محتاج نصيحة ضروري جداً

[Eng. Rafy Samy]

صباح الخير عليكم وكل عام وانتم بخير وعيد سعيد

عاوز نصيحة ضروري وبسرعة
دلوقتي ميعاد صيانة ال5000 ولما رحت التوكيل انهارده الصبح لقتهم قفلين من يوم الخميس لحد يوم الثلاثاء
المشكلة ان انا عندي سفرية بالعربية يوم الثلاثاء الصبح ( اسكندرية - القاهرة - دمياط -اسكندرية ) يعني حوالي 700 كم وانا مش عاوز اسافر بالزيت الموجود في العربية عاوز اغيرة ده اهم حاجة
فكنت عاوز اعرف رأيكم ايه
اسافر بالزيت الحالي ولما ارجع ابقى اعمل الصيانة كاملة ولا اغير الزيت قبل السفر
ولو حغيرة اغيرة بأيه.. انا كنت عاوز احط زيت 10000 ..
ولو حغيرة اغيره فين ( في اسكندرية ) وهو الزيت ال10000 بيعمل كام تقريباً
معلش اسألتي كتير بس ده من باب العشم ..

وكل سنة وانتم طيبيين
تقبلوا تحياتي

[Osama.shihata]

وانتا طيب استاذ رفيق

حضرتك ممكن تغير زيت وفلتر فى اى بنزينة وياريت لو تحط زيت 5000 ده هيكون افضل للموتور وللفلتر كمان
وافضل زيت متعارف عليه شيل هايلكس 5000 او تحط توتال بتاع التوكيل 5000
وده فى حدود 94 -96 جنيه
ومفيش اى مشكلة لو عملت الصيانة دى بره التوكيل لانها زيت وفلتر بس
مفيهاش غير مراجعة العفشة ودى ممكن تعملها بعد السفر لو حبيت فى التوكيل
والافضل انك متقرص على الزيت بعد 5000 لان فى نسبة فاقد فى الزيت ناتجة من احتكاك الموتور وده مكتوب فى الكتالوج
وتروح وتيجى بالسلامة ان شاء الله
وعيد سعيد عليك وعلى كل البروتونية

[Eng. Rafy Samy]

استاذ اسامة الف الف شكر على ردك السريع والمفيد
بس ممكن توضحلي ليه حضرتك بتفضل زيت 5000 عن ال10000
وكمان لو امكن ايه الفرق الفعلي بين زيت شيل وتوتال وهل في فرق في السعر
هل تغيير الزيت برة ليه اي تأثير على الضمان...؟
شكراُ لسعة صدرك
كل عام وحضرتكم بخير وصحة وسعادة
وتقبلوا تحياتي

[rajina]

صباح الفل و الكحك

أنا متفق مع الأستاذ amecath ان حضرتك تقوم بتغيير الزيت و لكن يستحسن total 5000 بتاع التوكيل اما بخصوص ال total 10000 سيضطرك للذهاب الى التوكيل لعمل تربيط العفشة فقط بعد 5000 و الإ سوف تسمع اصوات كثيرة من العفشة. انا من رايى تذهب الى اى محطة total قبل السفر , اما بخصوص سعر total 10000 سوف أقوم بسؤال المحطة و اقوم بالرد عليك اليوم إن شاء الله.
عموماَ اجازة سعيدة و تيجى بالف سلامة

تحياتى

[rajina]

هناك شيء اخر انه من الممكن اذا كان المشوار 700 كم انك تنتظر الى ميعاد الصيانة حتى تغير الفلتر كمان و لكن هذا يتوقف على رقم العداد الأن . انا عملت صيانة ال 5000 عند 6500 .

تحياتى

[MohabSaeed]

انا ليا رأيى يا بشمهندس رفيق ... انتا ممكن تسافر عادى جدا بالعربيه و تعمل الصيانه لما ترجع .. 700 كيلو مش مسافه كبيره او مقلقه ... الحاجه التانيه الرايش المعدن الى بينزل من الموتور كده كده بيتفلتر فى فلتر الزيت يعنى مش بيدخل الموتور فمتقلقش من الناحيه ديه .

انا كل قصدى انك تحافظ على الصيانه الدوريه فى التوكيل علاشان فى حال انك احتجت الضمان محدش فى التوكيل يبقى ليه اى حجه انك عملت صيانه بره او غير منتظم فى الصيانات .

رأيى انك تسافر عادى بالعربيه و اعمل كل مشاويرك و لما ترجع اعمل الصيانه فى التوكيل و حط زيت 5000 كيلو و مع صيانه ال10000 كيلو حط زيت تخليقى بحيث انك بعد كده تخلى صياناتك كل 10 الف كيلو " يعنى تقلل مشاويرك للتوكيل + تقليل مصاريف الصيانه و العماله " . و كده يبقى مسكت العصايه من النص

و شوف برده ايه المناسب ليك .

[ahmad--ezzat]

والله لو حصرتك عامل 5 بالظبط بلاش تسافر وغيره عشان تبقا مرتاح...

