اسكندرية بتعوم العربية

[hadota_masreya]

سلام عليكم يا جماعه
انا عندى مأمورية فى اسكندرية و قاعد هناك فترة. المهم انا من ساعة ماجيت اسكندرية و حاسس بحاجه غريبه مش عارف ايه سببها.
أنا قاعد فى العجمى و الشغل عند مكتبة اسكندرية فباخد الطريق الجديد اللى بيودينى لكوبرى محرم بك - مش عارف بصراحه اسم الطريق ده ايه المهم الطريق ده ماشاء الله حلو و ستيبل بس المشكله انى بحس بان العربية بتعوم منى و انا ماشى. العربية بتبقى معايا ستيبل لغاية 120 لكن انا اوقات بوصل لـ 150 أو 160 و فى الوقت ده بحس بان العربية بتتمرجح منى خفيف - انا ماقدرش اقول انها بتتمرجد جامد او بتعوم جامد - لكن برضه مش بحس انها ثابته زي الاول - و انا لاحظت برضه نفس الموضوع ده حصل معايا من اسبوع على الكورنيش - بس يومها كان فى هواء شديد و بعدها قلب بمطر بس التعويمه دى ماكانش فى مياه على الارض لكن الهوا كان شديد
مش عارف بصراحه المشكله دى هل من قوة الهواء و لا العربية فيها حاجه و ممكن تكون ايهز لكن بصراحه انا مش مبسوط من اللى بيحصل ده
انا المفروض رايح صيانة ال، 5000 و ناوى اقولهم على المشكله دى لكن عايز اعرف من اهل الخبره المشكله دى ممكن تكون فى ايه - هلى العفشة - هل ظبط زوايا - هل قوة دفع الهواء
اللى عنده فكره ياريت يفيدنى و ألف شكر
سلام عليكم

[Fadi Ezzat]

اولا البروتون من السيارات الاستابل جدا بس الخفيفة جدا واكيد 100 فى المية الهوا هو الى كان بيعمل كدة

[ahmedsiyam]

اعتقد ان السبب الهواء

وبعدين الصراحة 150 كلم على الكورنيش ده كتير اوى - ربنا يستر طريقك

[ahmad alshaaer]

حبيبي
عن خبره طويله جدا وتجارب
في المناطق الساحليه بيكون بخار الماء الناتج عن تبخر الماء من البحر بيعمل على الاسفلت زي نعومه تسبب في تعويم السياره ولكن انت مش هتشوفه على الاسفلت
واثبتلك كلامي انك سيب العربيه شويه مركونه هتلاقي الزجاج كده وكأنه مغبش
وبردوا قوللهم عليها في صيانة ال 5000
وطالما انك مش بتسمع صوت خبط في السياره مع المطبات
وطالما انك متأكد من ظبط الزوايا
يبقى العربيه مافيهاش حاجه ان شاء الله
واحب كمان اذكر ان الاسفلت لو فيه ميل خفيف يوحي بتعويم لسياره
اتمنى اكون وصلتلك كل الاحتمالات

[tutankhamoun]

اولا البروتون من السيارات الاستابل جدا بس الخفيفة جدا واكيد 100 فى المية الهوا هو الى كان بيعمل كدة

خفيفة ؟؟؟؟؟؟؟؟؟؟؟؟؟؟

الجين 2 عاملة 1230 كجم و تقولي خفيفة
الواجا عاملة 1250 كجم و تقولي خفيفة

دي الأوكتافيا بتاعة حضرتك .... 1270 كجم

طيب نقول أيه بقى على الفيرنا و الياريس كل منهم بيوزن 1050 كجم

-------------------------------------

نرجع لصاحب الموضوع ( حدوتة مصرية )
متقلقش يا أستاذ حدوتة .... زي ما الأستاذ أحمد الشاعر قال هو بخار المياة على الأسفلت و أحنا الكاوتش اللي بينزل مصر مخصوص للحرارة العالية و مش للطرق الزلقة قوي .

و بعدين 150 في وسط البلد ؟؟؟؟؟؟؟؟؟؟؟؟؟؟؟
معلش ده كتير قوي قوي قوي و أزيد من السرعة القانونية ب 90 كم زيادة لأن السرعة القانونية 60 كم - س

يا سلام لو الناس تلتزم بيها ......... مش هانلاقي حد بيموت بسبب حوادث
ربنا يستر طريقك و طريقنا و أنا رأيي لما ترجع القاهرة جربها على طريق جاف قبل ما تروح التوكيل
و لو مفيش حاجة .......... يبقى ما تقلقش و متجيبش سيرة الموضوع في التوكيل و تفتح فاتحة ملهاش لزمة على نفسك

[husseinodeba]

