و لو كلامى غلط ياريت تلحقونى قبل ما ااخد مقلب

[alaasal]

و لو كلامى غلط ياريت تلحقونى قبل ما ااخد مقلب

انا الحمد للة تقريبا اشتريت نوبيرا اتوماتيك 2003

او ما اخدتها اجربها سمعت فيها صوت غريب مع السرعة ( ونّة )


و لما سألت الناس قاللولى ونّة و اتوماتيك و نوبيرا يبقى الفتيس بايظ


و بعدين انا فكرت و عملت تجربة لوحدى مشست على الصحراوى و جبت 130 كم

و بعدين جبت الفتيس على n

مش كدة بردة يبقى زى المور اللى فى العادى

المهم الصوت مارحش

فاعتقد كدة ان الفتيس براءة و سليم

ولا انا حسبتها غلط

خصوصا انى رجعت على العفشجى اللى باتعامل معاة

اول ماركبها و مشى 20 متر فاللى عند بليتين عجل بايطين


اية رأيكم


يرجى من العضو عدم اغراق المواضيع الاخرى

برجاء فتح موضوع جديد

مشرف عام الكورى و الماليزى

[أبو صلاح]

انت فكرتني بنفسي والله اول ما بدات المشكلة اللي مودة عندي حاليا
بلي عجل اول حاجة قصة 200 ج وبعدين فك وتشحيم كبالن
وبعدين لاقدر الله فتيس

بس من خلال تجربتي ان بلي العجل بيعمل صوت خشونة مش ونة
والله علم

[alaasal]

هلى فعلا خشونة

انا بس التعبير خانى


بس انا لما اجيب الفتيس على n

مش معنى كدة ان الفتيس اتفصل و مالوش دعوة بالصوت

ولا اية؟؟؟

[badblood]

مدام ونة زي ما انت بتقول يبقى بلي وممكن يكون امامي وخلفي ؟

وعشان تعرف اذا كانت بلي ولا بسيطة جدا بنتدي بالــ (العجل الخلفي)
ارفع كل عجلة لوحدها ولفها بأديك لو سمعت صوت خشونة او ونة يبقى بلي

الامامي ممكن ميبنش لما تلف العجلة بأديك ممكن ترفع اجمب جمب لوحده وتدور وتطلع لو سمعت صوت الونه جايه من ناحية الجمب المرفوع يبقى بلي

[badblood]

هلى فعلا خشونة

انا بس التعبير خانى


بس انا لما اجيب الفتيس على n

مش معنى كدة ان الفتيس اتفصل و مالوش دعوة بالصوت

ولا اية؟؟؟

الصوت بيفضل ظاهر

[waleedrahmy]

غير البلي وبعدين شوف الصوت راح ولا لا

[A7MED_PHARMA]

لقيت لها حل ولا لسه...؟؟

[MoMohsen]

على فكرة غلط انك تجيب الفتيس على n و انت ماشى على سرعه.و المشكله اللى عندك بلى عجل و عشان تتأكد زى ما قال badblood
ارفع كل عجله لوحدها و لفها لو عملت ونه يبقى بلى

[zocor742]

كان عندى ونة بردو ظهرت من فترة روحت للميكانيكى جربها قالى دة بلى عجل وتقريبا من قدام .
رفع الجنب اليمين يعنى اليمين مرفوعين والشمال على الارض
عشق غيار وزود بنزين العجلة لفت من غير صوت واللى ورا لفها بأيدة مفيش صوت.
كرر نفس العملية بس العكس الشمال مرفوعين واليمين على الارض
جرب الشمال قدام اول مالفت صوت الونة ظهر شيك على اللى ورا بالمرة لقاها سليمة.
وغيرت بلى العجلة الشمال قدام والصوت راح بس فعلا الصوت بيحسسك ان الفتيس هو اللى فية حاجة.

