لغيت علبة البيئة

[waleedraafat]

بعد الكثير من اللف والدوران حول مشكلة كتمة العربية هل هي بسبب علبة البيئة كما افاد التوكيل ام ان العربية ميت فل وعشرة كما افاد الميكانيكي ، وبعد عذاب مع التوكيل لتغيير علبة البئية في الضمان بدون فائدة وبعد شكوي مستمرة من سخونة العربية وضعف السحب الخ ... وبدون فائدة برضك، قلت اجرب الغيها انا مش خسران حاجة والي شجعني وجود علبة معدلة جاهزة عند الميكانيكي (بداخلها ماسورة مخرمة)
ومع عدم اقتناع الميكانيكي اصريت علي التغير تحت شعار ضربو الاعور علي عينه

المهم ركبت العلبة المعدلة من يومين والملاحظ الاتي
سحب العربية وتجميعها زاد بصورة واضحة ستشعر معها انك متحكم في السيارة (قبل كده كنت بادوس بنزين واستني الفرج)
اهم تغيير حصل ان العربية ما بقتش تسخن زي الاول واصبحت سيارة طبيعية (الاول كان الكبوت بيلسع بعد اي مشوار محترم)

الحاجة الغريبة شوية ان صوت المتور عالي في السلانسية كان الشكمان مخروم حتي 2000-2500 دورة وبعد كده مع الدوران الاعلي صوته بقي اوطي واهدا من الاول، بس الصوت مش عالي اوي لكنه مزعج حبتين (تحس انك راكب حاجة فيات كده)

حاليا انا باجرب استهلاك الوقود ولسه هشوف معدله اتغير بالسلب ام بالايجاب ام لم يحدث تغيير وهبقي افيدكم بنتائج التجربة

[mondy2010]

مشكور ع المعلومات القيمة..

[عصام غنايم]

الصوت عالى علشان (علبة بداخلها ماسورة مخرمة)
ركب ماسورة مباشرة بدون علب والصوت هيتزبط
عن تجربة .
وادعيلى

[Sherif Khalifa]

العلبة لسة معملتش شربون
و دا ان رواسب الكربون فى العادم بتسد الفراغات الى بين اللحامات الى فى العلبة الجديدة
فا استنى شوية اسبوعين مثلا لو الصوت مرحش كدة فى حاجة مش مظبوطة

[ahmedaliaeg]

انا العلبه بردو مدوخانى وخايف اغيرها علشان الصوت واتصلت بابو اليزيد

[ahmedaliaeg]

انا اسف لقيتها ب750 جنيه
:b4_592:

[Sherif Khalifa]

فى علبة عند ابو البزيد زيها بظبت بس مفهاش الفحم دا

بى 180 جم بالتركيب

[zocor742]

تعرف لو لغيت العلبة اللى بداخلها ماسورة المخرمة اللى حضرتك مركبها وقدامك حلين افضل
الافضل على الاطلاق تركيب ماسورة على فلنشات وتشيل العلبة وتركب بس فلنشات عشان الشغل يكون نظيف من غير لحامات
وعندك تركب علبة شبة علبة البيئة بس اصغر حجما وفاضية داخليا من غير ماسورة مخرمة .... بيسموها بتوع الشكمانات فلتر بديل علبة البيئة.
عن تجربة الوضع التانى اللى هو الفلتر الشكمان هيبقى هادى عن موضوع الماسورة المخرمة ... هو بالظبت كأنك ركبت علبة بس صغيرة فامش هتلاقى الرنة او النعرة حسب انت لانوس ولا نوبيرا زى ماكانت فى العلبة الكبيرة ...هتكون الرنة او النعرة واطيييية بكتيييير وتحثها على 3000 ار بى أم بس تكون العلبة سالكة تماما عشان متعملش نفس المشكلة اللى كانت عندك اللى هيا كتمة العربية وبالتالى السخونة وكأنك با ابو زيد ماغزيت....... دة الوضع اللى عملتة عندى بعد تلف علبة البيئة