انما لو حضرتك عامل 4500 مثلا عادى يعنى

[Eng. Rafy Samy]

استاذ مهاب
انت عارف انا قد ايه بحترم ارائك وافكارك فيما يخص العربية وبالتأكيد نصيحتك مفيدة جداُ بالنسبالي وانا كنت مستني ردك ..
بس انا عندي سؤال من فضلك:
العداد دلوقتي عامل 5030 كم.. انا لسة راجع من بورسعيد وكان الطريق فاضي فكنت طول الطريق ماشي 170 (انا عارف ان ده غلط كبير بس انا الللي كان مشجعني ثبات العربية والطريق الساحلي كويس جداُ) المهم لما رجعت وريحت العربية قلت ابص على الزيت تاني يوم الصبح لاحظت حاجة غربية لما طلعت عمود القياس لقيت الزيت بينقط ( بينزل من اخر عمود القياس على شكل نقط ) فده حسسني ان الزيت خف وهو ده اللي مخوفني ..

سؤال كمان من فضلك
بالنسبة للزيت انهي احسن حاجة للموتور الكامبرو ( شيل - موبيل1 - توتال ) انهي بيريح الموتور اكتر
وكمان بالنسبة لفلتر الزيت ( انهي فيلتر بيلاكب عندنا يعتي زي انهي عربية ) انت عارف الواجا مشهورة قد ايه وكل الناس عرفاها ..!!!!!!!!!
اخر سؤال انت فضلت زيت 5000 دلوقتي وعند صيانة ال10000 احط زيت 10000 ممكن اعرف ليه ... هل الموضوع ليه علاقة بتليين الموتور او لزوجة الزيت او اي حاجة فنية معينة ..؟.؟؟

شكراً جزيلاُ لسعة صدركم جميعاً

كل عام وحضرتكم بخير وسعادة وسلام

[Reventon]

حضرتك ممكن تعمل الصيانة الدورية عند امير و جوزيف وده مركز صيانة معتمد من عز العرب
هما ناس محترمين وشغلهم كويس وسريع
و بخصوص الزيت ...في مهندس من جوه التوكيل قالي اني لو عايز زيت 5000 كويس حط شل الاصفر ب 96 جنيه

[MohabSaeed]

استاذ مهاب
انت عارف انا قد ايه بحترم ارائك وافكارك فيما يخص العربية وبالتأكيد نصيحتك مفيدة جداُ بالنسبالي وانا كنت مستني ردك ..
بس انا عندي سؤال من فضلك:
العداد دلوقتي عامل 5030 كم.. انا لسة راجع من بورسعيد وكان الطريق فاضي فكنت طول الطريق ماشي 170 (انا عارف ان ده غلط كبير بس انا الللي كان مشجعني ثبات العربية والطريق الساحلي كويس جداُ) المهم لما رجعت وريحت العربية قلت ابص على الزيت تاني يوم الصبح لاحظت حاجة غربية لما طلعت عمود القياس لقيت الزيت بينقط ( بينزل من اخر عمود القياس على شكل نقط ) فده حسسني ان الزيت خف وهو ده اللي مخوفني ..

سؤال كمان من فضلك
بالنسبة للزيت انهي احسن حاجة للموتور الكامبرو ( شيل - موبيل1 - توتال ) انهي بيريح الموتور اكتر
وكمان بالنسبة لفلتر الزيت ( انهي فيلتر بيلاكب عندنا يعتي زي انهي عربية ) انت عارف الواجا مشهورة قد ايه وكل الناس عرفاها ..!!!!!!!!!
اخر سؤال انت فضلت زيت 5000 دلوقتي وعند صيانة ال10000 احط زيت 10000 ممكن اعرف ليه ... هل الموضوع ليه علاقة بتليين الموتور او لزوجة الزيت او اي حاجة فنية معينة ..؟.؟؟

شكراً جزيلاُ لسعة صدركم جميعاً

كل عام وحضرتكم بخير وسعادة وسلام

كل سنه و حضرتك طيب يا بشمهندس
اشكرك على كل الكلام الجميل ده و ثقتك الغاليه فى رأيى المتواضع .


كون ان لزوجه زيت قلت طبعا ده مؤشر مش كويس خصوصا انه قعد 4000 كيلو بس !!

اعتقد الزيت الى عندك زيت توتال و الزيت ده كنت جربته فى عربيتى و خليته 6000 كيلو و كان لزوجته كويسه بس صوت الموتور كان عالى نوعا ما و لونه بنى داكن .

عاوز بس اوضحلك حاجه بالنسبه للزيت فى فرق مابين ان الزيت مافهوش اى نوع من اللزوجه " عامل زى الميه " و اسود ....ده كده يبقى منتهى تماما .

و الزيت لما يبقى بنى شويه و فيه لزوجه يبقى لسه شغال .

انا مش عارف حاله الزيت عندك عامله ازاى انتا الى تقدر تحكم عليها .. لكن طلاما انتا قلقان و عاوز تمشى و انتا بالك مرتاح خلاص غيره بره فى اى محطة شل بزيت شل هيلكس 5000 .