اكيد العيب فى الاسكندريه

اولا لو العربيه فيها مشكله كانت ظهرت على الصحراوى وانت رايح

والمضوع مش هيكون موضوع هواء لان انا سافرت بالعربيه وكانت فيه عاصفه رمليه على الطريق ولاحسيت بيها

جرب العربيه وانت راجع.. او على اى طريق بره اسكندريه وياريت يكون صحراوى واوعى الادار :k4:
تحياتى لكل اهل اسكندريه

[hadota_masreya]

شكرا يا جماعه على الردود و عايو بس اقول للى بيهاجمنى انى مشيت 150 على الكورنيش - انا مامشيتش 150 على الكورنيش انا كنت ماشى تقريبا 110 او 120 و كنت بحرى بس علشان اججرب - لكن 150 دى وصلتلها على الطريق السريع اللى بين العجمى و اسكندرية - اللى هو فيه الموقف الجديد.
عامة انا فعلا مش بحب اجرى جوة المناطق السكنية لانى للاسف كان ليا تجربة مريرة فى الموضوع ده و الحمد لله عدت - لكن انا طبيعة حري دايما على الطرق السريعه مش اكتر
ثانيا احب اشكر كل الناس اللى ردوا عليا و علشان موضوع البخار ده انا بس فى نقطه انا أول ماجيت اسكندرية ماحسيتش بالموضوع ده و بعدين و انا حتى جاي المره دى على الصحراوى حسيت برضه ان العربية مش مظبوطه و حسيت كأن العربية بتروح و تيجى بس مارضيتش ااكد على نفسى الموضوع لكن لما حسيته فى اسكندرية قولت لازم اسألكوا.
على العموم انا نازل دلوقت رايح التوكيل باذن الله علشان اعمل صيانة الـ 5000 اللى اتأخرت عليها و هاقولهم على المشكله دى و ربنا يحلها من عنده

سلام عليكم و شكرا جزيلا و انتظرونى ان شاء الله

[Ahmed Selim]

شوف ضغط الهواء فى الأطارات أو الزوايا.........ده غير حقيقة وجود بخار متكون على الأسفلت اللى قالهالك توييتى

[ameen_ra]

سلام عليكم يا جماعه
انا عندى مأمورية فى اسكندرية و قاعد هناك فترة. المهم انا من ساعة ماجيت اسكندرية و حاسس بحاجه غريبه مش عارف ايه سببها.
أنا قاعد فى العجمى و الشغل عند مكتبة اسكندرية فباخد الطريق الجديد اللى بيودينى لكوبرى محرم بك - مش عارف بصراحه اسم الطريق ده ايه المهم الطريق ده ماشاء الله حلو و ستيبل بس المشكله انى بحس بان العربية بتعوم منى و انا ماشى. العربية بتبقى معايا ستيبل لغاية 120 لكن انا اوقات بوصل لـ 150 أو 160 و فى الوقت ده بحس بان العربية بتتمرجح منى خفيف - انا ماقدرش اقول انها بتتمرجد جامد او بتعوم جامد - لكن برضه مش بحس انها ثابته زي الاول - و انا لاحظت برضه نفس الموضوع ده حصل معايا من اسبوع على الكورنيش - بس يومها كان فى هواء شديد و بعدها قلب بمطر بس التعويمه دى ماكانش فى مياه على الارض لكن الهوا كان شديد
مش عارف بصراحه المشكله دى هل من قوة الهواء و لا العربية فيها حاجه و ممكن تكون ايهز لكن بصراحه انا مش مبسوط من اللى بيحصل ده
انا المفروض رايح صيانة ال، 5000 و ناوى اقولهم على المشكله دى لكن عايز اعرف من اهل الخبره المشكله دى ممكن تكون فى ايه - هلى العفشة - هل ظبط زوايا - هل قوة دفع الهواء
اللى عنده فكره ياريت يفيدنى و ألف شكر
سلام عليكم

اولا انت نورت اسكندريه واهلا ومرحبا
الطريق الوصل لكوبري محرم بك اسمه شارع قناه السويس وحصل معاك نفس الشيء علي الكورنيش....شيء طبيعي
الاسكندريه...قناه السويس...الكورنيش... كل الجمال ده ومش عايز العربيه تعوممممممممممممم.....ربما يكون العيب في المايوه

[densfog]

انا بيتهيألى ان الأستاذ حدوته يقصد طريق محور التعمير وده سرعته 90كم على حسب علمى مش 60كم

[saidbakr]

خفيفة ؟؟؟؟؟؟؟؟؟؟؟؟؟؟

...
و بعدين 150 في وسط البلد ؟؟؟؟؟؟؟؟؟؟؟؟؟؟؟
معلش ده كتير قوي قوي قوي و أزيد من السرعة القانونية ب 90 كم زيادة لأن السرعة القانونية 60 كم - س

يا سلام لو الناس تلتزم بيها ......... مش هانلاقي حد بيموت بسبب حوادث
...

