كام حصان

[dya2008]

يا جماعة موضوع مهم
لما تيجي تقارن القدرة الحصانيه للعربيات المختلفة اعمل حسابك تضرب القدرة الحصانيه للاوربي * 1.2 او 1.3 حسب وزن العربيه
عشان تعرف تقارنها بالاسيوي
لان لاحظت ناس كتير تتلخبط في الموضوع دا
الاسيوي يحسب قوة خرج الموتور من نقطة خروج الطاقة اما الاوربي بيحسبه من خارج السيارة و بهذا بيضعف من الاوربي شوية لازم تعوضهم لما تيجي تقارن
للافادة

[DR_EMAD]

شكرا جزيلا

الاسيوي يحسب قوة خرج الموتور من نقطة خروج الطاقة اما الاوربي بيحسبه من خارج السيارة و بهذا بيضعف من الاوربي شوية لازم تعوضهم لما تيجي تقارن

ممكن مثال للسابق ؟

[Ashraf_Ashraf]

يعنى انا عربيتى 135 حصان وهى اوروبى تبقى تساوى 135×1.3 = 175 حصان دى كده القوه الحقيقيه
مش عارف ومش فاهم ارجوا التوضيح

[tutankhamoun]

مفيش مصنع بيحسب القوة الحصانية من خرج السيارة
كل السيارات بتحسب الموتور و هو ده اللي بنشوفه على كتالوجات العربيات .

و لو عايز تعرف القوة الحقيقية لأي عربية هاتنقص 10 % من قوة الموتور كفاقد طاقة في الات الجر .
أيا كان ..... أوروبي ...... آسيوي ........ أمريكي ....... كلهم بيحسبوا الطاقة الأجمالية الخارجة من المحرك ...... و ده اللي بيبقى مكتوب في الكتالوج و البروشورات .

[Ashraf_Ashraf]

ياجماعه نزود ولا نقلل يعنى ال 135 حصان بقم 122 حصان
شويه ويجى حد يقول اقسهم على 8 ههههههههههههههههههههههههههههههههههه
انا بهزر وقمه الاحترام ليكم وكل التقدير
صدقونى انا مش فاهم نحسبها ازاى

[tutankhamoun]

فيه حاجة كمان نسيت أقولها .
الفاقد ممكن يقل أو يزيد حسب العوامل الآتية :
1 - درجة حرارة الجو ..... كلما كان باردا كان أفضل أداء للمحرك .
2 - درجة نعومة الطريق و ملمسة .
3 - نوع الزيت المستخدم في المحرك .
4 - الأوزان التي يجب على المحرك جرها ... كلما زاد الوزن ... كلما تم اهلاك طاقة أكبر للجر.
5 - تصميم السيارة نفسها ( رياضي أم شكل صندوقي )
6 - نوعية البنزين المناسبة للمحرك .
.................................................. ....... الخ .

[ahmedlr]

طيب .. القوة الحصانية المشار اليها في الكتالوجات المفروض ان لها علاقة بال rbm

يعني مثلا التويوتا كورولا بتقول
122/6000
لكن مثلا شيفروليه كروز
107/5800

يبقي كده ميين فيهم الاجمد و الاقوي ؟؟
ولا لازم الوزن يدخل في الحسبة ؟؟

[_Khaled_]

يا جماعة موضوع مهم
لما تيجي تقارن القدرة الحصانيه للعربيات المختلفة اعمل حسابك تضرب القدرة الحصانيه للاوربي * 1.2 او 1.3 حسب وزن العربيه
عشان تعرف تقارنها بالاسيوي
لان لاحظت ناس كتير تتلخبط في الموضوع دا
الاسيوي يحسب قوة خرج الموتور من نقطة خروج الطاقة اما الاوربي بيحسبه من خارج السيارة و بهذا بيضعف من الاوربي شوية لازم تعوضهم لما تيجي تقارن
للافادة

معلش الكلام ده مش مفهوم وعلميا غريب. ممكن حضرتك تقصد حاجه لسه مش واضحه بالنسبه لى ياريت توضح اكتر تقصد ايه.
مافيش حاجه فى حسابات الهندسه اسمها اضرب فى كذا او كذا.
كل البلاد بتحسب القدره الحصانيه بطريقه واحده و هى معنى القدره بمفهومها العلمى للموتور يا KW , PS,hp ماعدا النظام الأنجليزى ليه وحده hp خاصه وكلهم ليهم معامل تحويل لبعض.


