Check List عند الاستلام

[amrcd1]

انا انشاء الله هستلم بكره او بعد بكره بالكتير gen 2 2009 automatic من عز العرب اسكندرية و كنت عايز اعرف من الاخوه الاعضاء ابص على ايه و انا بستلم و اخد بالى من ايه عند الاستلام و هل فى معامله خاصه للعربيه اول يوم ولا ممكن اسافر بيها ؟؟؟؟

[tutankhamoun]

أولا ألف مبروك مقدما و ربنا يتمم الإستلام على خير
أي عربية جديدة و انت بتستلمها بتبص على كل حاجة فيها خصوصا أن أحنا في مصر بلد الجمال و العجائب

المهم علشان منطولش عليك
تأخد معاك اسطوانة أغاني علشان تشغل الكاسيت و تجربة ( ياريت تكون أصلية ) أو من نوعية نظيفة
و تجرب التكييف - و تجرب الأضواء جميعا و تتأكد أن كلها تعمل بطريقة صحيحة
تجرب الكراسي و ترجعها لورا و تقدمها لقدام ( الكرسيين الأماميين )
و تبص على الصاج الخارجي كله و يجب أن يكون عديم التجريح أو الخربشة
العربية بييجي معاها آريال للراديو منفصل تتأكد من وجوده
الكتالوج كمان و كتالوج مشغل الأسطوانات و كتيب الوسائد الهوائية
تتأكد من وجود كيس من العدة بجانب الأستبن
و تتأكد من الأستبن و تراجع على على الكاوتش كله كويس
و تتأكد من العداد ميكونش عامل عدد كيلومترات كبير و يستحسن تحت 50 و ميزدش عن 75

بالنسبة للعربية المفروض أنها في فترة تليين لمسافة 1000 كم الأولى لذلك يجب مراعاة الأتي

عدم تزيد السرعة عن 100 و يفضل 90
عدم تزويد عداد RPM عن 3000 بأي حال من الأحوال
السير على سرعات مختلفة و على غيارات مختلفة متناسبة مع السرعة
عدم تشغيل التكييف أول ألف كم و الدنيا صاقعة أساسا

لا تضع بنزين أقل من 92 فيها و الفرق ما بينه و بين 95 مش السما و الأرض لذلك 92 مناسب جدا
في الأخر ربنا يباركلك في العربية و يعطيك خيرها و يكفيك شرها

[mayki4u]

انت حاجز من امتى يا amrcd1 ؟؟؟؟؟
وربنا يوفقك وتستلمها وابقى خللى بالك واعمل شيك على كل كبيره وصغيره والكاسيت والنور اللى جوه واللى بره والشنطه والمحرك وصوته اذا كان عالى او واطى والمساحات شغاله كويس ولا لا ؟ وكل زرار لقزاز العربيه كلله وزراير المرايا والمالتى فانكشن ؟ وحاول تلاقى خدشه فى العربيه ؟
بس والف مليون مبروووك ياباشا

[minasamirus]

احب اضيف حاجة مهمة مش الصاج الخارجي بس لا الداخلي كمان لان في العربية الي كانت موجودة في الصحراوي للعرض كان تقفيل الصاج الداخلي زفتتتت اوي اوي يعني تلاقي شفة الكبوت والشنطة معوجة و الحوض واخد بنط مش صح و حاجة غريبة جدا واضح زي ماقلت ان العربية دي بالذات معيوبة فقالوا يبهدلوها في العرض فياريت تاخد معاك واحد بيقلب عربيات يعني تاجر او ميكانيكي او حتي سمكري اعتبر نفسك رايح تشتري عربية مستعملة يعني وتكشف علي كل حاجة فيها لو تعرف ترفعها في بنزينة يبقي قشطة لان بعد ماشفت العربية دي بالذات مش هافوتلهم حاجة

[mazagnge]

احب اضيف حاجة مهمة مش الصاج الخارجي بس لا الداخلي كمان لان في العربية الي كانت موجودة في الصحراوي للعرض كان تقفيل الصاج الداخلي زفتتتت اوي اوي يعني تلاقي شفة الكبوت والشنطة معوجة و الحوض واخد بنط مش صح و حاجة غريبة جدا واضح زي ماقلت ان العربية دي بالذات معيوبة فقالوا يبهدلوها في العرض فياريت تاخد معاك واحد بيقلب عربيات يعني تاجر او ميكانيكي او حتي سمكري اعتبر نفسك رايح تشتري عربية مستعملة يعني وتكشف علي كل حاجة فيها لو تعرف ترفعها في بنزينة يبقي قشطة لان بعد ماشفت العربية دي بالذات مش هافوتلهم حاجة

العربية دى سألت عليها و قالوا أتباعت يا معلم

و ربنا يستر علينا

[minasamirus]

ده اكيد شربوها لواحد علي نياتو دي فيها عيوب تخرم عين الشمس زي ما بيقولوا

[mayki4u]

او ممكن عملو عليها تخفيض الفين او تلاته عشان يمشو سوقها
ودا المتبع فى سوق السيارات

[amrcd1]

انا كده مقلق ....

[waleedseng]

العربية دى سألت عليها و قالوا أتباعت يا معلم

لازم نوصّل الكلام دا للشركة في ماليزيا.
بس محتاجين نلاقي الزبون إللي خد العربية دي.

[Ebmorsy]

السلام عليكم
يا جماعة انا استلمت امبارح الجين 2 مانوال رمادى من الحى السابع
بس كلاموا قلقنى لتكون هى العربيه اللى بتتكلموا عليها
انا بصيت عليها لكن ماشفتش حاجه ملفته.
يا ترى ممكن حد يقوللى ايه مواصفات العربيه المذكورة علشان اتأكد هى اللى انا استلمتها ولا مش هى؟

[mayki4u]

انا متهيألى يا استاذ Ebmorsy انهم بيتكلمو على رمادى جين 2 اوتوماتيك وليست مانيوال عشان العربيه الوحيده اللى كانت فى العرض مانيوال كان لونها اسود
ومتشغلش بالك وقوللنا ايه ملاحظاتك على العربيه؟

[khpopo]

السلام عليكم
يا جماعة انا استلمت امبارح الجين 2 مانوال رمادى من الحى السابع
بس كلاموا قلقنى لتكون هى العربيه اللى بتتكلموا عليها
انا بصيت عليها لكن ماشفتش حاجه ملفته.
يا ترى ممكن حد يقوللى ايه مواصفات العربيه المذكورة علشان اتأكد هى اللى انا استلمتها ولا مش هى؟

مبرووووووك العربية جين2 الجميلة :skeptical:
ماحدش هايرد على الاستاذ ويفيدة من الاخوة الى عارفين العربية او اتكلمو عنها ؟؟!! :k38::K15:ولو قلقان بلغ التوكيل بالكلام دة او حد يراجع معاك العربية
ربنا يوفق