دعوى لمنتدى بروتون لكل من يريد الانضمام لارسال شكوى للشركه الام

[shehabhopazone]

لكل من يمتلك جين2 و يريد ارسال شكوى بصيغه محدده لكل مشاكل السياره الى الشركه الام و تجميع اكبر عدد من الملاك و الاتفاق على الصيغه الموحده و يقوم كل شخص مالك للسياره على حده بأرسال هذه الصيغه المتفق عليها للشركه الام في ماليزيا حتى تعم الفائده على كل مالكى السياره .....
كلنا يا جماعه مع بعض بايد واحده نقضي على عيوب السياره اللي كلنا بنحبها....
نعتبرها حمله للقضاء على عيوب السياره .......

[tutankhamoun]

السلام عليكم يا أستاذ شهاب
طبعا أنت مشكور على هذا الموضوع
و لكن بالفعل بروتون غيرت الادارة و بيقوموا في الوقت الحالي بتغيير موردين القطع اللي هايكتشفوا فيها مشاكل

ده بالاضافة أنهم اتفقوا مع الوكيل المحلي عز العرب على بناء مركز مخصوص لادارة فحص السيارة قبل البيع ( PDI )
للإنتهاء من مشاكل التقفيل البسيطة اللي بتظهر في السيارة عند بعض الناس
و ستقوم الشركة الأم أيضا بتدريب العمال و المهندسين المسئولين عن هذا المركز

و لو مازالتم تريدون مراسلة الشركة الام بخصوص أي شئ فهذا حقكم طبعا
بس أنا قلت أوضح الأحداث الجارية اللي عرفتها من المهندس - آمر الكوافي

[ahmedsiyam]

الاخ الفاضل

الموضوع ده اتعمل واحد زيه قبل كده و اتقفل لان التوكيل متمثل فى المهندس امر - مدير خدمات ما بعد البيع - اتعمل وصلة مباشرة معاه و تليفونه موجود و الراجل مرحب تماما باى حد مننا يعرض عليه مشكلته
انا رايى قبل الايملات و الكلام ده اعرض مشكلتك الاول و ان ما اتحلتش روح ياسيدى ابعت للشركة الام و اعمل اللى نفسك فيه بس تاكد من عجز التوكيل على حلها

[shehabhopazone]

ana ro7t eltawkeel sba3 marrat fe 5lal 10000 km , ltda ph[i hjpgj

[waleedseng]

بصو يا جماعة إنتو لو بعتو Mails للشركة في ماليزيا للسنة الجاية محدش هايرد عليكم.
أنا ليا واحد صاحبي معه الجين2 2008 و فيها مشاكل و قطع غيار مش موجودة وقصص كدة. المهم بعت Mails كتير للشركة في ماليزيا و مدش رد عليه خالص (شكلهم كدة فيهم عرق مصري) المهم صاحبي دا بعت Mail لشركة لوتـس(دول مفيهمش عرق مصري) و بعدها الناس إتصلوا بيه ومهندس أمر كلمه وجابولو قطعة الغيار و ظبطولوا العربية و من كلامة كان واضح إن الشكوى سمعت جامد.

ياريت فعلاً يا جماعة تتحركوا وتعملوا أي حاجة. أنا ملاحظ إن الناس عمالة تشتكي في المنتدى وبس!!!!!!!!!!!!!!!!!
و المنتدى مش هايحل مشاكلكم و حتى القسم الخاص بالشكاوي إللي المفروض المهندس أمر يبص عليه مشفتش ولا رد منه على مشاكل الناس واضح إنه مش بيدخل المنتدى من أصله.
لو بصيت على منتدى ميتسوبيشي هتشوف إزاي مهندس طارق من التوكيل متابع الناس بجد حاجة تخليك مطمئن . ياريت حد ينبه البشمهندس أمر للنقطة دي.

