أختيار الرشاشات الأنسب للنوبيرا

[SBkr]

السادة الزملاء انا بصدد تغيير الرشاشات لعربيتي النوبيرا البريميوم غدا بإذن الله ولكن عندما سألت عن البدائل وجدت اختيارين
1- الأول رشاش افيرنا وهو مثل رقم 2 في الصورة المرفقة
2- رشاش أوبترا وهو مثل رقم 6 او 7 في نفس الصورة اظن ان كلاهما يصلح كما ذكر الزملاء
ولكن هناك اسئلة
1- ما الفارق بين النوعين او ببساطة ايهما افضل للنوبيرا مع العلم ان الأصلي بالسيارة مثل رشاش الأوبترا
2- رشاش الأوبترا بفتحتين اي ثقوب اخراج رذاذ الوقود فقط اثنين في حين سبق وان شاهدت رشاش لنوبيرا اخري وكان سبعة ثقوب !!!
3- رشاش الفيرنا بأربعة ثقوب
4- كل الرشاشات الإستعمال عفوا شكلها سيئ جدا ولكن الشراء بناء علي التركيب والتجربة والإختبار فهل هذا كافي للتأكد من مستقبل الرشاش
5- ماذا لو فككت الرشاشات عندي ووجدتها سبعة ثقوب وهذا بالطبع افضل لأنة يعني ترذيذ افضل Better atomization or spraying للوقود مما يعني حرق اسهل
6- كان في دماغي فكرة وهي ان اقوم بمحاولة اختبار رشاشاتي اولا بالتشغيل الخارجي وتنظيفها بمنظف الكاربيراتير سبراي يحتوي عل اسيتون ومذيبات قوية من خلال الرش في دخل الوقود اثناء التدوير وتوصيلة السوكيت الكهرباء الخاص بة خارجيا وهذا ما افكر ان اقوم بة قبل تركيب رشاشات الفيرنا برضة اية رأي الزملاء
7- اختبارمقاومة الرشاش بالفولتميتر للتأكد من صلاحية مقاومة الملف القابض .... موش عارف الصنايعية هيعملو فيا اية بكرة كان نفسي يكون عندي الثقة اعمل دة لوحدي

[samirayad]

6- كان في دماغي فكرة وهي ان اقوم بمحاولة اختبار رشاشاتي اولا بالتشغيل الخارجي وتنظيفها بمنظف الكاربيراتير سبراي يحتوي عل اسيتون ومذيبات قوية من خلال الرش في دخل الوقود اثناء التدوير وتوصيلة السوكيت الكهرباء الخاص بة خارجيا وهذا ما افكر ان اقوم بة قبل تركيب رشاشات الفيرنا برضة اية رأي الزملاء
7- اختبارمقاومة الرشاش بالفولتميتر للتأكد من صلاحية مقاومة الملف القابض .... موش عارف الصنايعية هيعملو فيا اية بكرة كان نفسي يكون عندي الثقة اعمل دة لوحدي

طيب ماتنفذ الكلام ده أولا
1- أختبار تسييل وكل حاجه فى مكانها (المسطره بالرشاشات بره المكنه ومدى كونتاكت لتحضير الطلمبه)
ولو مفيش أمكانيه ممكن تختبر التسييل للرشاشات لوحدها على أى جهاز أختبار مخصص لذلك وأنت واقف
لو الرشاشات مبتسيلش
يبقى دى خطوه كويسه وممكن تعمل تنظيف بعد كده

2- أختبار قياس مقاومة الكويل الكهربى الداخلى
لقيت المقاومه فى الحدود المسموحه

يبقى ده بريق أمل كويس

وعند شرائك لأى بدائل للرشاشات
يجب الألتزام بمعدل التدفق للبنزين
ومقاومة الرشاش
وأبعاده الظاهريه

طبعا مع أى رشاش ( مهما كان )
كل مازادت ثقوب الفونيه
كل ما أخدت آداء أفضل من عملية الحريق
والسبب معروف كما تفضلت أنت وأشرت
وهو أرتفاع كفاءة عملية التزرير مع الرشاش ذو الثقوب الأكثر عددا فى الفونيه الخاصه به

[SBkr]

