تقرير صيانة الـ 5000 لعربيتى البيرسونا هاي لاين

[hadota_masreya]

يا جماعه انا رحت النهارده التوكيل علشان اريح دماغى من موضوع الزوايا و الحدفة دى اللى كنت اتكلمت عنه فى الموضوع ده (اسكندرية بتعوم العربية ) بس حد يتوقع ان عز يريح حد !!!!!!
انا رحت التوكيل فى الطريق الزراعى (اسكندريه) علشان اعمل صيانة الـ 5000 و فى نفس الوقت اشوف المشاكل اللى عندى دى.
الساعه 9 و نص صباحا كنت داخل التوكيل و ركنت العربية عند الورشة و نزلت و قابلت المهندس المحترم محمد صلاح.
صباح الخير يا بشمهندس صباح النور - عندى يا بشمهندس صيانة الـ 5000 و عندى كده كام ملاحظة عايزهم يتاخدوا فى عين الاعتبار.
المهم قولتله دلوقت يا بشمهندس العربية وانا ماشى على الطريق بحس كأنها بتحدف منى حدفة خفيفه كده و ترد - العربية و كأنها بتعوم بس على السرعات العالية
ثانيا و انا جاي فى الصحراوى من القاهرة كنت لازم دايما اميل الدريكسيون درجة او اتنين يمين طول الطريق تقريبا و لما بعدل الدريكسيون على الصح بتاعه بلاقيها بتحدف على الجزيره بس برضه بالراحه.
ثالثا فى صوت تكتكه بسمعه من العربية من قدام و ده دايما بسمعه الصبح كده اول مادور و بعدين بيروح مع الوقت بعد ماتحرك بشويه بالعربية

دى كانت ملاحظاتى و بعدي قالى احنا هانشوف اللازم و اتفضل حضرتك فى الاستراحه و اول مانخلص هانرجعلك

المهم بعدها بساعه الا ربع كده زهقت و قولت اخرج اشوف الدنيا فيها ايه مالقتش العربية فى الورشة قولت خير يمكن بيجربها - رحت لقيت العربية موجوده امام مكان الغسيل - رحت لعامل الغسيل و سألته هى العربية خلصت - قالى طالما جت عندى تبقى خلصت.
المهم رحت لمهندس محمد صلاح قالى معلش احنا لسه هانجرب قولتله تمام انا مستنى حضرتك
راح المهندس 10 دقايق كده و رجع هو و اللى كان سايق العربية قولتله ايه الاخبار لا كله تمام و زي الفل !!!
زي الفل !!! طب و الحدفة و التعويمه - قالى بص احنا ربطنا عفشه و غيرنا الزيت و الفلتر لكن المشكله ان الجهاز بتاع الزوايا بايظ !!!!!!!!!!!!!!!!!
جهاز الزوايا اللى عند عز بايظ!!!!!!!
و قدامه حوالى 4 ايام علشان يتصلح - يعنى على نص الاسبوع الجاي طبعا كده - المهم قالى ممكن تيجى بعد اربع ايام يكون الجهاز اتصلح و سالته على التكلفة قالى 140 جنيه لظبط الزوايا !!!!!!!!!!!
طبعا عز بيه مأفور جدا فى السعر ده و طبعا بيهرج انه يكون عنده جهاز واحد و يستنى عليه لما يبوظ.
المهم انا اخدت العربية و سألت المهندس طب لو عملت الزوايا دى بره ايه ظروف الضمان - قالى الزوايا دى حرية شخصية - براحتك عايز تظبطها بره براحتك - المهم شكرته و دفعت الـ 274.20 ملطوش و اخدت ديلى فى سنانى و كان وقتها الساعه 11 تقريبا.
طبعا نفس الحدفة حاسس بيها لكن ماقدرتش اجرب التعويمه لان الدنيا كانت مطر شديد و ماقدرتش اجرى علشان اجرب
لكن الصراحه العربية حسيت انها بتسحب و بتجمع ما شاء الله اشد من الاول غير انى حسيت ان الهبد اللى كان فى المطبات خف كتير عن الاول و بقيت احس انها انعم شويه من الاول مع المطبات

ده كان تقريرى تقريبا عن صيانة الـ 5000

[momenhamdy]

اولاً ياباشا الف مبرووووك علي صيانة ال 5000 كم
بصراحة المهندس محمد صلاح من المهندسين المحترمين جداًجداً
بالنسبة للبروتون دائماً بتحتاج تربيط عفشة ( طبعاً شئ عادي من الطرق الجميلة الي عندنا )
وعلي فكره موضوع الزوايا الي بايظ دا بقاله فتره و عمو عز مكبر دماغه
لو حضرتك عايز تظبط زوايا و العربية تبقي 10/10 في حضرتك بريدجيستون في لوران علي البحر قبل لابوار بتاع الحلويات
بصراحة مركز 10/10
وربنا يوفقك الي الخير

[Ayman_52]

اولا ..الف مبروك على صيانه الــ5000 وعقبال الــ500000...وتكون الجميله زى الفل ان شاء الله.

ولو حضرتك المشاكل لسه ماتحلتش يبقى حضرتك على طول عند استاذ/أمـــر...وان شاء الله المواضيع كلها تضبط وترجع زى الفل

[د.محمود صلاح]

انا مجرب موضوع الصحراوى ده فى عدة سيارات - ميجان اوبترا جيلى براي - ... بعد ما تضبط الزوايا على الشعرة وتجرب العربية فى الطرق الداخلية تلاقيها زى الفل ... ولما تطلع على الصحراوى تحس بالحدفة دى , واعتقادى ان سببها قوة هبوب الريح على الصحراوى وليس عيب فى الزوايا

[M.Nabil]

الف مبروك على صيانة ال5000 وعقبال ال50000000, وتفضل راضي عنها.