مشكلة موتور فى البرسونا

[hemedah]

انا معايا برسونا 2009 طبعا ... مانيوال
عندى مشكلة من يوم ما اخدتها .. بس قلت استنى شوية
و انا ماشى على سرعة التانى .. تلاقيها بتكركر .. و فى الطلعة لو زودت عليها بنزين .. تكركر .. فيه ناس قالولى دى مشكلة بنزين .. بس انا بحط موبيل 92 و من كذا بنزينة .. التوكيل قالى ده بنزين برضو ..
حد يعرف الموضوع ده حله ايه ؟
و لو حد معاه برسونا مانيوال يقولى عنده المشكلة دى ولا لأ

[mazagnge]

بسيطة اقفل باب الحجة :

غير محطة البنزين و كمان نوع البنزين

حاول تخلص البنزين اللى فى العربية لغاية ما العربية تنور و روح مون من بنزينة كويسة زى امارات او وطنية و حط 92 او 95

و امشيها بيها بتاع 20 كيلو عشان تكون نظفت البنزين القديم بالكامل
و ان كركرت يبقي الشيشة دى تروح تتسلم للتوكيل و تثبت الكلام دة فى دفتر الصيانة .
و هما يكشفوا لك على الكهرباء و الوصلات .... و طمنا أخبارك اية

[tutankhamoun]

أنت بتغير على سرعة كام كل غيار ؟؟؟

المفروض أنها تكركر لو غيرت بدري علشان تصميم الموتور لعدد لفات عالي
يعني التاني مش أقل من 3000 لفة - دقيقة و دي بيقابلها تقريبا 25 كم - س

و ممكن يكون فعلا بنزين .... و ممكن تكون حاجة تانية ...... بس أتأكد من الحاجتين دول الأول و بعدين نتكلم في الحاجة التالتة

[tutankhamoun]

أحب أضيف
أن الغيار الوحيد اللي ممكن يكركر هو التاني فعلا لو غيرت بدري
أنا بيحصل معايا كدا من ساعة من أشتريت العربية ..... إنما بقية الغيارات مش مشكلة
بس الكركرة عندي تكاد تكون غير محسوسة ....فعايزين نتأكد من مُشكلتك و مُسببها إن شاء الله للوضول لحل

[AhmedGen2]

أحب أضيف
أن الغيار الوحيد اللي ممكن يكركر هو التاني فعلا لو غيرت بدري
أنا بيحصل معايا كدا من ساعة من أشتريت العربية ..... إنما بقية الغيارات مش مشكلة
بس الكركرة عندي تكاد تكون غير محسوسة

وانا كمان ....

[mazagnge]

يا عم توت في حكمة ميكانيكة مزجنجية بتقول :

ان سمعت كركرة يبقي وجب تغير الحجـــر

يا أما تكشف علية و تشوف الخروم حروف او الحروف خروم ... و عجبي
بس وجهه نظر و الله انت ممكن تكون بتنقل غيار السرعه بدرى قبل ما العربية تدي العزم بتاعها فتكركركركركركرك .... مساااااااااء الخير

[M.Nabil]

انا نفس الموضوع كان بيحصل معايا بس عرفت بعد كده اني بنقل الغيار بدري زي ما قال توت, بس لو نقلت بدري من الاول للتاني وحرقت سنة بنزين مش هتسمع الكركرة.
علشان كده انا بستني لما الاول ياخد سرعته وبعد كده انقل عالتاني.

[hemedah]

كل الكلام ده جميل ...بس فيه كذا مفاجاة
1 - غيرت البنزينات كلها ... نفس المشكلة
2 - حطيت بنزين 95 من ابو 2.75 جنيه ... نفس المشكلة
3 - اكتشفت ان ده بيحصل معايا برضو و انا طالع على الأول فى مطلع .. و حاولت ارجع بالذاكرة لورا شوية .. افتكرت ان تقريبا ده كان بيحصل من اسطوانة الدبرياج ... او الديسك بس المفروض مش فى الزيرو
دى آخر التطورات
عاوز اقتراحاتكو .. عشان هروح التوكيل يوم السبت اعمل مصيبة
يا قاتل .... يا مقتول
هو حد تقريبا قال ان عنده نفس المشكلة ... ممكن توضيح ؟

[khpopo]

انشاالله خير ...ياريت تطمنا لان بتهيالى الموضوع جديد
ربنا يوفق

[MuhammedSoliman]

كل الكلام ده جميل ...بس فيه كذا مفاجاة
1 - غيرت البنزينات كلها ... نفس المشكلة
2 - حطيت بنزين 95 من ابو 2.75 جنيه ... نفس المشكلة
3 - اكتشفت ان ده بيحصل معايا برضو و انا طالع على الأول فى مطلع .. و حاولت ارجع بالذاكرة لورا شوية .. افتكرت ان تقريبا ده كان بيحصل من اسطوانة الدبرياج ... او الديسك بس المفروض مش فى الزيرو
دى آخر التطورات
عاوز اقتراحاتكو .. عشان هروح التوكيل يوم السبت اعمل مصيبة
يا قاتل .... يا مقتول
هو حد تقريبا قال ان عنده نفس المشكلة ... ممكن توضيح ؟

بس الاسطوانة والديسك بتحس ان عدد لفات الموتور بتعله أعلى من المعدل الطبيعي والاسطوانه تزحلق استبعد هذا العيب [COLOR="rgb(255, 140, 0)"]واعتقد انها ضبط الموتور ويا رب يسترها معاك [/COLOR]

[yasserzezo]

اية اخر الاخبار يا باشا ياريت تطمني انا اصلي عاير اجيب برسونا و انتا كده خدتني

[fireshot]

إن شاء الله مفيش مشكلة...يمكن فكرة تعود بس..
انا معايا بيرسونا وكنت بحس بكدة برده لحاد مجربت الطلعة منغير مدوس بنزين خالص وبقت اسهل بنسبالي خصوصا في الزحمة و الاشارات
الكركرة في التاني دي انا محستهاش بصراحة
بس لو بتحصل معاك و انت طالع من مطب مثلا ..جرب تطلع علي الاول
جرب و ابقي طمنا

[ringoo84]

الحوار ده اسهلك التوكيل ومتمشيش الالما توصل لحل لو الموضوع موش بنزيين وربنا يطمنك..........

[OldVic]

بسيطة اقفل باب الحجة :

غير محطة البنزين و كمان نوع البنزين

حاول تخلص البنزين اللى فى العربية لغاية ما العربية تنور و روح مون من بنزينة كويسة زى امارات او وطنية و حط 92 او 95

و امشيها بيها بتاع 20 كيلو عشان تكون نظفت البنزين القديم بالكامل
و ان كركرت يبقي الشيشة دى تروح تتسلم للتوكيل و تثبت الكلام دة فى دفتر الصيانة .
و هما يكشفوا لك على الكهرباء و الوصلات .... و طمنا أخبارك اية

بالنسبة للبنزين لازم تشوف دليل المستخدم بيقول إيه؟ و سيبك من كلام التوكيل (ممكن الصانع يقول ان بنزين 95 مفروض و لكن التوكيل يقول ان 92 كافى فقط ليسستطيع بيع السيارة بكميات)