مشكلة في الكهرباء

[mghualy]

البطارية بتفضى تماما لو العربية اتركنت يومين قبل ظهور المشكلة كان يمكن ركن العربية لمدة اسبوعين بدون مشاكل
بروتون جين٢ موديل ٢٠٠٧ البطارية جافة ٧٠ بقدرة فعلية ٦٤ امبير عمرها ٦ شهور فقط
العربية اتوماتيك بالكماليات الاصلية و لم يتم التعديل او تركيب اي شيئ فيها
راجعت شحن الدينامو خصوصا ان العطل ظهر بعد سفرية حوالي ٣٠٠كم و الشحن كان تمام

تمت مراجعة توكيل البطارية في الضمان و قام بشحن البطارية بمعرفته ولكن نفس العطل ظهر في اقل من ٢٤ ساعة من ركن السيارة
تم تغيير البطارية باخري و مراجعة الشحن مرة اخرى ولكن العطل ظهر على البطارية الجديدة في تاني يوم من ركن السيارة
المشكلة اساسا في وجود تسريب ارضي في السيارة حاليا بفصل كابل السالب(الارضي) عن البطارية بعد الركن للحفاظ على الشحن لحين الاستخدام بصراحة الموضوع مزعج جدا

قمت بعمل سريه بين القطب السالب و كابل السالب بعد فصله و محاولة فصل الفيوزات(علبة بجوار البطارية) تباعا لحصر مصدر التسريب و لكن لم انجح في تحديده
الشك ٥٠ % في منظومة الانذار لوجود صوت تكتكة منتظم داخل السيارة اسفل التابلوه
هل توجد طريقة لتحديد سبب العطل

[hossamalsadik]

أختبار اذا كان فيه تسريب كهرباء ام لا
هات لمبه ولتكن 5w افصل كابل ال السالب (-)
اطفى جميع انوار وجهزة العربيه والعربيه مبطله وتكون برده تماما وصل المبه طرف تشبكه بالسلك الارضى الى فصلته والطرف التانى بقطب البطارية السالب (-) وانظر للمبه
لو نورت يبقى فيه تسريب وبحث عنه ولو مانورتش يبقى كده مافيش اى تسريب
فى حالة اللمبه لو نورت ممكن تعمل الاتى رجع الكابل السالب واشبكه بقطب البطارية ودور العربيه حتى تسخن تماما ( حراة العربيه الطبيعيه ) بطل العربيه وقم بنفس الاختبار
لو مانورتش يبقى العيب فى الدينامو

ليه بقول مره والعربيه بارده ومره وهى سخنه لأن احيانا بيكون العيب فى سليكونات الدينامو لما العربيه بتكون بارده مابتفصلش يعنى التسريب من الدينمو نفسه رغم ان قياساته سليمه (الفولتيه بتعته)
ولما الماتور بيكون سخن وبالتالى الدينامو سخن هوا كمان بتفصل السليكونات وبيحصلش اى تسريب
وفى الحاله ديه بيتم تغير الدينامو

وده عن تجربه شخصيه لعيب نادر

بالتوفيق

[hossamalsadik]

لو كله تمام و الدينامو سليم تماماً
هتعمل اختبار اللمبه الى قلت عليه والعربيه مبطله وجميع الاجهزه والكماليات مطفيه ولمبة الاختبار وهيا منوره طبعا لوجود التسريب هتبدا فى فصل اجهزة وكماليات العربيه من مصدر كهربتها واحد تلو الاخر حتى تنطفى اللمبه بيكون هوا ده مصدر التسريب
ممكن تبدا بمنظومة الانذار عندك طالما شاكك فيه

تحياتى

[Ahmedhk]

أنا كانت بتحصل عندي مشكلة شبيهة كان عندي بطارية 55 امبير سائلة جديدة بقالها 5 شهور و مكنش في اي مشكلة طول الل 5 شهور علطول بتدور و مواجهتش اي مشكلة في الكهرباء و يوم ركنتها بليل و نازل الصبح لقيت البطارية ماتت مفيهاش اي شحن ولا حتى نور ولا اي حاجة حولت اعمل توصيلة و مفيش فايدة رجعتا للضمان و اشتريت واحدة جافة 70 امبير و كلو تمام و مشيت بيها يوم تمام ركتها و نزلت الصبح لقيتها مبتدرش و البطارية نامت و بردو مفيش اي كهرباء و اكتشفت المشكلة ان مكنة stop الفرامل كانت بتعلق انا مش قصدي يكون عندك نفس المشكلة بس بعد ما تطفي العربية تاكد ان الانوار كلها مطفأة و لف لفة حولين العربية ممكن اي نور شغال و انت مش واخد بالك و نظفت مكنة ال stop بتاعت الفرامل و الحمد لله اتحلت المشكلة.

