مدى اعتمادية توكيل البروتون فى التصليح

[badry]

السلام عليكم ايها الأعزاء....

الحقيقة انا بقالى فترة بدرس السوق علشان عايز اجيب عربية...و ظهر لى من الأطلاع على منتداكم الكريم ان Gen2 و Persona ماشاء الله عليهم حاجة جميلة جدا و ممتازين...

سؤالى هنا واضح و محدد...و هو مدى اعتمادية توكيل بروتون فى مصر فى التصليح...يعنى التوكيل يسعفك ولا لأ؟؟؟ فى حالات الحوادث و عيوب الصناعة و هكذا...

لأن انا على سبيل المثال فى حالات الحوادث و نتيجة لظروف عملى و ظروفى العائلية لا استطيع قبول مستوى خدمة تصليح غير جيدة...و موضوع تأخير قطع الغيار و عدم توافرها ده بالنسبة لى ممكن يكون قاتل!!!

يعنى مثلا تجربة مثل هذه لا أحب ابدا ان امر بها: http://www.nilemotors.net/Nile/showp...3&postcount=28
و طبعا ربنا يعين صاحبها...

و لذلك ارجو الأفادة من مالكى بروتون و بخاصة من اختبروا التوكيل فى هذه الجزئية...و برجاء الأجابة على الأستطلاع للتقييم...
و رجاء خذوا فى اعتباركم الأتى: جودة التصليح..سرعة التصليح..توافر قطع الغيار..

انا لم اشير الى تكلفة التصليح لانها مرتفعة فى كل التوكيلات...

و جزاكم الله كل خير....

[husseinodeba]

لما التوكيل تكون قطع تاغيار فيه غير متوفره ولو موجوده تكون اسعار مجنونه
ولما تروح التوكيل وعربيتك سليمه وتخرج وعربيتك فرامل يدها مكسوره
يبقى المفروض ان يكون غير معتمد بالمره

[momenhamdy]

بصرااااااااااااااااااااااحة و بكل صراحة اعتمادي و 10/10
و دا عن تجربة كانت العربية عندي عاملة حادثة رجعت زي الجديدة بجد عندهم احتراف في الشغل
ولكن في جنون في اسعار قطع الغيار
و الكلام دا عن تجربة من خلال عز العرب الاسكندرية
و اي استفسار انا تحت امركوا

[badry]

لما التوكيل تكون قطع تاغيار فيه غير متوفره ولو موجوده تكون اسعار مجنونه
ولما تروح التوكيل وعربيتك سليمه وتخرج وعربيتك فرامل يدها مكسوره
يبقى المفروض ان يكون غير معتمد بالمره

شكرا لردك الكريم يا أستاذ حسين...و وجهة نظر معتبرة طبعا....

يا ترى فرامل اليد التوكيل تحمل تصليحها؟؟؟و هل كانت متوافرة؟؟

و اذا كنت ترى انه غير اعتمادى...فمن فضلك ان تسجل اجابتك فى استطلاع الموضوع...

شكرا لأهتمامك...

[badry]

بصرااااااااااااااااااااااحة و بكل صراحة اعتمادي و 10/10
و دا عن تجربة كانت العربية عندي عاملة حادثة رجعت زي الجديدة بجد عندهم احتراف في الشغل
ولكن في جنون في اسعار قطع الغيار
و الكلام دا عن تجربة من خلال عز العرب الاسكندرية
و اي استفسار انا تحت امركوا

شكرا استاذ مؤمن على المشاركة...و ماشاء الله واضح ان ليك مع التوكيل تجربة ايجابية..

طيب ممكن تقولنا قطع الغيار كانت متوافرة ولا اتأخرت؟؟؟ و ما هى قطع الغيار الأساسية اللى كان التصليح محتاجها؟؟؟

و اذكرك بالأستطلاع ان لم تكن فعلت....

[badry]

شباب البروتون.......فى انتظار مشاركاتكم.....

نفسى ارسى على حل................

