ليه كدا يا واجا ؟

[eslamkasem]

النهارده يا جماعه اتصدمت صدمه نفساويه جامده اه ينا

واحد ابن حلال راكب موتكسيل صيني من ابوا 3500 جنيه الله يكرمه مسطول باين دخل في المرايه الشمال ,والبيه طبعا ماشي عكس اتجاه وقشطه خالص وماشي لا يقل عن ال80والله اليه يسمحه بجد

المهم طبعا انا خفت يكون دخل في صاج العربيه نزلت وانا قلبي عمال يدق وعيني بترف وركبي مش شيلاني وقاعد اقول يارب تكون بسيطه

شفت منظر المرايه جالي صدمه بس قولت الحمد لله جت لحد كدا ,طلعت علي مركز الصيانه الله يصلح حالهم ولقيت المهندس الي هناك بيقولي القاعده دي مش هتتغير المرايه كلها لازم تتغير قوتله وانا بقول يا ساتر يارب

بكام المرايه قالي ب850 جنيه .....؟؟؟؟؟؟؟؟؟ قوتله لا بسيييطه خالص

المهم رحت البيت وجبت المبلغ وعملتها والحمد لله

بس عاوز طلب من كل واحد في المنتدي انو يدعي علي كل واحد راكب مكنه صيني دعوه من القلب للقلب كدا عشان توصل بسررررعه اميييييين يارب

[m.3abdel3al]

ممكن تصور المراية وانا ممكن اقولك تعملها ازاي لو الخبطة زي ما انا متخيلها

[MohabSaeed]

النهارده يا جماعه اتصدمت صدمه نفساويه جامده اه ينا

واحد ابن حلال راكب موتكسيل صيني من ابوا 3500 جنيه الله يكرمه مسطول باين دخل في المرايه الشمال ,والبيه طبعا ماشي عكس اتجاه وقشطه خالص وماشي لا يقل عن ال80والله اليه يسمحه بجد

المهم طبعا انا خفت يكون دخل في صاج العربيه نزلت وانا قلبي عمال يدق وعيني بترف وركبي مش شيلاني وقاعد اقول يارب تكون بسيطه

شفت منظر المرايه جالي صدمه بس قولت الحمد لله جت لحد كدا ,طلعت علي مركز الصيانه الله يصلح حالهم ولقيت المهندس الي هناك بيقولي القاعده دي مش هتتغير المرايه كلها لازم تتغير قوتله وانا بقول يا ساتر يارب

بكام المرايه قالي ب850 جنيه .....؟؟؟؟؟؟؟؟؟ قوتله لا بسيييطه خالص

المهم رحت البيت وجبت المبلغ وعملتها والحمد لله

بس عاوز طلب من كل واحد في المنتدي انو يدعي علي كل واحد راكب مكنه صيني دعوه من القلب للقلب كدا عشان توصل بسررررعه اميييييين يارب

معلش قدر الله و ماشاء فعل .... الحمد لله الموضوع كان فى المرايه بس و التلفيات مكانتش اكبر من كده .

بس من عنوان الموضوع حسيت ان المشكله فى الواجا و مشكله كبيره ... مش من الموتوسيكل الى كسر المرايه العربيه !!

فياريت لو تبعت للاداره و تغير عنوان الموضوع .

[mimo3000]

الحمد لله ياباشا انها جت على قد كده بس مكنش المفروض حضرتك تسيب سواق الموتسيكل خاصتا انه كان ماشى عكسى وبسرعه جنونيه 80 بالنسبه لموتسيكل كتيره جداااا كان لازم حضرتك متسيبوش عشان الناس اللى راكبه الموتسيكلات الصينى كتروا جداااااااا واغلبهم ولا معاه رخصه ولا اى حاجه وتلاقى الموتسيكل اصلا مش مترخص
بس الحمد لله انه جت فالمرايا بس قدر الله وماشاء فعل

[tutankhamoun]

الحمد لله على كل شئ
أصل أحنا عايشين في بلد السلطة ( سلطة بلدي محترمة ) كل واحد بيعمل اللي على مزاجه ........... ج ع ع .

