أرجو المساعدة ( جين 2)

[khaledmontero]

السلام عليكم
كل سنة وانتم جميعا بألف خير - عيد فطر مبارك عليكم
ياريت المساعدة يا شباب فى ان انا عاوز اشترى جين 2 مستعملة استعمال زيرو يعنى ماتعديش 20 الف ك وتكون اوتماتيك فول ابشن .
ياريت لو يعرف اذا كان التوكيل بيبيع عربيات مستعملة ولا لاء ؟؟
وكمان لو حد قدامه عربية بالمواصفات دى يقولى .
وكمان حد يفهمنى حته ان صوت الموتور عالى شوية دى ايه بالظبط وهل دى كانت فى موديل 2006 بس ولا فى كل الموديلات ؟؟؟..
رجاء تعزرونى ان انا على قدى قوى فى موضوع العربيات كمان دى ان شاء الله هاتكون أول عربية ليا .
بس طبعا اكيد انتو عارفين ان الجين تو بتخطف الانظار على طوووووووووووول .
انا اسف لو الموضوع ده حد سأله قبل كده ..
وكمان سؤال : لو انا روحت اشتريها مستعملة اعمل تشيك على ايه قبل ما أوديها التوكيل يشيك عليها.
وهل التوكيل بيعمل تشيك على العربية بجد ولا اى كلام وبعد كده البس فى الحيط ؟؟؟
شكرا لكل الاعضاء .

[ayman_83]

متابع للاهميه لاني انا كمان زيك بالظبط بس الفرق اني عايزها منوال

[khaledmontero]

طب يا استاذ ايمن ممكن نتعاون فى الموضوع ده .. ؟

[m.3abdel3al]

فعلا التوكيل بيبيع يوسد و مفايش حاجة بالمواصفات الي انت عايزها موجوده دلوقتي

بالنسبة للصوت هو مش عالي ولا حاجة هو سبور شوية بس يعني مش ناعم

بالنسبة للتشيك لازم تعرف الاول هل رشة برا ولا لا و هكذا رشة جوة ولا لا و رشت ليه و فين وتابع الصيانة فين و لو كل دا تمام تشوف التوكيل

[eslam_wega]

صباح الانتشار يا جين يا منتشرة ( ربنا يستر )
طبعا محمد قال المفيد وزيادة

[khaledmontero]

انا كان قدامى جين 2 موديل 2008 عاملة 12 الف كم فابريقه بره وجوة واتوماتيك فول اوبشن سوده وكانت فى معرض وقالى صاحبها طالب 80 الف جم بس ده طبعا قابل للتفاوض . تفتكروا ممكن تخلص على كام ؟
وفى واحدة تانية نفس لمواصفات بس لونها نبيتى وقالى فيها خربوش وعاملة 22 الف كم وقالى طالب 75 الف جم وبرضه الكلام ده قابل للتفاوض .
ياريت لو فى حد اشترى يوسد قريب يقلنا الاسعار تخلص على كام .
شكرا لكل الاعضاء على اهتمامهم وردهم .

[m.3abdel3al]

هي ال 80 دي ممكن توصل ل 77 تبقى كويس جدا

و التانية 73 كويس جدا بردوا

[a7med_3omara]

أنا عندي جين 2 2009 اوتوماتيك فول اوبشن عاملة 9500 كم انا مش عايز ابيعا بس بفكر ممكن ابيعا بكام: أعتقد في حدود ال 75-80 ألف , بالنسبة للصوت , موديل 2009 صوته هادئ جدا وبرضه لو بتحب الصوت يبقى تقرص عليها الصوت يعلى شوية زيها زي أي عربية , فعلا الصوت بقى هادي كتيير رغم اني اعتقد معظم الناس بتحب الصوت الاسبورت العالي - وانا مش منهم - عشان كده فرحت اما اشتريتها ولقيت صوتها هادي.

طبعا لازم تشيك على العربية عند حد بيفهم وتجرب كل حاجه فيها وتمشي بيها كمان وتسمع صوتها.

أرجو اني أكون أضفت لمعلوماتك حاجه وربنا يوفقك.