وناوى شوية كدة اعمل موضوع الماسورة بالفلنشات واشيل العلبة واجرب انهى وضع افضل وانا متأكد ان الماسورة هتكون كاصوت افضل من العلبة الصغيرة لأنها مفهاش فراخ العادم يرن جواها فبالتالى انبعاثات الصوت هتكون اهدىء بكتير
هو انا كنت رايح اعمل الماسورة بس بتاع الشكمانات اقنعنى ان العلبة الصغيرة افضل فا قالى جرب دى مرتحتش ليها يبقى اشيلهالك واركبلك الماسورة.... فا عشان الوضع عندى بقى افضل بكتير من ايام علبة البيئة البايظة والاصوات والخروشة ومزيكة حسب الله اللى كانت عملاها فرضيت بالوضع وقولت لما ابقى ازهق من صوت النعرة اللى هيا موجودة اصلا فى النوبيرا بس بصراحة بقت اقل من الاول لأن العلبة صغرت زى ما وضحت ابقى اشيلها واركب ماسورة بفلنشات

حضرتك قدامك تجربتى ممكن تحكم منها..... بس افشل حاجة كاصوت للشكمان العلبة اللى فيها ماسورة مخرمة لأنك زى ماقولت حاسس انك راكب عربية فيها جكمان فيات قديم
وربنا يوفقك ان شاء الله... وارجو من الله ان اكون افدك بشىء

[ENG\AHMED]

العلبة لسة معملتش شربون
و دا ان رواسب الكربون فى العادم بتسد الفراغات الى بين اللحامات الى فى العلبة الجديدة
فا استنى شوية اسبوعين مثلا لو الصوت مرحش كدة فى حاجة مش مظبوطة

+1



البديهى ان الماسورة هى اللى هتعلى الصوت مش العلبة اللى فيها مواسير مخرمة لأن علب الشكمان كلها نفس الموضوع ماسورة مخرمة لتقليل الصوت والضغط
بالنسبة لموضوع الصوت لازم هتلاقى الصوت متغير مادام لغيت علبة البيئة

[waleedraafat]

ممتاز جدا

يعني انا لو غيرت بماسورة فقط هيبقي الصوت طبيعي
انا موافق اجرب بس لو حد يدلني علي بتاع شكمانات فاهم ومتجرب وانا اعملها عنده علشان انا قلقان اجرب الموضوع ده مع واحد بيفتي يبوظها زيادة وبرضك هياخد فلوس

يا ريت اخونا zocor742 او ابو فارس يدلني علي حد متجرب وانا اغيرها فورا عنده بس يا تري التكلفة كام (انا الموضوع اتكلف معي عند الميكانيكي 60جم)

[waleedraafat]

يعني اصبر شوية علي العلبة الي معيا ولا رايكم ايه

[sherif_84]

انا سألت على علبة البيئة عند ابو الحسن لقيتها بـ 230 جنيه وعلى فكرة ياجماعة اللى بيميز شكمانات الدايو ان كلها نظام فك و تركيب يعنى مافيش لحامات مقارنة بالفيات مثلا وده يعتبر افضل من وجهة نظري

[zocor742]

بص يا استاذ وليد رأفت مش كدة بردو الاسم
عندك تقريبا 3 حلول متفاوتة فى الاسعار هرتبهنلك من الاغلى للأرخص
1- انك تجيب علبة بيئة جديدة بس تكون نوع او صناعة كويسة عشان تعيش معاك.... ودى هتكلفك من حوالى 450 الى 1000 جنية ودى هتكون علبة زيها زى اللى باظت بالفحم بتاعها ودة اكيد هو الحل اللى يرجع الامر فابريكة على ابوة زى ما كان فى الاصل كأنك شيلت قطعة غيار باظت ونزلت مكانها قطعة سليمة .... بس مكلفة