لو مكنش حرام ........ كنت هزرت معاهم هزار مش ظريف ...... لمسة بجنب العربية لكل متخلف ماشي عكسي على موتوسيكل .

و أنا كدا كدا بقف في وش أي بني آدم مش متربي ماشي عكسي بعربية و بقفل عليه الحارة البطيئة لو على طريق سريع و لو طريق فردي ....... بقف أعطله خمسة أديله درس في الأخلاق اللي ناقصة من عند أهله ..........

حسبي الله و نعم الوكيل في اللي سايب البلد توصل للبلاوي اللي هي فيها .


و الله العظيم تلاتة أمبارح معدي على لجنة عند مدينة الفردوس في 6 أكتوبر
وواحد خارج من البنزينة اللي بعد اللجنة بحالي 300 متر و رجع عكسي أدام اللجنة .......... و تحيا ج ع ع مهلبية فسقية شوربية .

---------------------------------------------------------

و الحمد لله أنها جت في المراية بس و الصاج سليم ....... و كفاية أن حضرتك سليم .... ربنا يرحمنا من الكائنات دي و اللي سايبهم طالقين في الشوارع .

الله يأخدهم الأثنين علشان الواحد خلاص زهق و طهق من البلد و اللي فيها .

[ahmad--ezzat]

المرايا غاليه جداااااااا....حضرتك مفكرتش تدور بره....اكيد كنت هتلاقى....على العموم الحمد لله

[MoMohsen]

طيب ما كنت سألت عليها فى شارع دمشق اكيد كانت هتبقى ارخص من كدة بكتير

[MaZaGAngeE]

850 جنيه كتير جدا على مراية جنب .... مش معقول ده سعرها

[ramyar]

يا سيدي قدر الله ما شاء فعل واعتبرها اخدت العين متنساش ان الواجا شكلها ضخم ورفاهيه والله انا حاسس بيك الواحد بيحس الخبطه في قلبه
المفروض انك تدور علي المرايه في مكان تاني غير التوكيل او حتي لو انتا بتدور علي الاصلي شوف وحاول تجيبها استعمال الخارج وخلي التوكيل للحاجات الي تستاهل

[Eng. Rafy Samy]

معلش متزعلش نفسك
بس برجاء تغيير عنوان الموضوع علشان انت وقعت قلبي افتكرت ان في مصيبة في العربية ..!!

تقبل تحياتي

[XXXMEMOXXX]

الحمد لله انها في المرايه بس
الاشكال اللي بتركب الموتسيكلات دي اشكال ضاله وعايزين حل عشان كده فعلا بقت مهزله

[eslamkasem]

الف شكرا يا جماعه علي الردود وفعلا الحمد لله انها جت علي قد كدا وقدر الله ومشاء فعل

يا جماعه انا من المنصوره ,دورت عليها في مكان عندنا كدا زي الحرفين بس علي صغير كدا اسمو الحسنية ملقتش فيها المرايه خالص ,وفعلا هيا غاليه اوي بس هعمل ايه نصيييب ,وربنا يجازي الي كان السبب

[horas3000]

الواحد شكلة هيحط علي اجناب العربية طبقة اسمنت و يرشق فيهم ازاز مكسر و خلي واحد بموتوسيكل او فسبة من بتوع الدليفري يهوب ناحيتها تاني.

معلش يا زعيم قدر الله و ما شاء فعل

[m.3abdel3al]

الف شكرا يا جماعه علي الردود وفعلا الحمد لله انها جت علي قد كدا وقدر الله ومشاء فعل

يا جماعه انا من المنصوره ,دورت عليها في مكان عندنا كدا زي الحرفين بس علي صغير كدا اسمو الحسنية ملقتش فيها المرايه خالص ,وفعلا هيا غاليه اوي بس هعمل ايه نصيييب ,وربنا يجازي الي كان السبب

يا باشا ياريت لو تقول المراية مكسورة منين لانها ممكن تتلحم بدل ما تكلف نفسك و تغيرها

[eslamkasem]

والله يا استاذ محمد هيا اتكسرت وفكتها
بص يا معلم هيا مش في قاعد كدا الي بتبقي عليها المرايه وبتطبق وبتتفرد عليها المرايه دي الي مكسوره