بالنسبه للفلتر ......الى بيركب عندى على موتور ال4g18 هو الفلتر بتاع الانسر او الحاجات المشابه ليه ..... اعتقد فى موتور الكامبرو نفس الفلتر او حاجه مشابه ليه و حتلاقى الفلتر فى محطه البنزين لان صعب تلاقى محل قطع غيار فاتح فى العيد .

بالنسبه لانواع الزيوت ... بصراحه انا بتعامل مع محطات شل فى كل انواع الزيوت " موتور .. فتيس .. فرامل .. باور .. سائل تبريد " حتى البنزين و الصراحه كل منتجاتهم ممتازه .

جربت زيت شل هيلكس بلس .. وده نص تخليقى و بيقعد 7000 كيلو .... سيبته ل 8000 و كان ممتاز الصراحه ...لزوجته كويسه و لونه غامق شويه .
و حاليا انا ماشى على زيت شيل هيلكس الترا و ده تخليقى بالكامل و عامل بيه تقريبا 10300 الف كيلو ... و حغيره بعد العيد ان شاء الله و برده شايف انه ممتاز .

موبيل الصراحه مجربتوش لكن اغلبيه الناس رأيها فيه سلبى جدا .

توتال انا جربت فيه ال5000 الف و كان كويس لكن الحقيقه مش ححطه تانى فى عربيتى لانى كده كده انا بره الضمان و عربيتى داخله فى 90 الف كيلو و مش بعمل صيانات الزيت فى التوكيل ف مش مضطر احطه ...........و طلاما فى شل . على الله بس مايتضربش ساعاتها حفكر احط التعاون .

اخر سؤال انت فضلت زيت 5000 دلوقتي وعند صيانة ال10000 احط زيت 10000 ممكن اعرف ليه ... هل الموضوع ليه علاقة بتليين الموتور او لزوجة الزيت او اي حاجة فنية معينة ..؟.؟؟

لسبب واحد و هو انك لو حطيط زيت تخليقى دلوقتى .. حتلخبط معاد الصيانات ..بدل ماتبقى 10 , 20 , 30 , ....

حتبقى 15 , 25 , 35 .............. ده حيعملك لخبطه خصوصا ان فى حاجات بتتغير كل 20 الف كيلو زى الفلاتر و البوجيهات ... و كل 40 زى السوائل و الزيوت .... يعنى لخبطه ملهاش لازمه

ف الافضل تحط زيت عادى 5000 الاف و تغيره عن ال10000 الاف بزيت تخليقى و بكده حتبقى صياناتك فى معادها مظبوط و مع بعض و مش حتروح و تيجى التوكيل للصيانه الى كل 10000 كيلو " مصلحه كبيره طبعا " توفير وقت و مجهود و فلوس .

[Eng. Rafy Samy]

كلام جميل ومقنع ومنطقي
طيب كده انا قدام 3 اختيارات
1- شل هيلكس 5000
2- شل هيلكس بلس
3- شيل هيلكس الترا

اخر كلام احض مين فيهم .. انا حنزل اغيرة انهاردة ان شاء الله

[MuhammedSoliman]

لو مش هتحط موبيل وان خليك فى
3- شيل هيلكس الترا
تحياتى

[Eng. Rafy Samy]

د/ محمد
ازيك يا باشا.. عامل ايه يا كبير
شكراً لردك واهتمامك .. ونصيحتك مهمة جداُ عندي
وكل عام وانتم بخير وصحة وسعادة

[Eng. Rafy Samy]

تم بحمد الله تغير الزيت بزيت شل هيلكس 5000 - اسعر 98 جنية
تم التغيير عن طريق شفط الزيت مش من الطبة لاني خفت احسن الصنايعي ميقفلهاش كويس او يبوظها وهو بيفكها ودي كانت نصيحة د/ محمد سليمان
فضلت ادور على زيت شل هيلكس في كل حتة ملقتش غير على الطريق الصحراوي ( بنزينة في الكيلو30 ) والعمال كانوا اجازة فغيرته في بنزينه اسو بجوار مدر الامن الجديدة

الملاحظات:
الزيت فعلاً ممتاز وده بشهادة الصنايعي اللي كان يغيرة وقالي في الخباثة د احسن من موبيل1 ( ال5000 ) بس
بالنسبة للموتور صوته هدي كتير وحسيت ان انعم بكتير - انا مغييرتش فلتر لانهم قالولي ده بيعض 10000 كم
العربية اخدت 3.5 لتر بس

الشكر لكل الاعضا الكرام اللي فادوني ونصاحوني
كل عام وانتكم بخير وصحة وسعاد
قبلوا تحياتي

[as01241]

تم التغيير عن طريق شفط الزيت مش من الطبة لاني خفت احسن الصنايعي ميقفلهاش كويس او يبوظها وهو بيفكها ودي كانت نصيحة د/ محمد سليمان

طب هو مش ده غلط لإن التوكيل بيحط نوع تاني وكان المفروض تصفي الزيت كويس عشان حسب ما مكتوب في الكتالوج غلط تغير نوع زيت بنوع تاني وفي ناس بتقول لازم تتعمل حاجة إسمها فلاش للموتور لغسيله يعني قبل ما تحط النوع الجديد ؟ ولا إيه؟