2- عندك حل تانى بردو كويس وانا الوضع عندى كدة حاليا .... بتاع الجكمان بيوفق علبة بس اكيد من غير الفحم يعنى فاضية تمام .. بس بالتالى هترن معاك عشان الفراغ داخل العلبة فا بيركب علبة اصغر من حجم علبة البيئة تقريبا فى نص حجمها وفاضية دى الصوت اللى هيرن من الفراغ هيكون اقل بكتير عشان الحجم اقل النص تقريبا...... كاتكلفة مابين 100 ل150 ثمن العلبة بالمصنعية وكدة .. بس هتكون عامل حسابك ان صوت الجكمان هيعلى نسبة بسيطة حوالى 10% مش قاضية عادى مش هتحسها اوى

3_ ماسورة وتفضل بفلنشات بدل اللحامات بس للأمانة الوضع دة مجربتهوش بس كتير من الاخوة اللى ركبو ماسورة مش بيشتكوا منها بالعكس بيقولوا السحب بقى جميل عن وضعها الاصلى بعلبة البيئة وهيا سليمة يعنى بتظبت السحب..... التكلفة هتكون ثمن الماسورة والمصنعية وعشان معنديش تجربة مع حد عملها قدامى بالتالى مقدر افتى بالسعر

حضرتك ال 3 اختيارات دووول افضل من وضع العلبة بداخلها ماسورة مخرمة
ممكن تجرب موضوع الفلتر اللى هو علبة اصغر حجما من الاصلية لتقليل الانبعاثات الناتجة عن الفراغ داخل العلبة
وانا مجربها وتمام التمام والسحب متظبت الحمد لله
ولو الوضع معجبكش او عايز تركب ماسورة على طول بردو مفيش مشاكل ..... اقولك جرب بالماسورة الاول عشان ارخص عجبك الحال على الله معجبكش يبقى عليك وعلى العلبة الاصغر بس من غير ماسورة مخرمة بداخلها
ولو حضرتك عايز الوضع زى ماجبت العربية زيرو من غير تعديلات الماسور او العلبة يبقى عليك وعلى علبة بيئة جديدة بس فى الحالة دى التكلفة عالية هتخش معاك بالميت ب800 جنية.. لسة واحد صحبى مغيرها فى اوكتافيا من اسبوع ب1100 وكان فية اقل واعلى فى السعر
حضرتك احسب الموضوع مع نفسك وشوف اللى يناسبك ماديا ونفسيا قبل كل شىء عشان هيا فى الاول والاخر عملية قبول او غير قبول للوضع
والله الموفق ان شاء الله
بالنسبة لمكان حد بتاع جكمانات انا من الاسكندرية فلو حضرتك من عندى ادلك على ورشة تمام التمام
واى خدمة تحت امر حضرتك

[nasroo]

هي لانوس 1 فيها علبة البيئة دي ولا في لانوس 2 بس
من اللي انا قريته كده فهمت ان انسب حل انك تحط ماسورة بدل علبة البيئة

[waleedraafat]

شكرا جدا للاستاذ zocar وللجميع لردودكم
انا صحيح مهتم بالبيئة بس اخر الاهتمام ده بتاع 100 ل 200جم مش اكتر فموضوع 750 او 1000 وخلافة مستبعد جدا بالنسبة لي (انا بجمع القسط اخر الشهر بالعافية دا غير اني مش مقتنع اني اجيب زيرو واقعد اصرف بالشكل ده)
المهم هشوف حل الماسورة ده لانه شكلة رخيص (انا مش فاكر كنت قريت هنا قبل كده انه بيكلف 40جم تقريبا) فالتجربة غير مكلفة ونشوف
وهو اصلا كده ولا كده انا مقتنع بالتضحية بهدوء السيارة مقابل مشاكل السحب والسخون الي اتحلت تماما معايا (انا كنت فين وبقيت فين دا صوت الخرم ده نعمة بس العربية تمشي)
دا غير ان العربية في الاساس صوتها عالي وكان الواحد راكب ديزل فا مش فارقة كتير
بس الاهم ان العربية تستجيب لدوسة البنزين مش ادوس البنزين ولاقي العربية زي ما تكون اوتوماتيك (تقعد شوية وبعدين تتحرك وتحس ان الموتور بينحر علشان العربية تتحرك)
الحمد لله دا انا في نعمة ، متشكر لردودكم