ده حسب معلوماتى و ممكن حد يصححلى لو فيه غلط

المنتدى ناس كتير بتعتمد عليه فى المعلومات فلازم نكون حريصين اكتر على المعلومات اللى بنحطها و نتاكد منها.

[tutankhamoun]

طيب .. القوة الحصانية المشار اليها في الكتالوجات المفروض ان لها علاقة بال rbm

يعني مثلا التويوتا كورولا بتقول
122/6000
لكن مثلا شيفروليه كروز
107/5800

يبقي كده ميين فيهم الاجمد و الاقوي ؟؟
ولا لازم الوزن يدخل في الحسبة ؟؟

الوزن يا أستاذ أحمد ملوش دعوة هنا خالص .
لأن كلهم بيحسبوا القوة الحصانية الخارجة من المحرك و هو لوحده ...... مش متركب ....
و دي اللي كل الصناع بيقوموا بإعلانها .

موضوع الأر بي ام ده له علاقة بطريقة تصميم المحرك و الغرض من تصميمه و حرفية المصممين و التكنولوجيا المستخدمة .

يعني مثلا محرك الجين 2 ..... 110 حصان .
دي قوة خرج المحرك ...... و هانقص منها 10 % تقريبا علشان الات الجر و احتكاك الكاوتش بالأرض يبقى المتبقى هو حوالي 101 حصان أو 100 حصان و قيس على كدا كل العربيات .

الوزن بيفرق في العربية نفسها مش المحرك .
يعني مثلا لو عرية الخرج بتاعها 100 حصان ووزنها 1200 كجم ....... و بتسابق عربية 95 حصان و لكن وزنها 1000 كجم فقط ...... هنا فرق القوة تم تعويضه بفرق الوزن و اللي هايدي العربية الأخف قوة دفع عالية ..... و لاحظ أن 200 كجم مش فرق قليل .
ملحوظة تانية .
كل العربيات الآتية تم قياس الخرج بتاعها من المحرك و ليس السيارة نفسها .
اسكودا ( بكل موديلاتها ...... ) و بالتبعية طبعا فولكس فاجن لأن المواتير اللي راكبه هنا هي اللي راكبة هنا و معاهم سيات .
الجين 2 ..... بالموتورين اللي موجودين اللي هو الكامبرو ...... و السي بي اس .
عربيات تويوتا .
عربيات هوندا .

كل الكلام اللي بنسمعه من الوكلاء في مصر هو دعاية اعلانية أغلبها كاذب .

معلش الكلام ده مش مفهوم وعلميا غريب. ممكن حضرتك تقصد حاجه لسه مش واضحه بالنسبه لى ياريت توضح اكتر تقصد ايه.
مافيش حاجه فى حسابات الهندسه اسمها اضرب فى كذا او كذا.
كل البلاد بتحسب القدره الحصانيه بطريقه واحده و هى معنى القدره بمفهومها العلمى للموتور يا KW , PS,hp ماعدا النظام الأنجليزى ليه وحده hp خاصه وكلهم ليهم معامل تحويل لبعض.


ده حسب معلوماتى و ممكن حد يصححلى لو فيه غلط

المنتدى ناس كتير بتعتمد عليه فى المعلومات فلازم نكون حريصين اكتر على المعلومات اللى بنحطها و نتاكد منها.

كلام حضرتك مظبوط و المعلومات اللي أرفقها الأستاذ ضياء لا يوجد لها أساس من الصحة و أنا مرضيتش أعلق في الأول لأني حصل خلاف عدة مرات من قبل ذلك معه .
و لكن بما أن الأستاذ خالد تحدث في تلك النقطة و للأهمية القصوى في وضع المعلومات على صفحات المنتدى
أحب أقول أن مش دي أول مرة الأستاذ ضياء يفتح موضوع فني بحت و يقول معلومات بعيدة تماما عن أرض الواقع .

