و بدأ مسلسل المتاعب فى بروتون بيرسونا - يارب يكون من حلقة واحدة

[hadota_masreya]

السلام عليكم
من 3 ايام كده كنت ماشى على الدائرى - بعد نادى الصيد الجديد كده و كنت ماشى على 120 و معايا 3 أفراد زمايلى فى الشغل - و كنت واخد أقصى اليمين , و بعدين اتفاجأت ان فى الارض مطب مرتفع عن الارض - مش مطب صناعى طبعا لكن كان تقؤيبا مجموعة من التراب و الطوب و اختلطوا بالمياه و نشفت و عملت مطب

المهم اخدت المطب ده و حسيت ان العربية عامت منى سنه و اتهبدت - بس انا مضربتش فرامل خالص و فضلت على سرعتى - و بعدين ابتديت اهدى حبه حبه
المهم العربية مشيت معايا عادى و تمام و الحمد لله و بعدين انا بنزل فى حته زحمه (منزل الطالبية)
لما مشيت براحه حسيت ان العربية بتحدف - بس مش بتحد و انا ماسك الدركسيون لا
بحس ان الدركسيون بيميل شمال لوحده اعدله على العادى و الاقيه بيرمى لوحه شمال - و طول مانا عادل الدريكسيون العربية ماشية عادى لكن مجرد ماسيب الدريكسيون الاقيه لوحده بيرمى شمال

قست ضغط الهوا فى الاطارات و لقيته مظبوط
قولت اخش على البنزينه و اعمل ظبط زوايا - رحت لقيته بيقولى العربية مظبوطه و فيها درجة واحده بس - و المشكله دى ممكن تكون من الباور

المهم قالى انه ظبطها - و كله تمام بعد مامشيت اكتشفت انه عكها زياده - العربية بقت بتحدف و انا عادل الدريكسيون لقتها بتحدف حدفة خفيفة شمال - مع الاعتبار لاستمرار نفس العيب بتاع ميل الدريكسيون

أفيدونا - افادكم الله

[blazer]

روح التوكيل فى اقرب وقت

[Ahmed Selim]

غالباً مشكلة زوايا.......و أعتقد أنى عارف المطب اللى أنت بتتكلم عليه عشان بعدى كل يوم من هناك.....

روح لحد بتاع زوايا كويس.....و أنصحك بالتوكيل أو بريدجستون.

أن شاء الله خير ومتنساش تطمنا عملت أيه

[ahmad alshaaer]

لو العربيه مافيهاش غربله على سرعات وبتزيد مع السرعات ولا طقطقه في ملفات
يبقى زوايا
عن ثقه

[eng.octooo]

شوف الزاوايا فى مكان محترم زى بريدجستون او التوكيل وبنا معاك

[hadota_masreya]

ألف شكر جميعا على الرد و ان شاء الله هاروح لبريدجستون فى اقرب وقت لان مشوار التوكيل هايبقى فيها يوم اجازه و ده مش متاح دلوقت

و ان شاء الله اطمنكم و أطمن معاكم

[MohabSaeed]

لو عرفت حل للموضوع ده " ارجوك " بلغنى لان عندى نفس العيب
و كان الاجماع " المصرى " من التوكيل و ورش الزوايا
1- العربيه زى الفل يا باشا و طبيعى بتميل مع الطريق
2- هى علبة الدركسيون تصميمها كده يابيه

و كان الاجماع " الماليزى " من على المنتديات
1- تغير خراطيم الباور .
2- تغير ال steering bush .
3- تغير بطاحات المساعدين

" طبعا ان شاء الله مافيش حاجه من الى انا كاتبها تكون هى السبب .. و تطلع حاجه بسيطه , انا بس بقولك على الى سمعته . و حتى معملتوش " .

فى الاخر كبرت دماغى روحت ظبط زوايا عند بريدجستون مدينه نصر و الزوايا اتظبطت بنسبه كبيره الحمد لله . لكن موضوع ميلان الدركسيون متحلش . و انا اتأقلمت عليه .

* عموما ممكن نبدأ بالسهل و نكشف على الزوايا فى مكان كويس

* نصيحة بلاش تظبط زوايا فى التوكيل
1- بيتأخرو جدا جدا على شان يدخلوها الورشه " يعنى حتروحلهم الساعه 8 او 9 : حتستلم العربيه على الاقل الساعه 2 " .
2- مستحيل تحت اى ظرف يظبطو الزوايا من اول او من تانى او حتى من تالت مره و لازم يطلعو الطاره معوجه .

* الحل الافضل
روح مركز بريدجستون هو الجهاز الى عندهم الحقيقه اقدم من الى فى التوكيل , لكن فاهمين شغلهم و بيظبطو العربيه عن التوكيل "" عن تجربه هنا و هنا فى الزوايا "" .

* رجاءاً لو توصلت لحل تقولى ايه السبب :-) مع ان ممكن طبعا يكون العيب مختلف .

ان شاء الله تطلع المشكله بسيطه و تتحل .

[hadota_masreya]

ان شاء الله ابلغك باخر التطورات يا استاذ محب

[ahmad alshaaer]

عنوان بريد جيستون ايه ياجماعه ومواعيده
عشان عاوز فعلا اظبط زوايا بره التوكيل
وشكرااااا

[Ahmed Selim]

الفرعين اللى عارفهم
1- عمارات العبور فى صلاح سالم
2- بنزينة كالتكس عباس العقاد
وفلى فرعين تانى فى الدقى والمنيل على حد علمى
مواعيدهم من 10 ص الى 10 م

[hadota_masreya]

اللى اعرفه انه فى المنيل أمام ماكدونالدز - شارع المنيل
و ده بحكم انى قريب منه و فعلا فى كمان فى بنزينه كالتكس عباس العقاد

[ahmed_h_g]

نصيحه منى ..... بدل الجنوط الأمامى بالخلفى وجرب