطه تحت اللوجو بتاع مركز المعادى وملوش لازمه
المهم فى الآخر الساعه 9 بالليل لما جيت أحاسب (ومعملوش كل الشغل اللى كنت طالبه)ادانى فاتوره ب 230 جنيه
طب ليه هيا مش صيانه مجانيه؟
لقيته حاطط قطع غيار ب 30 جنيه اللى هما (لمبه 2 بوله وسوستة باب تنك البنزين)!!!!!
وكاتبلى فى الفاتوره تغيير زيت وصيانة ال 15000 كم

يا جماعه انا معملتش كل ده راح قالى طب خلاص حخليهالك 130 بس مبسوط؟

قولتله طب خلاص اللى انت شايفه ومشيت وانا مش طايقه وقررت انى مش هروحله تانى ل 3 أسباب:-
1-انه قليل الذوق لأنه بهدل الراجل اللى شغال معاه وفى الآخر قعد يضحك الناس عليه.
2-لأنه بيكره الخير للناس ومش عاوز حد تانى ينافسه حتى لو فى منطقه بعيده عنه.
3-عشان معندوش ضمير وبينصب على الناس وبيجرب لو اللى قدامه سكت بيمشيها ولو أعترض بيعمل انه بيعمله خصم وبيكرمه.

[DESIGNER105]

اسواء مكان ممكن تروحلو هو عصام صفا ....روحتلو مره من 3 سنين ودبسونى فى حوارات اتكلفت 5 الاف جنيه وخدت العربيه زى الزفت ....ومن ساعتها مروحتلوش تانى ......انا مستغرب جدا لما سألك على الاستيكر الى شلتو ...ليه مقولتلوش انت مالك هى عربيتى ولا عربيتك .!!!!. حاجه غريبه جدا والله ...

[carrier]

(المركز ده عباره عن ميكانيكى شغال فى المعادى وبيفهم فى البروتون)..

ممكن عنوانه وتليفوناته لو تكرمت

[eng.m7md.ali]

معقول الكلام ده؟!!!

[soteer10]

للاسف و اكتر من كده كمان ومينفعش تتكلم والا تبقي غلطان

انا لسه متبهدل برضه هناك من اسبوع

[a_samy]

معقول الكلام ده؟!!!

أنا مليش مصلحه إنى أقول عليه كلام محصلش أو أتجنى عليه,
المعامله بتاعته بقت سيئه جداااااا والظاهر كده أنه أتنفخ من كتر العربيات اللى بقت بتروحله,
أنا كنت مبسوط إنى لقيت واحد قريب منى (نوعا ما)وأقدر أروحله فى أى وقت,بس الظاهر أنه عشان مش بيعمل مواعيد للعربيات اللى بتدخل تعمل صيانه عنده بقى عنده ضغط شغل والضغط ده أثر على آداء العاملين عنده وعليه هو شخصيا,ده غير أنه واخد فى نفسه قلم وفاكر أنه أحسن مركز خدمه للبروتون مع إنى كان ليا تجربه سيئه قبل كده ان عربيتى كانت بتسخن والميه بتنقص ومحدش عنده عرف السبب,ولما روحت لميكانيكى بره أكتشف أن الرادياتير مخروم!!!!!
ودى حاجه هايفه أوى المفروض مكنتش تعدى على عامل صيانه مبتدىء,
هو كل همه يبيع قطع غيار وبس حتى لو مستعمله بسعر الجديد.
أنا عندى إزاز الباب الأمامى يمين بايظ ولما كشف عليه قالى ان المفتاح الريئسى (اللى فى الباب الشمال)بايظ وعاوز يتغير وتمنه 700 جنيه...ولما قولتله خلاص غيره لقيته جابلى مفتاح مستعمل من عربيه قديمه بالتراب بتاعه وعاوز يبيعهولى على أنه جديد!!!!!
طبعا مردتش أركبه ومشيت بالقديم اللى بايظ....يعنى للدرجه دى الغش والنصب؟؟؟؟؟

[eng.m7md.ali]

مش قصدي اكدبك بس انا مستغرب ان الكلام ده بيتقال على المهندس عصام الراجل معروف انه محترم وذوق في التعامل مع الناس

[S O P H O S]

انا بردوا علطول كنت بشوف الناس بتشكر فيه

[J A G U A R]

انا مستغرب والله

[أبوعائش]

لا انكر إن المهندس عصام شخصية محترمة, لكن شغلهم بقى لا يطاق
عملت صيانة ال ٦٠ ألف عندهم, ومن اسبوعين كنت في السخنة وسامع صوت مش تمام في العربية
كشفت عليها لما رجعت, لقيت سير المجموعة أو الإدارة متغيرش ومتشقق جدا وستر ربنا انه ماتقطعش وانا على سفر
ده غير عمل لي شغل سمكرة أقل ما يقال عنه إنه زبالة.
ياريت اللي على علاقة كويسة بيهم يوصل لهم الشكاوى دي عشان مراكز بروتون مش ناقصة

[reda elgohary]

ربنا يهدي الجميع .

[reda elgohary]

متابع .

[Eng.Osama.Afifi]

هوا انا بعمل الصيانة في اوتوماجد ,,, محترمين للغاية
بس بسمع عن عصام صفا انه كويس ... بس ماتعاملتش معاه الحقيقة

[memo_p910]

أنا اتعاملت معاه مره من سنه كان الفتيس الاوتو فيه تعليق غريب كده مع المفتاح ورحت عملته وتمام التمام وطبعا كان فك الكونسول الوسطي علشان يصلحه النهارده بعد ما قريت الموضوع ده عرفت ليه الكونسول سايب ومش متربط اتاريهم مربطهوش بعد الصيانه وسايبينه سايب بيتحرك