[carrier]

طمنا

عملت ايه

[mghualy]

اولا اشكركم على الاهتمام بالرد و المشاركات الايجابية
ثانيا للاسف لظروف الانشغال بالعمل معملتش حاجة لسه في العربية و بدور على كهربائي شاطر ميعكش الدنيا و اكتفيت في الوقت الحالي بفصل كابل السالب لحين الاستعمال و البحث على النت عن اسباب المشكلة

ذي ما الاستاذ (hossamalsadik) شرح انا كنت عملت كده فعلا بس للاسف كانت نفس النتيجة و الموتور سخن و بارد طبعا مكنتش اعرف موضوع سيليكونات الدينمو ده (شكرا على المعلومة) بس موصلتش للسبب

و طبعا شكرا للاستاذ (Ahmedhk) مراجعة الانوار و ما شابه كانت اول حاجة عملتها بس للاسف مش هي دي برضه

دي بلوج لواحد عنده نفس العطل و نفس قرايات الافو ميتر كمان اللي بتطلع عندي (استعملت فكرة اللمبة مع الافوميتر خوفا عليه من الحرق مكنتش عارف التيار اللي بيتسحب قد ايه)
بس حتى الفيوز اللي اشار اليه لما فكيته موقفش التيار المسحوب
Pimp My Gen2: DIY-How to Find a Parasitic Battery Drain

[mghualy]

اغرب من الخيال

المشكلة اتحلت
انا شخصيا مش مصدق السبب الصراحة انا كنت قريت عنه في منتدى اجنبي و مصدقتش قلت ايه الخيال ده بس قلت اجرب
السبب يا ساده هو الاسطوانة
ايوان اسطوانة صوت متسابة في الكاسيت بعد ما تطفي العربية هي السبب اللي بيصفي البطارية في خلال يوميين
لقيت اسطوانة عندي كنت مشغلها و انا مسافر و مشلتهاش لما ركنت العربية
جربت شلتها من يوم السبت وركنت العربية لغايت النهاردة حوالي 5 ايام و العربية دارت في منتهى السلاسة
انا صعبان على بس البطارية اللي رجعتها بعد 6 شهور بس الحمدلله
محدش بيتعلم ببلاش
شكرا لكل مشاركتكم
انشروا الخبر بقى

[rahieb_100]

كده يبقى فى عيب فى الكاسيت او فى دايرة الكهربا اللى بتغذيه لان معنى كلامك ان الماتور بتاع الكاسيت بيفضل شغال حتى بعد ما تبطل العربية وده حاجة غريبة لان المفروض ان الكاسيت يفصل بعد ما تبطل العربية

[carrier]

المشكلة اتحلت :ta_clap[1]:
انا شخصيا مش مصدق السبب الصراحة انا كنت قريت عنه في منتدى اجنبي و مصدقتش قلت ايه الخيال ده بس قلت اجرب
السبب يا ساده هو الاسطوانة
ايوان اسطوانة صوت متسابة في الكاسيت بعد ما تطفي العربية هي السبب اللي بيصفي البطارية في خلال يوميين
لقيت اسطوانة عندي كنت مشغلها و انا مسافر و مشلتهاش لما ركنت العربية
جربت شلتها من يوم السبت وركنت العربية لغايت النهاردة حوالي 5 ايام و العربية دارت في منتهى السلاسة
انا صعبان على بس البطارية اللي رجعتها بعد 6 شهور بس الحمدلله
محدش بيتعلم ببلاش
شكرا لكل مشاركتكم
انشروا الخبر بقى:e_braces[1]:

ننشر ايه حضرتك انت جاى تهرج معانا هنا

جين2 ايه وكلنا او معظمنا بيبطل العربية والاسطوانه شغاله سنين ولا بيحصل حاجة طبعا لان الفصل الكامل

عدا الانذار بيتم للسيارة كلها

رجاءا مينفعش كده

[mghualy]

ننشر ايه حضرتك انت جاى تهرج معانا هنا

جين2 ايه وكلنا او معظمنا بيبطل العربية والاسطوانه شغاله سنين ولا بيحصل حاجة طبعا لان الفصل الكامل

عدا الانذار بيتم للسيارة كلها

رجاءا مينفعش كده

اكيد مش جاي اهرج مع حد
انا رفعت مشكلة و ناس مشكورة حاولة تساعدني على حلها و حقهم على لما اتحلت اقول لهم اتحلت اذاي جايز حد تاني يستفيد منها
و ذي ما حضرتك قريت كده انا كاتب لقيت الحل ده على منتدى اجنبي يعني مش انا الوحيد اللي اتعرض للمشكلة دي
لو حضرتك شايف ان ده تهريج انت حر بس دي مشكلتك انت و كاسيت جين 2 -2007

[mghualy]

كده يبقى فى عيب فى الكاسيت او فى دايرة الكهربا اللى بتغذيه لان معنى كلامك ان الماتور بتاع الكاسيت بيفضل شغال حتى بعد ما تبطل العربية وده حاجة غريبة لان المفروض ان الكاسيت يفصل بعد ما تبطل العربية

كلام حضرتك مظبوط فعلا الكاسيت بيفصل لوبطلت العربية بس اي كاسيت حديث بياخد تغذية كهرباء اضافية مباشرة من البطارية علشان يحتفظ بذاكرة محطات الراديو و اعدادت الصوت
تحديدا على فيوز رقم 24 في كتالوج العربية و بيتحكم كمان في تغذية الانذار و الساعة و كذا حاجة تاني
لتوضيح اكتر ممكن تراجع المدونة دي
Pimp My Gen2: DIY-How to Find a Parasitic Battery Drain

[carrier]

كلام حضرتك مظبوط فعلا الكاسيت بيفصل لوبطلت العربية

• بخط ايدك

تيار ذاكرة الكاسيت والانذار لا يذكر سيادتك

بلاش تشوش علينا بخيالك الواسع لو سمحت