والله ياجماعة أنا متابع ال جين2 من حوالي شهر ونص وبعت عربيتي علشان أجيب ال جين2 لكن بعد متابعة المنتدي لشهر ونص قررت إني أشوف بديل علشان دي شركة من 2006 لحد 2009 مصلحتشي حاجة في العربية غير الفلتر( مش بقولكم فيهم عرق مصري) حاجة تخنق

عموماً أنا هفضل متابع المنتدى للأسباب الأتية:
1- يمكن يجد جديد(يا رب بسرعة قبل ما أشتري البديل)
2- أشوف ردود مزجنجي
3- يمكن أكون مفيد لحد

[aapaap855]

المنتدى معلش مع احترامي مفيد بيك وبالناس الي فيه
وفعلا الوصلة بتاعة المهندس آمر دي مش شغالة(شكلها وصلة تعبانة من ام نص جنيه)
يا ريت تتشال احسن لان المهندس آمر مش واصل للوصلة من اساسوه

[ahmedsiyam]

و المنتدى مش هايحل مشاكلكم و حتى القسم الخاص بالشكاوي إللي المفروض المهندس أمر يبص عليه مشفتش ولا رد منه على مشاكل الناس واضح إنه مش بيدخل المنتدى من أصله.
لو بصيت على منتدى ميتسوبيشي هتشوف إزاي مهندس طارق من التوكيل متابع الناس بجد حاجة تخليك مطمئن . ياريت حد ينبه البشمهندس أمر للنقطة دي.

اخى الفاضل مع احترامى الشديد لرأيك اللى حضرتك حر فيه بس احب الفت نظرك لحاجة

انت بتحكم على العربية من خلال صاحبك موش من خلال تجربتك الشخصية و ده طبعا بيجعل الحكم على الموضوع موش فى محله

انا شخصيا دخلت على المهندس امر فى مكتبه و لقيته فاتح المنتدى و كمان موش موضوع الشكاوى بتاعته ده كان قاعد متابع موضوع تانى داخل قسم بروتون
انت ماتعرفهوش علشان تحكم عليه بس انا اعرفه شخصيا و هو موش محتاج منى و لا من غيرى مديح اطلاقا بالعكس الراجل اخلاقه و امانته فى الشغل تخليك ماتقدرش تقول عليه كلمه و طول النهار بيلف فى الورشة و بيقابل العملاء و بيريح الناس كلها بجد

احب انوه بس ان منتدى نايل موتورز اقوى بكتير من الناس فاكراه و مؤثر جدا جدا و التوكيل متابعه من زمان اوى موش اليومين دول بس

المنتدى معلش مع احترامي مفيد بيك وبالناس الي فيه
وفعلا الوصلة بتاعة المهندس آمر دي مش شغالة(شكلها وصلة تعبانة من ام نص جنيه)
يا ريت تتشال احسن لان المهندس آمر مش واصل للوصلة من اساسوه

انا نفسى تثبت الكلام ده فعليا لانه فى رايى موش صحيح عارف انت لو بتتكلم على واحد غير المهندس امر كنت هاقف معاك و اؤيدك بس الراجل فعلا مختلف تماما و انت ظالمه

[tutankhamoun]

فعلا يا جماعة ...... المهندس آمر حاطط بياناته علشان اللي عنده مشكلة يكلمه
و الراجل متابع للمنتدى و لو أي حد كلمه و هو في أيده الحل مش هايتأخر في أنه يحل المشكلة و بضم صوتي لصوت الأستاذ أحمد صيام بإن الراجل ده محترم جدا و فعلا اللي يتعامل معاه هايعرف كدا
و بذلك أؤكد مرة تانية

اللي عنده مشكلة و عايز يكلمه ........... يجرب و الراجل مش هايتأخر أو لما تروح الصيانة أدخله المكتب و يشوفلك حل إن شاءالله

[aapaap855]

انا من اكتر الناس الي بتحترم المهندس آمر وعارف انو راجل ذوق
بس خش عالوصلة وهاتلي رد واحد من المهندس آمر على اي شكوى

[ahmedsiyam]

انا من اكتر الناس الي بتحترم المهندس آمر وعارف انو راجل ذوق
بس خش عالوصلة وهاتلي رد واحد من المهندس آمر على اي شكوى

اخى الفاضل هو موش بيرد على الناس شخصيا القصة كلها ان الموضوع لازم يبقى بنظام بمعنى ايه
انا عندى مشكلة مثلا روحت كاتبها فى الموضوع بتاعه و هو اوتوماتيك هايقراه و بعدين كلمته على تليفونه عرفته بنفسى و يتم الاتفاق على حل المشكلة و بعد لما الموضوع يخلص اروح كاتب تانى فى نفس الجزء المخصص للمشاكل اللى حصل علشان يبقى الكلام على عينك يا تاجر
المشكلة اتعرضت و حلها اتعرض فى نفس الموضوع
انا لو مكانه و قعد ارد على تساؤلات و مشاكل الناس كلها موش هاخلص و نجيب وقت منين للعملاء بره هو هايخد الموضوع من على المنتدى و يظبطه و يستنى صاحب الشكوى يكلمه و يتفق معاه على ميعاد ده طبعا بالنسبة للشكاوى الكبيرة
انما اللى عنده بقى مشكلة فى فرش الباب و المالتى فنكشن و التزييق و الحاجات البسيطة دى يروح الصيانة على طول يخلص