و لو يا باشا برضو هتلاقي ناس تموت بسبب حوادث، يا باشا دي مسألة أعمار و قضاء، و حتى لو الناس مشية راكبة حمير و عربيات كارو. هل حضرتك تعرف ان جوز مدام كوري بتاعت اليورانيوم و الذرة مات نتيجة حادثة عربية كارو داست عليه؟!!!

بس ده برضوا ما ينفيش ان في التأني السلامة و السرعة الزيادة غلط.

[tutankhamoun]

و لو يا باشا برضو هتلاقي ناس تموت بسبب حوادث، يا باشا دي مسألة أعمار و قضاء، و حتى لو الناس مشية راكبة حمير و عربيات كارو. هل حضرتك تعرف ان جوز مدام كوري بتاعت اليورانيوم و الذرة مات نتيجة حادثة عربية كارو داست عليه؟!!!

بس ده برضوا ما ينفيش ان في التأني السلامة و السرعة الزيادة غلط.

محدش أعترض على موضوع أن الاعمار بيد الله عز و جل فقط .
إنما نسبة الحوادث في مصر من أكبر النسب في العالم بسبب حوادث السيارات
و في أوروبا من أقل نسب الحوادث

علشان الأخذ بالأسباب ( سرعات معقولة لكل طريق و تطبيق القانون بيد من حديد )
إنما أحنا هنا اللي عايز يجيب 150 بيجري و يجيب 150 و اللي عايز يمشي على الشمال على 30 بيمشي على الشمال
عادي


أنا أخد بالأسباب اللي خلقها الله عز و جل ... و أتكل على الله ... و بعدين اللي يحصل بعد كدا يبقى ارادة الاهية لا يمكن اعتراضها .

[saidbakr]

محدش أعترض على موضوع أن الاعمار بيد الله عز و جل فقط .
إنما نسبة الحوادث في مصر من أكبر النسب في العالم بسبب حوادث السيارات
و في أوروبا من أقل نسب الحوادث

...

انا متفق مع كل كلام حضرتك، و لكني أعتقد ان فيه سبب مهم و جايز يكون هو الأهم ،لارتفاع معدلات حوادث السيارات و المخاطر المترتبة عليها في مصر، و السبب ده حضرتك جايز تكون نسيت تقوله. ببساطة السبب يتلخص في سوء و تدني مستوى الطرق في مصر سواءا من حيث التصميم او وسائل الأمن و الإرشاد او حتى حالة الطريق نفسها و الاجراءات العشوائية اللي بتحصل على الطرق زي المطبات اللي من غير رابط و لا ضابط او اي مكان توقف فيه لجنة مرور او اي حاجة تانية.
كل دي عوامل اساسية في معادلة الهلاك على الطرق، و احنا ما قولناش رخص القيادة الوهمية و اللي في حالات كتير يكون اللي شايلها و علاقته بالقيادة موش اكتر من انه بيعرف يشغل العربية.

إختصاراً، القسم الأكبر من هذه المشكلة ما نقدرشي نحمله الى حد إلا الحكومة بس هي اللي مسئولة عليه من خلال الاهمال و التسيب و الفساد اللي هو الارض الخصبة لنمو المشاكل اللي قلناها قبل كدة و اللي بدورها بتأدي إلى حوادث مهلكة و كتيرة على الطرق المصرية.

[M.almaghraby]

ربما يكون العيب في المايوه

hhhhhhhhhhh

ضحكت بجد

[khela_7000]

الأسكندرية ترحب بالزوار
المهم الطريق الجديد الي بتئول عليه ده اسمه المحور مش قناة السويس اللأخ امين و ده طريق سريع مش جوا البلد عشان هو جى من العجمى
ده أولا -ثانيا سواقت اسكندريه تختلف عن سواقت القاهرة و بالذات فى الوقت الى انت بتجري فية ده ساعت الصبحية عشان الندا و رذاذ الحو والملاحات الى انت كنت ماشى بينها لو لاحظت انك و انت راجع من المكتبة مروح ساعت العصرية كدة الوضع اختاف و مش حتلاقى العومة الخفيفة الى بتقول عليها انا واخد الريق دة فى الصيف و على 170 و مفيش العومة دى فأرجو من الجميع يخليباله على نفسه فى الاسكندريه...
بس كفاية كدة عايا عشان بئالى ربع ساعة بحاول اكتب الكلمتين دول بالعربى :)