[husseinodeba]

بالطبع ياستاذ بدرى فرامل اليد ماكنتش متوفره
وده كان سبب استيائى وكمان لما سلمونى العربيه منبهنيش ان فيه مشكله ظهرت فى فرامل اليد وانا اللى اكتشفت المشكله بعد خروجى من البوابه مباشرتا
بس كل ده ميمنعش ان العربيه ممتاذه وتستاهل الواحد يستحمل التوكيل ومشاكله

[momenhamdy]

شكرا استاذ مؤمن على المشاركة...و ماشاء الله واضح ان ليك مع التوكيل تجربة ايجابية..

طيب ممكن تقولنا قطع الغيار كانت متوافرة ولا اتأخرت؟؟؟ و ما هى قطع الغيار الأساسية اللى كان التصليح محتاجها؟؟؟

و اذكرك بالأستطلاع ان لم تكن فعلت....

و الله حضرتك قطع الغيار جت بعد حوالي 6 ايام بس كانت حاجات من العيار التقيل شوية بمعني
1-كبوت
2-شنطة خلفية بالكامل ( الباب )
3-الاكصدام الامامي و الشاسيه بتاعه
4-الاكصدام الخلفي و الشاسيه بتاعه
5-الحليه النيكل الي خاصه بالكبوت
6-ظهر شنطة ( الي من الداخل الي بيبقي فيه الجزئيه الجلد بتاعه شد الباب منها )

وطبعاً دا غير المصنعيات بس العربية قعدت عندهم حوالي شهر ...لان كان في سمكرة و دهانات بس بصراحة العربية طلعت من تحت اديهم بسم الله ما شاء الله 10/10
بس زي ما قولت لحضرتك قطع الغيار سعرها مبالغ فيها ...
واي استفسار انا تحت امرك

[badry]

و الله حضرتك قطع الغيار جت بعد حوالي 6 ايام بس كانت حاجات من العيار التقيل شوية بمعني
1-كبوت
2-شنطة خلفية بالكامل ( الباب )
3-الاكصدام الامامي و الشاسيه بتاعه
4-الاكصدام الخلفي و الشاسيه بتاعه
5-الحليه النيكل الي خاصه بالكبوت
6-ظهر شنطة ( الي من الداخل الي بيبقي فيه الجزئيه الجلد بتاعه شد الباب منها )

وطبعاً دا غير المصنعيات بس العربية قعدت عندهم حوالي شهر ...لان كان في سمكرة و دهانات بس بصراحة العربية طلعت من تحت اديهم بسم الله ما شاء الله 10/10
بس زي ما قولت لحضرتك قطع الغيار سعرها مبالغ فيها ...
واي استفسار انا تحت امرك

شكرا يا استاذى على افادتك لينا....
و ربنا يباركلك فى العربية و يمنع عنها اى تلف باذن الله...
معلش ربنا يعوضك عن كل التكاليف دى...شكلها كانت حادثة جامدة...حمدلله على سلامتك...

[momenhamdy]

شكرا يا استاذى على افادتك لينا....
و ربنا يباركلك فى العربية و يمنع عنها اى تلف باذن الله...
معلش ربنا يعوضك عن كل التكاليف دى...شكلها كانت حادثة جامدة...حمدلله على سلامتك...

الـــــــــحـــــــــــمـــــــد لله علي كل حال

[badry]

يا مروضى الأسد الماليزى......
محتاجين مشاركات اكتر علشان نقدر نحدد اعتمادية التوكيل....

الا اذا مفيش حد تانى صلح حاجة فى التوكيل قبل كدة...اللهم لا حسد طبعا...

[badry]

عايز اشكر كل من شارك او صوت فى هذا الموضوع من مالكى البروتون...

و عموما الصورة بدأت تتضح......و فى انتظار مزيد من المشاركات...

[badry]

كقراءة للنتائج حتى الأن....

اكتر من 80% من الأصوات شايفة اعتمادية التوكيل فى التصليح اقل من 80%...

اكتر من 40% من الأصوات شايفة اعتمادية التوكيل فى التصليح اقل من 50%....

يا خسارة يا توكيل....