أستاذنا الكبير سمير اشكرك علي سرعة الرد وهذا ماعودتنا علية دائما ... السؤال بالنسبة لمعدل التدفق للبنزين والأبعاد اكيد ظاهريا الرشاشات المرشحة مختلفة عن الأصلية بالسيارة فلماذا يشيع تبديل رشاشات النوبيرا برشاشات الهيونداي مع العلم انها لفيرنا ومحركها 1600 بينما سيارتي النوبيرا 1500 وهل يمكن لوحدة التحكم ضبط سرعة النبضة الدافعة للوقود او يمكن برمجتها من خلال جهاز scanner لقد اقلقتني بخصوص معدل السريان و الأبعاد ... الحقيقة ان موضوع تبديل الرشاشات للنوبيرا برشاشات هيونداي لدي الورش كأنة امر شبة روتيني ولكن الخوف من عدم تناسب البديل هندسيا مع النوع الأصلي فقد يعمل المحرك ويؤدي جيدا ولكن الفكرة في الإستدامة

[samirayad]

فلماذا يشيع تبديل رشاشات النوبيرا برشاشات الهيونداي مع العلم انها لفيرنا ومحركها 1600 بينما سيارتي النوبيرا 1500

ماحضرتك عارف
هو فيه حد بيلتزم بقوانين هندسيه
ماكل الصنايعيه شغاله بالبركه وماشى الحال

وهل يمكن لوحدة التحكم ضبط سرعة النبضة الدافعة للوقود

لا طبعا من نفسها كده مستحيل لأن ده برنامج معتمد على أشارات الحساسات
ومعمول حساب كل حاجه

او يمكن برمجتها من خلال جهاز scanner

أنا طبعا لست ضليع فى النواحى دى الى حد ما
ولكنى هاوى الى حد ما

وحترك النقطه دى للزملاء

لقد اقلقتني بخصوص معدل السريان و الأبعاد

مفيش قلق ولا حاجه أن شاء الله
فلو فرض وأشتريت رشاشات أستعمال
فالتمن بسيط وقد تولد معاك نتيجه طيبه

الحقيقة ان موضوع تبديل الرشاشات للنوبيرا برشاشات هيونداي لدي الورش كأنة امر شبة روتيني ولكن الخوف من عدم تناسب البديل هندسيا مع النوع الأصلي فقد يعمل المحرك ويؤدي جيدا ولكن الفكرة في الإستدامة

ماهو ده نظامنا فى مصر
أختراع البدائل بدون دراسه صح

بصراحه ومن غير نفاق
أنا ما شوفتش شعب على مستوى العالم
ممكن يخترع بدائل زينا
دى ميزه فى بعض الأحيان

فى الخارج
لازم كل قطعه تركب برقمها مكان القطعه التالفه
ومستحيل يحصل اللى بيحصل عندنا

[MMamdouh]

الرشاش رقم 2 اشبة برشاشات اللانوس الحديث و دة فيشتة مختلفة عن الفيشة بتاعتك

المحرك ال1500 راكب علية رشاش 135 سى سى فى الدقيقة و المحرك ال 1600 راكب علية رشاش 150 سى سى فى الدقيقة بالتالى الفرق يمكن اهمالة لانة صغير جدا... لاحظ ان نفس الرشاشات بتاعت ال1600 اللى بنركبها من الBMW ال1600 راكبة فى المكنة ال1800

الاهم فى كل الحوار دة هو مقاومة الرشاش... لو جبت رشاشات low impedance ألكونترول حيطير فا متغامرش مع اى رشاشات مجهولة الهوية او مش متجربة قبل كدة

MMamdouh

[MoMohsen]

هل يوجد اى بديل لرشاشات يابانى لان كما هو موضح ان اغلب البدائل بتكون كورى زى الالنترا او الاوبترا او المانى زى البى ام او الفيكترا.مع ان عمرى ما سمعت عن مشكلة رشاشت فى غربيات يابانى.
فلو فيه بديل زى مثلا الكورولا او اللانسر ينفع يركب على النوبيرا يا ريت حد يوضحه.

