سيارتى لا تتعدى الـ 160 بسهولة

[Sout_Sout]

طلب بسيط
يا جماعة انا عربيتى كنت بجيب بيها 175 180 من شهر تقريباً
ولكن الأيام دى بتجيب 160 او 150 وال RPM مشش بيتحرك من مكانه
ولما اشيل رجلى وادوس تانى "بدون تشغيل الكيك داون" الrpm بينتقل لأعلى "يعنى المفروض ينعكس على السرعة وتزيد"ولكن يعلى شوية ويرد تانى وينزل وماتعديش ال 150 الا بعد الكيك داون
انا عربيتى عاملة 8900 كيلو
وبنظف الفلتر تقريباً مرة كل اسبوع او اسبوع ونصف
وبحط منظف رشاشات كل 2000 كيلو
وبستخدم بنزين 92
وهى اوتوماتك
2008
فا يا جماعة انا عايز عربيتى تجيب 200 او اكتر
لأن انا بسافر كتير
وهل لو انا حطيت بوجيهات splitfire و headers و air filter simota تأثر على الموتور تأثير سلبى؟
يا ريت يا جماعة اللى يعرف يفيدنى يقولى على حل لمشكلتى

[MohabSaeed]

الحقيقه انا مش حقدر افيدك فى المشكله
بس حابب احذرك من كثره استخدام منظف الرشاشات انا سمعت من اكتر من مصدر ان المنظفات و الاضافات ديه ليها تأثير سلبى جدا على عمر الرشاشات نفسها . يعنى ممكن تستخدمها مثلا مره كل 20,000 كيلو و ان كان ناس كتير برده اجمعت ان ملهاش تأثير !!
انا مش بفتى ولا حتى جربت قبل كده منظف الرشاشات انا بس بقولك لحضرتك الى سمعته من اكتر من مصدر و الله اعلم .

[Sout_Sout]

متشكر جداً على المعلومة دى يا باشا
كويس انك عرفتنى
انا كنت ناوى ازود الجرعات :d
بس برضه لو عندك حل لمشكلتى ابقى قلى

[ahm3d ham>ed]

شيك على الفلاتر والبوجيهات

ومعلش هى العربية نوعها اية؟

[Sout_Sout]

بروتون جين2

[r2tarek]

حاول تتاكد من الدواسات لان المشكله دى حصلت عندى لما بتضغط على دواسه البنزين مش بتوصل للاخر .

[tutankhamoun]

فيه يا جماعة فرق بين
منظف رشاشات .......... منظف دورة الوقود
الأول غير ضار
الثاني .......... لا يجب إستعماله على فترات متقاربة ... يعني زي ما الأستاذ مهاب قال
كل 20 ألف كم

إنما منظف الرشاشات مفيش منه مشكلة هو وظيفته تفتيح فونيات الرشاش و تنظيفها من أي تراكمات من البنزين المتسخ



أحذر السرعة ...... أرجع لأهلك سليم .... أنت غالي عند ناس كتير ... و أكيد فيه ناس مستنياك ترجعلهم قطعة واحدة
يجب أن نتعلم من الحوادث التي نراها يوميا على الطريق
أولا
طرق مصر غير آمنة
ثانيا
أكثر من 120 كم - س في طريق فاضي معقول
طبعا كل لما تقل عن كدا كل لما تدخل في دائرة أمان أكبر

ربنا يستر طريقك و طريقنا

[ahmad--ezzat]

استاذ توت
احنا عارفين موضوع ان السرعة خطر وان فى ناس عايزينو
حتة واحدة وكل دة
بس مش معنى كدة ان عربيتو تكون مخنوقة هو بيستفسر عن سبب عدم السحب
انا عن نفسى مش بفهم فى البروتون اوى عشان افيدو
وحضرتك بلا مبالغة عارف الجين حتة حتة

[tutankhamoun]

استاذ توت
احنا عارفين موضوع ان السرعة خطر وان فى ناس عايزينو
حتة واحدة وكل دة
بس مش معنى كدة ان عربيتو تكون مخنوقة هو بيستفسر عن سبب عدم السحب
انا عن نفسى مش بفهم فى البروتون اوى عشان افيدو
وحضرتك بلا مبالغة عارف الجين حتة حتة