[khaledmontero]

احمد عمارة
شكرا على اهتمامك وربنا يكرمك
بس لو بتفكر تبيع انا ممكن اشترى منك ونتكلم
محمد عبد العال
مش عارف اقولك ايه .. ربنا يخليك ..دايما بتبدى اهتمام بالاستفسارات .

[ahmad alshaaer]

في جن 2 2008 هاي لاين اللي هي بالعتب والكساحات ومثبت السرعه واوتوماتيك طبعا مافيهاش اي مشاكل ابدا ماشيه 60000 كم

العربيه مع واحد من اسيوط وتشوفها زيرو فعلا ماشاء الله لدرجة انه مغير كل حاجه في التوكيل وكمان غير الكاوتش على 50000 كم

طالب فيها 85000 جنيه الاخر


تحياتي

[emadhamdy]

في جن 2 2008 هاي لاين اللي هي بالعتب والكساحات ومثبت السرعه واوتوماتيك طبعا مافيهاش اي مشاكل ابدا ماشيه 60000 كم

العربيه مع واحد من اسيوط وتشوفها زيرو فعلا ماشاء الله لدرجة انه مغير كل حاجه في التوكيل وكمان غير الكاوتش على 50000 كم

طالب فيها 85000 جنيه الاخر


تحياتي

مساء الخيرات علي الجميع
يا جماعه اي حد عايز يبيع جين.2 يقولي
بس يكون جاد لان معظم الناس بتقول هتبيع عشان تتمن العربيه فقط
طبعا انا معايا جين.2 موديل 2007
وبعشق عربيتي جدا لدرجه اني مقدرش اغير حتي الموديل مرتبط بالعربيه ارتباط فزيع
المهم حبايبي كتير عاشقين الجين.2 موصيني اي عربيه يوسد للبيع هما جاهزين
عيد فطر مبارك عليكوا

[eslam_wega]

في جن 2 2008 هاي لاين اللي هي بالعتب والكساحات ومثبت السرعه واوتوماتيك طبعا مافيهاش اي مشاكل ابدا ماشيه 60000 كم

العربيه مع واحد من اسيوط وتشوفها زيرو فعلا ماشاء الله لدرجة انه مغير كل حاجه في التوكيل وكمان غير الكاوتش على 50000 كم

طالب فيها 85000 جنيه الاخر


تحياتي

افتكر السعر اوفر شوية
طيب ما يحط 5 كمان ويجيب 2010

[ahmad alshaaer]

تحياتي ليك يااستاذ اسلام

اولا كل عام وانت بخير


بالنسبه للراجل السعر اللي حاطه بناءا على ان 2008 فيها مثبت سرعه وكمان العتب والكساحات الاماميه والجانبيه دي ليه سعر وكمان منظر ساعة التابلوه

وماتنساش انه هو لما اشترى وقتها كانت الهاي لاين دي ب 94500 جنيه وزادت ووصلت 98500 اواخر 2008
وماشاء الله فعلا العربيه بحالة الزيرو فعلا
وكمان متابع مع التوكيل وغير الكاوتش كمان


اما 2010 اولا مافيهاش مثبت سرعه وكمان العتب والكساحات والتابلوه مش فيه الساعه اللي فارقه كتير في الشكل


وكمان الاوتوماتيك 2010 بكام على كل الكلام ده 92000 جنيه




تحياتي

[khaledmontero]

ياريت حد يقولى ايه فايدة مثبت السرعة ؟؟

[ahmad alshaaer]

فايدة مثبت السرعه انك تحط رجل على رجل وتقول للعربيه بلمسة زرار عاوزك تمشي على 110 مثلا وهي تفضل ماشيه على السرعه دي مهما كان الطريق فيه نزول او طلوع هي بتثبت وبتنقل الغيارات لوحدها اوتوماتيك كمان
واول ماتلمس سيادتك الفرامل بتكانسل العربيه اوتوماتيك المثبت وال ماتدوس على الزرار تاني هي بتجيب اخر سرعه كنت انت ماشي عليها


تحياتي