[MMamdouh]

no idea... sorry

MMamdouh

[SBkr]

طيب مفروض تكون مقاومة الرشاش تقريبا كام انا قرأت انها الطبيعي من 12 -18 أوم بغض النظر عن الموديل اونوع الرشاش علي اعتبار ان الخروج عن هذا النطاق يعتبر مؤشر لتلف الرشاش اصلا ... الحقيقة الموضوع محير جدا وخاصة عدد ثقوب الرشاش وحجمة وطولة وتأثير هذا علي شكل دفعة الوقود ومدي تلاقيها مع الشمعات أنا عارف انك يا استاذ محمد بتميل للرشاشات الألماني البوش بس لو تعرف طريقة للحصول علي اربع رشاشات بوش كويسين لأن هنا في الشرم او المنصورة موش موجود الحجات دي خالص

[MMamdouh]

ألرشاشات بتاعتنا high impedance بالتالى مقاومتها فى حدود ال 12 اوم... الرشاشات التانية الlow impedance بتبقى 6 اوم فقط... طبعا زيادة مقاومة الرشاش دليل على قلة كفائتة

عدد الفتحات و كدة حيفرق فعلا بس مش بالشكل اللى انت متخيلة... احنا اخرنا شوية مشاوير على الرفيع و بسرعات قليلة بالتالى فرق الاداء مش حيبقى محسوس خالص

لو عايز عدد فتحات كتير يبقى هات رشاشات الBMW بتاعت المكنة ال M43 و دى ليها 3 فتحات تغدية داخل هاوزنج مثلث فيبر... بس دول قليلين شوية و اكيد حتلاقيهم اغلى

MMamdouh

[SBkr]

الحمد لله حسمت موضوع الرشاشات
النهاردة بعد ما استخرت ربنا رحت قلت اجرب موضوع الكشف تاني سكانر ثم افك الرشاشات واختبرها قبل قرار التغيير لقيت الإسكانر الوحيد بشرم الشيخ نزل القاهرة علشان ينزلة برنامج الإسبيرانزا 2010 قلتلة طيب اكشف علي الرشاشات واختبرها بجهاز الألتراساوند قالي رشاتك كويسة (قعد يزود ويشم العادم !!!!) المهم حسسني اني جاي من المريخ والسيارة ليس بها اية شيئ غير طبيعي وندة علي الصنايعي فك البوجيهات وكانت المفاجأة
1- اني لقيت البوجيهات موش مكربنة ولا مهببة ولونها تقريبا اللون الإستاندارد للحرق الطبيعي مع ان العادم رائحتة برضة موش حلوة بنزين غير محترق وخلافة
2- المفاحأة الثانية وهو اني وجدت ان البوجيهات المركبة بوش شمعة واحدة محترقة كليا من الجزء الخزفي في حين اني كنت مركب ngk اتنين شمعة منذ حوالي 9000 كم فقمت بتغيير البوجيهات برضة ب ngk اتنين شمعة ولهف 50 جنية (اسعار سياحي) حيث اكتشفت ان حدث تبديل لبوجيهاتي دون علمي عندما ادخلت السيارة لمدة يوم كامل مركز صيانة عفوا نصااااااااب (يسمي شارم أتوموتيف)منذ حوالي أربع شهور عند تغيير حساس الماب والذي سبق ان اتلفتة واضطررت للتوجة لة لأن لم يكن هناك بديل السيارة لم تكن تتحرك عفوا للتعبير مرة اخري ولكن السكوت علي الغلط سلبية اسعد بمواجهتا ولي مباراة منفصلة معهم
المهم رحت لميكانيكي عادي (بعيدا عن المراكز والأجهزة و الدكاترة) في المنطقة الصناعية وكان بيعمل جوان وش سلندر لعربية واحد زميل قلتلة الرشاشات عندي كذا والعادم كذا وكذا المهم قالي بكل بساطة طيب ما ننضفهم قلتلة بكل حذر فكيت رشاشات قبل كدة قال نعم قلتلة نضفتهم قبل كدة قالي ايوة قلتلة وفي نتيجة قالي طبعا قلت خلينا مع الشاب ذو العشرين ربيعا تشجيعا للوجوة الجديدة وبدأت القصة الغريبة
فك المسطرة و الرشاشات وكنت شاري علبة منظف ااربياتير طولها نصف متر ونضف المسطرة والخطوط و الفايص وكل المكونات وجينة للمهم الرشاشات فكانت المفاحأة الأول
1- النوبيرا البريميوم الكوري 1500 سي سي تحتوي علي رشاشات من نوع سيمنس بها ثقبين وهي تشبة رشاش الأوبترا الخليجي تماما ولاتشبة رشاشات الفيرنا وهو مثل صورة الرشاش المرفقة تماما لكن لونة ازرق في اسود
2- الثقبين موجودين بقاعدة الرشاش فيما يشبة ثقبين مشطوفتين اشبة بشطف سن الأبرة الطبية وهو تقريبا لتوجية دفعة الوقود بإنحراف جزئي وليس للأمام مباشرة وهذا يعني ان اي تغيير عن هذا المبداء معناة النزين هيبعد عن هدفة المطلوب
3- لقيت الشاب ذو العشرين ربيعا عندة فيشة بسلكتين وعلي بطارية عربية زميلي المفكوكة وقعد يلمس بتقطع وزميلة يرش في الرشاش وانا اقلة عملت الحكاية دي قبل كدة ولا هتحرق ملف الرشاش قالي عيب اقلة الفولطية من euc ممكن تكون اقل من 12 يقلي انسي اقلة الأمبير عالي يقلي طب اية ياعني اقلة الوساخة هتخش جوة الرشاش من الفلتر لازم غسيل عكسي يقلي معرفهوش قلتلة بوظ ورزقنا علي الخالق يقلي هتدعيلي وقعدنا نعمي في الرشاش مع التقطيع او الفتح لفترة مع الرش لحد العلبة ام متر ما قربت تخلص وبعد ماطلع بلاوي من الرشاشات وخرج الإسبراي نضيف وكمان وهو بيرسم شكل الرذاذ كأنة في جهاز الألترا ساوند جاب مسحة شحم للجوانات قلتلة استني .... عاوز اقيس المقاومة وكنت واخذ الأفوميتر بتاعي قالي انت عليك حاجات يابشمهندس افو اية بس قلتلة انا سيبتك تعمل الي انت عاوزة سيبني اعمل انا الي نفسي اجربة وقيست مقاومة الرشاشات وكانت كما يلي 15.7 -15.6 -15.6 -15.4 ودة اعتقد في النطاق الطبيعي حسب ما شاهدت علي اليوتيوب من 12-18 اوم ركب الرشاشات وفتح مارش 3 مرات الحمد لله مسيلتش ركب دورنا العربية في الدوران متحسنتش كتير لكن العادم رائحة تحسنت بنسبة تقارب 90 بالمائة والأداء تحسن جدا استجابة السيارة افضل جدا جدا طبعا طولت لكن علشان الإفادة طلب الشاب ذو العشرين ربيعا 20 جنية فقط لاغير اديتلة 30 وندمت اني مدتلهوش 50 فقط لأنة مخلص وبيشتغل كأنة في عربيتة (لسة مصر بخير) وعاهدت نفسي اني اصلح اي حاجة عندة وبعيدا عن المراكز التي تعتقد انها مستشفيات دولية تعطي ماء المحاياة للسيارات ونقول يوضع سرة في أخلص خلقة