شكرا جزيلا يا أستاذ أحمد على التعليق

هو كلمة حتة واحدة ضايقت الناس ؟؟؟؟؟
أنا بس بنصح لله عز و جل فقط لا غير و لا أريد لأحد إلا الخير

بالنسبة للعربية و مشكلة الخنقة
أولا الأستاس SOUT SOUT
قال أنه كان بيجيب بيها 180 و بعدين حاسس ان فيه حاجة في السرعة قللت من تجميع العربية للسرعة فوق 160
و الأخوة قبلي قالوا بعض الحلول
و كل اللي أنا هاعمله هاجمع كل اللي اتقال في عدة نقاط :

طبعا يغير البنزينة و يجرب
و يكشف على الدواسة و يشوف البدال جايب أخر و لا الدواسة حايشه أنه يجيب أخره
جرب حط خليط ما بين 95 مرة كدا و شوف هاتفرق معاك و لا لاءة
بس أعمل موضوع 95 بعد ما تجرب الحلين الأولانيين

و ربنا يستر طريقك

[ahmedsiyam]

الحل الامثل انك تروح التوكيل

انا عربيتى مابتعديش دلوقتى الـ 160 و انا بصراحة موش مهتم تعدى و لا لأ لانى ماحتاجتش السرعة دى فى حاجة

جرب انك تنظف فلتر البنزين و البوجيهات

[alfa]

وانا بردو عربيتي مابتعديش 160 وحاولت اكتر من مرة اني جيب فيها 170 او اكثر ومافيش نتيجة
بس انا براي السبب هو بكمبيوتر العربية , يعني في كتير انواع من العربيات بتكون الشركة المصنعة قفلة العداد لحد معين .

[zarkoor]

مجرد تنضيف فلتر الهوا لا يعنى انه رجع جديد ... جرب غير فلتر الهوا بواحد جديد (طبعا لو KN يبقى فى الجون)

اتاكد ان الكاوتش منفوخ زى الضغط اللى مكتوب فى الكاتالوج و تنفخ الكاوتش وهو بارد يعنى ما تكنش مشيت اكتر من 2 او 3 كيلو ...

موضوع انك تجيب 200 ك/س دى محتاجه واحده واحده تجرب الاتى علشان كل حاجه بمبلغ و اللى ينفع مع عربيه مش شرط حينجح مع نوع تانى

1- شيل علبه البيئه بس ما اعرفش يمكن ال engine check تنور عندك ف اسال حد يكون عملها
2- جرب انك تنزل فى ال heat range بتاع البوجيهات ... لو العربيه برجلت ارجع تانى لل range الاصلى بس غيره ب iridium او split fire ... برضه الله اعلم الفرق حيكون محسوس ام لا

لو اللى فوق ما نفعش ... هات استكر و اكتب عليه 240 و الزقه على العداد

اهم حاجه ان العربيه تساعدك فى الجرى و تستحمل السرعة علشان السرعة من غير ثبات مالهاش لزمه

ربنا يسلم طريقك

[Busquets]

لو اللى فوق ما نفعش ... هات استكر و اكتب عليه 240 و الزقه على العداد

اهم حاجه ان العربيه تساعدك فى الجرى و تستحمل السرعة علشان السرعة من غير ثبات مالهاش لزمه

ربنا يسلم طريقك

ههههههههههه


عجبتنى اوى حكاية الاستكر دى

[Sout_Sout]

هههههههههههههههههههههههههههه
حلوة الاستيكر ده
بفكر اروح لأمير و جوزيف لأن دول ليهم خبرة فى ecu
وكمان توكيل معتمد للبروتون
لأن واحد قالى ممكن يكون فى حاجة فى الكمبيوتر مش مخليه يظبط نقلة الاوتوماتك صح

[m_marmoush]

جرب 92 من أمارات مصر و أطلع جرب فى طريق العين السخنه.
خلي بالك الطريق معظمه مطالع فلو جابت معاك 140 يبقى حتجيب معاك 180 فى العادى أن شاء الله

(متنساش تقرى الفاتحه والشهادتين و أنت بتجرب)