رجوعا لمداخلة الأستاذ خالد .
طرق قياس القوة التي ترخج من المحركات هي الآتي
HP
القوة الحصانية و هو نظام تم أختراعه في بريطانيا
يتم قياسها بعدة طرق .
و لكن الأهم ها هو الحصان الميكانيكي أو الحركي .
و هو يساوي 746 وات و من هنا آتى KW
لأن كل كيلو وات بيحتوي على 1000 وات
يعني كل حصان بيساوي 1.34 كيلو وات
يعني بحسبة بسيطة نقول ان الجين 2 مثلا
110 حصان .
يعني 82060 وات .
يعني 82 كيلووات .



أما PS
فهو نظام تم أختراعه في ألمانيا و يتم استخدامه في أوروبا و اليابان تقريبا
و هو تقريبا مساوي للحصان و بيزيد عليه زيادة طفيفة جدا .يعني مثلا
لو عندنا موتور 59 حصان هانلاقي انه 60 ps


و مفيش حاجة أسمها نضرب في كذا علشان نحول الطريقة الآسيوية أو الأوروبية أو الأمريكية لتحويل قدر الطاقة اللي خارج من المحرك غير بالطريقة المشروحة .
أغلب السيارات بتقيس مواتيرها بطريقة واحدة ... و لكن الأختلاف ممكن يكون في الوحدة التي تم القياس بها و التحويل ليس صعب ...... أو الفرق بيكون كبير .
و أحنا هنا في مصر بنستخدم القوة الحصانية HP



ملحوظة صغيرة :
كل الشركات بتعلن خرج المحرك و ليس خرج السيارة لأن زي ما قلنا قبل كدا فيه عوامل كثيرة ممكن تتغير و تأثر على خرج السيارة زي ما شرحتها فوق .
حتى مرسيدس و بي ام دبليو بيعلنوا عن خرج المحرك .

فيه أجهزة أسمهاأجهزة الدينو دي بتقيس خرج العجل ...
بس دي مش دقيقة 100 %
أولا الجهاز ده العربية بتكون ثابتة عليه و مش بتجري و لكن عجلها هو اللي بيتحرك
و هنا بيتم القياس بعد اهدار الات الجر و لم يكن الوزن في الحسبان و لا حالة الطريق و لا عدد الركاب .

أنا عملت بحث جامد في الموضوع ده و دي النتائج اللي توصلتلها .
لأن الناس هنا على المنتدى بيكرروا كلام كتير في النقطة دي .
و كل ده راجع بسبب كذب التوكيلات الياباني في تسويق سيارتهم ....
حتى ان الشركات الأم الياباني نفسها مش بتعلن الكلام اللي التوكيلات هنا بتقوله .
خصوصا توكيلي تويوتا ..... و هوندا .
بيحطوا أرقام عالية قوي عند التسويق و غير معقولة .

[wolfsameh]

مشكور يا اخ توت
على المعلومات القيمة دى وربنا يباركلك بس سؤال
انت مهندس ميكانيكا ولو مش مهندس عرفت كل المعلومات دى ازاى
وشكرا جزيلا

[tutankhamoun]

مشكور يا اخ توت
على المعلومات القيمة دى وربنا يباركلك بس سؤال
انت مهندس ميكانيكا ولو مش مهندس عرفت كل المعلومات دى ازاى
وشكرا جزيلا

العفو يا أخي الكريم .
أنا مش مهندس ميكانيكا .
و لكني درست فيزياء و رياضيات و كنت بحبهم نوعا ما .
ثانيا المعلومات دي من مصادر كتيرة أولها القراءة و بعدين الأنترنت و كمان الأخوة الخبراء اللي معانا في المنتدى و في منتديات أخرى .

الأطلاع و القراءة هما السر .