الكاوتش اتقطع

[amr saad929]

سلام عليكم,ازيكم ياشباب
النهارده والحمد لله وانا مروح مخدتش بالي ان في عجله نايمه وعلى ماوصلت لقيتا الكاوتش للاسف اتقطع..ف الحقيقه انا ارتحت لان العجله بقالها فتره بتنام واروح اكشف عليها ملاقيش حاجه ف ازودها وخلاص, استفساري هنا, العجل كلو عامل معايا 30 الف كيلو من اول ماشتريت العربيه واللي اعرفه انو بيتغير بعد 40 الف, هل اغير العجله اللي اتقطعت ولا اغير الاربعه..هم good year على فكره وفي ناس بتنصحني ببريدجستون..ايه رأيكم.. هو اقرب بنزينه فيها حد بيبيع pirelli بس معرفش اسعار الكاوتش ايه طبعا ف ياريت اي حد ليه خبره ف الموضوع يفيدنا وجزاكم الله خيرا

[Abdulrahman M]

متابع وان شاء الله تلاقي الهيفيدك

بس عندي سؤال بالنسبة للكاوتشات التيوبلس ايه نظامها واسعارها

[Omar Mahmoud]

قدر الله و ما شاء فعل
نصيحتي إنك تغير الاربع كاوتشات مع بعض و يا ريت لو تقدر تجيب بريدجستون تورانزا gr-90
الجوود يير اللي نازل مع العربية سئ جدا

[محمد يوسف]

التورانزا gr-90 الفردة معدية 900 جنيه....حرام جدا

أنصحك بميشلان...فردة طرية وثابتة وبرقبة البريدجستون...تعمل حوالى 600

وأقل منها شوية كونتنتال وجوديير

[ARKOON]

متااابع

[د.هشام]

الكاوتش غيره على 60000 أو 5 سنوان من تاريخ التصنيع
لما تنوي تغير الاربعة البريدجيستون الياباني أكثر من ممتاز

[eng.m7md.ali]

هات اي كاوتش زي الكونتننتال او المشلان او بريدجستون ... بس بلاش بيرللي سيء

[D . a .\ AYMAN]

ابن حلال أنا لسة مغير الكاوتش عندي برضه على 35 ألف وبقاله حوالي 5 آلاف سيء جدا وعالي وواطي وحكاية ومبرجل العربية تماما ومخليني خايف أسافر بيها وماشي وبالهداوة لغاية ما أعرف أغيره ... وبقاله قبلهم 5 آلاف كمان الفرامل بتاعته سيئة جدا ... عموما الجوديير الماليزي اللى نازل معاها عمره قصير شوية مع معظم الزملاء

بعد لف وتمحيص

كان البريدجستون gr-90 تورانزا ... بـ 720 جنيه ... من غير سعر التركيب

اليوكوهاما السي درايف ياباني ... 620 جنيه

تويو ياباني ... 550

الهانكوك كان بـ 550 برضه

استبعدت التويو .. نظرا لتجربة سيئة مر بيها أخي قبل ما اشتري على طول وكان لسة جايبه برضه
استبعدت الهانكوك لأن شكله ما عجبنيش

الحيرة كانت بين اليوكوهاما (الناس بتشكر فيه) والبريدجستون

في خصم وكيل بريدجستون عامله لعملاء البنك الأهلي 10% من سعر المنتجات .. (غير مصاريف التركيب) ... خد بالك إن المنتدى ليه خصم 50% على مصاريف الخدمات

بريدجستون بتدي ضمان أربع سنوات وكمان كل 10 آلاف كيلومتر تروح تغير أماكن الكاوتش مقص في أي فرع من فروح فيت أند فيكس ببلاش .. غير تزويد الهواء أو النيتروجين بحسب الأحوال ... ببلاش برضه ... لما حسبت القصة دي لاقيت إن الفرق بين اليوكوهاما والبريدجستون متقارب جدا

غير ميزة إنك واخد الكاوتش من الوكيل مباشرة من غير سوء تخزين عن معض ولا محل ولا يكون إنتاج قديم ولا حاجة ... يعني الفردة اللى أنا واخدها كانت إنتاج منتصف 2014 يعني ماكملتش شهرين ثلاثة

..........

توكلت على الله وركبت البريدجستون التورانزا GR-90 وكان إجمالي السعر اللى دفعته 2600 وشوية تقريبا بالتركيب وكل حاجة ...

ميزة العجلة دي واللى أنا حسيتها أول ما ركبتها ... الهدوء الرهيب ... ما تسمعش حس للكاوتش نهائي وهو ماشي على الأرض .. غير الضوضاء اللى كانت راكبة قبل كدة لدرجة إني فجأة حسيت صوت الموتور بقى مزعج قوي وأنا ماشي :)

لسة بقى ما جربتش عاملة إيه في الفرامل والثبات والكلام ده لأني لسة ما كملتش بيها 100 كيلو على بعض

بس في جميع الأحوال أفضل من اللى كانت راكبة فيها بمراحل في كل حاجة

[DESIGNER105]

رجع الكواتش الامامى القديم ورا ..وهات اتنين جداد قدام ...وخلى التالته القديمه معك استبن ومتسبهاش لبتاع الكواتش هتحتجها فى يوم من الايام....يعنى فى الاخر انتى هتشترى فردتين بس ....

[Abo_Mazen]

رجع الكواتش الامامى القديم ورا ..وهات اتنين جداد قدام ...وخلى التالته القديمه معك استبن ومتسبهاش لبتاع الكواتش هتحتجها فى يوم من الايام....يعنى فى الاخر انتى هتشترى فردتين بس ....

ده كلام الناس العمليين الشعبيين اللي عايزه تلم الموضوع بأقل تكلفه ..بصراحه ..أنا ناوي أعمل كده أصلا

[carrier]

علشان تستمتع بعربياتنا دى اللى كاوتشها 15

لازم الكاوتش كله يكون ماركة
تويو
يابانى الصنع

هتستمتع بالقيادة والجرى والنعومة والفرامل والمطبات مش هتتعبك
كاوتش روعة