تجربتي مع سيارة لانوس بمسافة 50 ألف كم

[Dr_Mido_1985]

بسم الله الرحمن الرحيم
انا اتابع منتداكم دائما و حبيت انقلكم تجربتي مع سيارتي بعد مرور 50 الف كم كاول مشاركة لي وياريت لو حد حب يضيف تجربته مع سيارته ورضاه من عدمه علشان كلنا نفيد بعض
سيارتي لانوس 2 موديل 2008 نصف كماليات
ثمن السيارة وقت شرائها 63500 زيرو
انا استخدم السيارة كثيرا وقطعت مسافة 50 الف كم في خلال سنة و 9 شهور فقط اي بمعدل 2380 كم شهريا يعني حوالي 80 كم كل يوم

مصاريف السيارة حتي هذه اللحظة
ترخيص
1000 ج
تأمين
3500 ج
زيت
1500 ج (5 موبيل 1 10000 كم و فلاتر زيت)
بنزين
11000 ج (حوالي 5676 لتر بنزين 92)
صيانات
2 فلتر هوا - بوجيهات 1 شمعة و بوجيهات 2 شمعة - اسلاك بوجيهات - 2 تيل فرامل - 2 فلتر بنزين - سير دينامو - سير تكييف - سير كاتينة
يعملو حوالي 1000 جنيه تقريبا
مصناعيات
300 ج
غسيل وركن
2100 ج
الاجمالي في 21 شهر=20400 ج (حوالي 970 ج)

مميزات السيارة
قطع الغيار رخيصة ودي ميزة رائعة تكفي لان تشتري السيارة
سعر مناسب
ثبات معقول حتي 120 كم مقارنة بمثيلاتها من السيارات
تجميع مناسب بعد 100 كم
مساحة داخلية مناسبة
الصالون بسيط وعاجبني بالكرفات اللي فيه

عيوب السيارة
الفرامل سيئة جدا ولا تصلح ان تستخدم في عربية كارو
العفشة سيئة جدا وبحس بكل الطوب والزلط وحتي الرمل علي الطريق
صوت العربية بعد 90 كم عالي جدا
السحب ضعيف ولازم تقرص علي الغيار علشان العربية تجري معاك
التكييف نص كم وبياثر جدا بالسلب علي سحب العربية
واطية و4 اشخاص كفاية انك تسلم علي المطبات
شنطة ضيقة

المشاكل التي واجهتني
تقطيع علي سرعة 60 فما فوق وكنت ساعتها علي الصحراوي وربنا ستر ولاقيت ميكانيكي صلحها وقالي كان في مشكلة في الفيوزات
الطنابير عاوزة تتغير بتعمل رعشة جامدة مع الفرملة
العربية كلها فيها تخبيط ولقلقة من الصالون (التابلوه والشبابيك)
دواسة الدبرياج فيها تزييق جامد ورخم بس لسه ماصلحتهوش
الدركسيون عندي تقيل جدا ولا يمت للباور بصلة ومش لاقيله حل
رعشة في العربية بعد 100 كم حتي بعد ما عملت ترصيص

رأيي الشخصي
المميزات كتير والعيوب بردو كتير
حاليا انا مقتنع باختياري لاني حاسس ان العربية استحملتني كتير مع تنقلاتي الكتيرة
بس لو رجع بيا الزمن مش ها اشتريها تاني وبردو مش ها اتختار كوري تاني
ياريت اسمع ارائكم
شكرا ليكم و اسف علي الاطالة