[waleedseng]

أنا مقتنع إن المنتدى دا مفيد جداً بس أنا مستغرب إن الناس بتكتفي بالشكوى هنا على الرغم إن د مش هيحل مشاكل العربية.
لازم لازم الشكاوي دي توصل الشركة في ماليزيا.
بجد حرام عربية جامدة زي دي و عيوبها الهايفه دي تكون سبب في إن الناس متشتريهاش و السبب إن التوكيل مش عارف يصلح شويت أصوات في العربية.
بجد أنا مخنوق علشان أنا كان نفسي أجيبها جداً.

[waleedseng]

اخى الفاضل هو موش بيرد على الناس شخصيا القصة كلها ان الموضوع لازم يبقى بنظام بمعنى ايه
انا عندى مشكلة مثلا روحت كاتبها فى الموضوع بتاعه و هو اوتوماتيك هايقراه و بعدين كلمته على تليفونه عرفته بنفسى و يتم الاتفاق على حل المشكلة و بعد لما الموضوع يخلص اروح كاتب تانى فى نفس الجزء المخصص للمشاكل اللى حصل علشان يبقى الكلام على عينك يا تاجر
المشكلة اتعرضت و حلها اتعرض فى نفس الموضوع
انا لو مكانه و قعد ارد على تساؤلات و مشاكل الناس كلها موش هاخلص و نجيب وقت منين للعملاء بره هو هايخد الموضوع من على المنتدى و يظبطه و يستنى صاحب الشكوى يكلمه و يتفق معاه على ميعاد ده طبعا بالنسبة للشكاوى الكبيرة
انما اللى عنده بقى مشكلة فى فرش الباب و المالتى فنكشن و التزييق و الحاجات البسيطة دى يروح الصيانة على طول يخلص

اسمحلي يا أحمد
اولاً الوصلة دي معموله علشان الناس تستفيد مش علشان نوصل لبشمهندس أمر و إلا كان التلفون كفاية.
يعني واحد زيي كان بيفكر يشتري العربية لما كنت أشوف بشمهندس أمر برد على الناس و أشوف الناس بتؤل إن مشاكلهم إتحلت كنت أكيد هطمئن

ثانياً: مشاكل فرش الباب و المالتى فنكشن و التزييق و الحاجات البسيطة دى تبقى بسيطة لو كان التوكيل بيعرف يحلها. بس للأسف مش بتتحل و السبب مش إهمال من التوكيل لكن الناس مش بتعرف تحلها أصلاً.
مش عارف الناس مخدوش تدريب كفاية ولا إيه السبب.

[ahmedsiyam]

اسمحلي يا أحمد
اولاً الوصلة دي معموله علشان الناس تستفيد مش علشان نوصل لبشمهندس أمر و إلا كان التلفون كفاية.
يعني واحد زيي كان بيفكر يشتري العربية لما كنت أشوف بشمهندس أمر برد على الناس و أشوف الناس بتؤل إن مشاكلهم إتحلت كنت أكيد هطمئن

ثانياً: مشاكل فرش الباب و المالتى فنكشن و التزييق و الحاجات البسيطة دى تبقى بسيطة لو كان التوكيل بيعرف يحلها. بس للأسف مش بتتحل و السبب مش إهمال من التوكيل لكن الناس مش بتعرف تحلها أصلاً.
مش عارف الناس مخدوش تدريب كفاية ولا إيه السبب.