[tutankhamoun]

السلام عليكم يا أستاذ بدري
بص يا باشا
التوكيل في الوقت الحالي هو متوسط فقط في التصليح يعني مش ممتاز
و أعتقد أن أغلب توكيلات مصر كدا
بالنسبة لي ....... تجربتي معاهم مفيهاش مشكلة خالص و الحمد لله
إنما أنا بتكلم عن متوسط الشكاوى و احساسي بالتوكيل لما بروح هناك.
هما مشكلتهم الأساسية هي الزحام
علشان كدا فيه شوية تطورات هاتحصل قريب إن شاء الله هناك
زي
المفروض أن سيتم اضافة عدد 6 روافع للخدمة السريعة علشان الناس اللي معندهاش مشاكل و اللي جاي يغير زيت أو يربط عفشة و الكلام ده
و فيه كمان مركز التصليح الجديد خلف القرية الذكية و ده هايكون أفضل من القديم مع استمرار و تطوير القديم .

فيه طبعا تطوراات كثيرة هاتحصل ........ و إن شاء الله هاتحصل ( إنما امتى ؟؟؟؟ ) دي في علم الله
كلام الناس في التوكيل على نص 2009 .........
بروتون نفسها بتضغط على عز لتحسين الخدمة و بناء المراكز الجديدة و هما مهتمين قوي بمصر علشان مصر بالنسبة لبروتون سوق قوي و من أقوى أسواقها في العالم مع السوق الانجليزي من ناحية عدد السياات المباعة ده طبعا بخلاف ماليزيا نفسها اللي هي فيها أكبر مبيعات للشركة و معاهم تايلاند على ما أعتقد .

لو العربية عاجباك ........ العربية تستاهل و ممتازة و التوكيل مش وحش و التطورات جاية إن شاء الله
أنزل التوكيل و جرب و أسأل بنفسك و شوف بعينك ( أنزل فرع الصحراوي )
و ربنا يوفقك للأفضل

[badry]

السلام عليكم يا أستاذ بدري
بص يا باشا
التوكيل في الوقت الحالي هو متوسط فقط في التصليح يعني مش ممتاز
و أعتقد أن أغلب توكيلات مصر كدا
بالنسبة لي ....... تجربتي معاهم مفيهاش مشكلة خالص و الحمد لله
إنما أنا بتكلم عن متوسط الشكاوى و احساسي بالتوكيل لما بروح هناك.
هما مشكلتهم الأساسية هي الزحام
علشان كدا فيه شوية تطورات هاتحصل قريب إن شاء الله هناك
زي
المفروض أن سيتم اضافة عدد 6 روافع للخدمة السريعة علشان الناس اللي معندهاش مشاكل و اللي جاي يغير زيت أو يربط عفشة و الكلام ده
و فيه كمان مركز التصليح الجديد خلف القرية الذكية و ده هايكون أفضل من القديم مع استمرار و تطوير القديم .

فيه طبعا تطوراات كثيرة هاتحصل ........ و إن شاء الله هاتحصل ( إنما امتى ؟؟؟؟ ) دي في علم الله
كلام الناس في التوكيل على نص 2009 .........
بروتون نفسها بتضغط على عز لتحسين الخدمة و بناء المراكز الجديدة و هما مهتمين قوي بمصر علشان مصر بالنسبة لبروتون سوق قوي و من أقوى أسواقها في العالم مع السوق الانجليزي من ناحية عدد السياات المباعة ده طبعا بخلاف ماليزيا نفسها اللي هي فيها أكبر مبيعات للشركة و معاهم تايلاند على ما أعتقد .

لو العربية عاجباك ........ العربية تستاهل و ممتازة و التوكيل مش وحش و التطورات جاية إن شاء الله
أنزل التوكيل و جرب و أسأل بنفسك و شوف بعينك ( أنزل فرع الصحراوي )
و ربنا يوفقك للأفضل

و عليكم السلام يا أستاذ توت

أنا قلت برضه أكيد أستاذ توت مش هيبخل علينا برأيه الجميل

ربنا يباركلك فعربيتك و يجزيك كل خير عن مساعدتك لي و لغيري من أعضاء المنتدى