ايه الفرق بين بيرسونا وجين2 ؟؟!!

[m-sabry]

انا بحب جين2 جداً بس عاوز عربية سيدان علشان بحتاج الشنطة كتير.. هل العربيتين واحد ولا فيه فروقات بينهم؟؟
ياريت لو تعرفوا اي فرق ولو بسيط تقولولي علشان اقدر أقرر..
شكرا مقدماً..

[ENG.MaRk]

الاتنين واحد بس البيرسونا سيدان و الجين 2 ليفت باك :)

[jisso82]

أنا كان معايا البرسونا و معايا دلوقتى جين 2
شوف يا كبير مافيش فرق فى حاجات كتير يعنى تقريبا العربيتين واحد فى كذا حاجة زى الكشافات و الموتور و قطع الغيار الداخلية و حتى بيشتركوا فى حاجات فى البودى بس بيختلفوا فى اللى جاى:
1- شنطة البرسونا أكبر بمراحل و الحقيقة مفتقدها جدا و ندمان على التبديل بس كان ليا ظروف خاصة مش وقته أصدعك بيها
2- صالون البرسونا من الخلف أريح بكتير و مدى وسع قوى عن الجين عن سحبة الليفت باك بتاعة الجين و الموضوع ده ظاهر جدا مقارنة بقرايبى و أهلى لما قعدوا معايا فى العربيتين.
3- كراسى البرسونا أريح برده كتير جدا عن كراسى الجين خاصة فى المسافات الطويلة ده غير إنها أعلى فى العربية
4- بالنسبة للأوتوماتيك فالبرسونا فيها مثبت سرعة و الجين 2 ما فيهاش
5- مرايات البرسونا أكبر و الرؤيا فيها أوضح و بإشارات.
بس يا سيدى دى كل الفروق بينهم من شخص ركب الاتنين بانتظام و عن تجربة البرسونا قعدت معايا حوالى أربع سنين و الجين بقالها معايا تقريبا سنة

[carrier]

مع احترامى الشديد للبيرسونا
بص يا ريس
انا ليا رأاى

شنطة الجين2 رغم انها اصغر كمساحة لكنها برده واسعة بجد وبتشيل شنط واغراض اكثر ارتفاعا تعجز معها البيرسونا


بروتون
يعنى جين2
شبابية
عائلية
رائعة
مميزة
من 2006 ولس بتخطف العين
ولها شخصية جذابة
ثباتها يتفوق عن ثبات البيرسونا بسبب شنطة البيرسونا بتقلل الثبات شوية
مبتحكش ابدا فى المطبات ولو متكربسة ودا المهم

[m-sabry]

رد وافي ومقارنة ممتااااااااازة.. شكراً جزيلاً

رد وافي ومقارنة ممتااااااااازة.. شكراً جزيلاً
هو ده بالظبط اللي انا كنت عاوز أعرفه.. الفروقات الصغيرة اللي محدش ياخد باله منها إلا اللي ركب الاتنين.. لأن بالنسبة للمواصفات هتحس ان الاتنين واحد بس لما يكون حد جرب الاتنين بيقدر يوصف الفروقات اللي ممكن البعض يفتكرها صغيرة بس هي في الحقيقة بتفرق كتيييييييييييييييييييير اوي... عالأقل معايا انا شخصياً..
شكراً جزيلاً على الرد الممتاز

[swimmer25]

مبتحكش ابدا فى المطبات ولو متكربسة ودا المهم

الجملة دي معناها إن فيه إختلاف في العفشة أو على الأقل المساعدين أنشف..هل ده حقيقي؟

[carrier]

فيه إختلاف في العفشة أو على الأقل المساعدين أنشف..هل ده حقيقي؟

طبعا
لأ

[Omar Mahmoud]

الجملة دي معناها إن فيه إختلاف في العفشة أو على الأقل المساعدين أنشف..هل ده حقيقي؟

العفشة واحد مفيش فرق

[D . a .\ AYMAN]

وكمان عدادات البيرسونا لونها أبيض في برتقالي خفيف

عدادات الجين لونها أحمر في برتقالي

الجين فيها زرار لضبط ارتفاع إضاءة الفوانيس الأمامية من الداخل لكن البيرسونا مافيهاش