يا وليد انت بتتكلم زيى مايكون انت شخصيا بتعانى من المشاكل دى فى العربية و انت اصلا موش راكبها عموما انا هاقترح عليك حل ظريف
انت عارف ان فيها مشاكل و عارف ان التوكيل اداء سيئ يبقى خلاص سيادتك ممكن تشوف عربية تانية لا تضايقك و لا التوكيل برضه يكون مستواه موش قد كده و تبقى انت اشتريت دماغك و ريحت نفسك و استثمرت فلوسك صح و تبعد عن وجع القلب اللى عندك من قبل ماتجيبها

[waleedseng]

يا وليد انت بتتكلم زيى مايكون انت شخصيا بتعانى من المشاكل دى فى العربية و انت اصلا موش راكبها عموما انا هاقترح عليك حل ظريف
انت عارف ان فيها مشاكل و عارف ان التوكيل اداء سيئ يبقى خلاص سيادتك ممكن تشوف عربية تانية لا تضايقك و لا التوكيل برضه يكون مستواه موش قد كده و تبقى انت اشتريت دماغك و ريحت نفسك و استثمرت فلوسك صح و تبعد عن وجع القلب اللى عندك من قبل ماتجيبها

أخي في الله أحمد انا صحيح معنديش العربية بس مين قال إني معنديش مشكلة
أنا مشكلتي إني حبيت العربية دي و عايز أشتريها بس زعلان من المشاكل إللي مش بتتحل في التوكيل (لاحظ إني مش بفتي دا من كلام الأعضاء هنا).
و مفيش حاجة في إيدي ممكن أعملها علشان أصلح الوضع دا (مينفعشي أشتكي و أنا معنديش العربية) وكمان مستغرب إن أصحاب العربيات مش بيشتكوا.
و بعدين يا أحمد مش الأفضل بدل ما أشتري دماغي و أجيب عربية تانية إني على الأقل أحاول أصلح الوضع عن طريق مساعدتك و مساعدة الأعضاء أصحاب العربية.
و بعدين كدة برده تقترح عليا أجيب عربية تانية إنت عايز تمشيني من المنتدى ولا أيه :K14:

[ahmedsiyam]

العفو يا اخى الفاضل انت منورنا و منور المنتدى
انا عايز اقولك بلا اى مبالغة ان العبد لله اكتر عضو هنا معاه العربية و فيها مشاكل انت لا تتخيلها و اوع تفتكر انى راضى عن العربية اللى معايا كده بالعكس انا راسلت الشركة فى مالزيا لان اللى عندى عيوب صناعة و كنت باجهز حملة اعلانية سلبية برعاية منافس قوى جدا لعز العرب و هاتبقى فى الجرائد و قصة كبيرة اوى بس الحمد لله مالزيا وعدونى انى لو حبيت ابيع العربية دى و اجيب موديل 2009 هايدونى دعم كبير جدا فى سعرها علشان اعوض جزء من خسارتى
و على فكرة انا لحد النهاردة بيطلعلى حاجات غريبة جدا فى عربيتى و التوكيل يعملها و ترجع تانى لان ده عيب صناعة من الاول يعنى العربية عايزة ترجع خط الانتاج يشوفوا مالها
و مع ذلك انا راضى حتى الان عن دعم التوكيل ليا كادارة و دعم مركز الخدمة فى الصيانة و العربية انا فعلا مبسوط من ادائها جدا و ده اللى بيخلينى ادافع عنها بالرغم من كل القرف و المشاكل اللى بتقابلنى فيها
مين قالك يا باشا بقى اننا موش بنغير فى التوكيل ده انا عايز اقولك ان فى انتقاد مستمر مننا كاعضاء بس الوكيل ماعندهوش حل العربيات اصلا بتطلع من المصنع كده و هم بيحاولوا بقدر الامكان يظبطوا الدنيا على قد ما يقدروا
و مع ذلك الوكيل بيساعدنا بقدر الامكان علشان كده تلاقينى بدافع عن انمهندس امر جدا لانه بيعمل حاجات موش بتاعته فى سبيل ارضاء العملاء
لو انت حابب تجيب العربية توكل على الله و 2009 هى الافضل و انا و ناس كتير هتلاقينا بنساعدك و هاتنبسط منها

لو قلقان منها عادى شوفلك اى عربية تانية تريحك و بعدين فى موضوع كان فيه اخ فاضل بيسال على البريليانس او النيو اكسنت او الجين انا رشحلته النيو اكسنت

انا موش باحب العربية حب اعمى بس بحاول اكون عقلانى فى حكمى على الامور

كل سنة و انت طيب و ياريت يكون قصدى وصلك و احب اشوفك فى المنتدى و قسم بروتون على طول منورنا كلنا سواء معاك جين2 او اى عربية تانية