[SBkr]

الصورة في اللينك دة أو اكتبو siemens fuel injectors

الصورة في اللينك دة او اكتبو siemens fuel injectors

[SBkr]

شكرا لكل الزملاء شكرا لأستاذ سمير وأستاذ محمد دعمكم افادني جدا بس انا فضلت الإحتفاظ برشاشاتي لأنها فعلا بحالة احسن من كل المستعمل الذي رأيتة ولأنني عندما اغيرهم سأحاول شراء نفس النوع بالضبط جديد بسبب شكل الفتحات ولو من خلال النت

[MoMohsen]

طيب سؤال يا بشمهندس هى العربيه عندك ايه معدل استهلاك البنزين فيها و هل اختلف المعدل بعد التنظيف؟

[SBkr]

العربية استهلاكها اصلا حوالي 260 كم علي الطريق وتقريبا 210 او 200 داخل البلد لكن لاحظ دة جوة شرم الشيخ وهية موش زحمة زي القاهرة يعني برضة متقدرش تقول اختبار جيد جوة البلد ويمكن الفارق بسبب تكرار التوقف و الدوران - بالنسبة للتغيير لسة معرفش دلوقتي انا عموما فولت التانك وصفرت العداد وهقولكم علي التغيير

[sherif_84]

أنا سألت على الرشاشات للنوبيرا لقيت رشاشات اكسنت ممكن تركب فى النوبيرا او الانوس عادى جدا بس سعرها عالى قوى 700 جنيه للطقم ؟
ليه الرشاشات الجديدة غالية كده