اللى مش مستوعبة لحد دلوقتى ازاى لما رفع عجلة وساب التنية على الارض واحدة بس اللى كانت بتلف والتانية متحركتش ! ! ! ! مش لقيلها مبرر عندى

[alaasal]

و الله لسة

انا لسة شارى العربية و عندى يو الاحد راحة من شغلى بس مسافر مشوار القاهرة

ان شاء الله لو ماسفرتش هاروح اعملها

[A7MED_PHARMA]

ربنا يوفقك...وحاول لما تعملها
تقولنا كان فيها إيه..


وربنا معاك

[أبو صلاح]

اللى مش مستوعبة لحد دلوقتى ازاى لما رفع عجلة وساب التنية على الارض واحدة بس اللى كانت بتلف والتانية متحركتش ! ! ! ! مش لقيلها مبرر عندى

مهو ده اللي انا مستغربه

[badblood]

مهو ده اللي انا مستغربه

خلاص ارفع الاتنين اللي قدام مع بعض
وشوف الصوت جاي منين

[badblood]

مهو ده اللي انا مستغربه

جرب ترفع كل واحدة هتلاقي الموضوع بسيط جدا
وده احسن عشان تسمع كل عجلة لوحدها

[MMamdouh]

اللى مش مستوعبة لحد دلوقتى ازاى لما رفع عجلة وساب التنية على الارض واحدة بس اللى كانت بتلف والتانية متحركتش ! ! ! ! مش لقيلها مبرر عندى

مهو ده اللي انا مستغربه

انتوا بتفكرونى باول رهان كستبتة فى حياتى من خالى رحمة الله علية

القصة دى بتحصل لان اى عربية فيها جهاز فرقى differential او زى ما بنقول عليه احنا كورونة... شغلة الجهاز الفرقى دة تقسيم العزم اللى جاى من الفتيس على العجلتين بس حسب مقاومة كل واحدة فيهم للدوران... برضة يعنى ايه الكلام دة؟؟

دلوقتى فى خط مستقيم العجلتين اليمين و الشمال (بغض النظر هما قدام ولا ورا) بيلفوا بنفس السرعة تماما نتيجة السير فى خط مستقيم.... الوضع بيختلف لما العربية تحود

فى حالة الانعطاف العجل اللى على الطرف الداخلى للملف (العجل الشمال فى ملف شمال) بيمشى مسافة اقل من العجل الخارجى... و بما ان كل عالعجل مربوط بجسم العربية و مينفعش عجلة تسبق التانية يبقى لازم العجل الخارجى دة يلف اسرع من العجل الداخلى عشان يعوض فرق المسافة

لو العجلتين مربوطين مع بعض بشكل مباشر حتلاقى العجل الداخلى بيلف على الفاضى لانة بيلف اسرع من اللازم و فى نفس الوقت العجل الخارجى تحس انة بيفرمل شوية لانة بيلف ابطاء من اللازم... طبعا بدة بياكل كاوتش و بياثر على قدرة العربية على الانعطاف و ممكن يؤدى لفقد السيطرة لو السرعة عالية و الملف ضيق

لحل المشكلة دى تم اختراع الجهاز الفرقى و هو مكون من مجموعة تروس متركبة بالشكل اللى فى الرسمة دى و شغلتها انها توزع العزم بشكل متناسب حسب مقاومة كل عجلة للدوران... يعنى كل ما مقاومة العجلة للدوران تقل تاخد عزم اكتر



فى الحالة اللى بتتكلموا عليها كان فيه عجلة على الارض و عجلة على الهوا... يعنى عجلة مقاومتها للدوران صفر (اللى فى الهوا) و عجلة مقاومتها 100% (اللى فى الارض)... العزم اتوزع بعكس النسب دى فا العجلة اللى فى الهوا اخدت 100% من العزم و اللى على الارض اخدت صفر.......... و لما ترفع الجنب التانى و تنزل الاولانى حيتعكس الوضع و حتشوف برضة العجلة اللى فى الهوا بتلف و التانية واقفة

فيه دلوقتى انظمة متطورة بالنسبة للدفرنشيال دة و فيه انواع بيتقال عليها lock و دى مبتسمحش بوضع توززيع عزم 100/0 دة عشان لو العربية غرزت مثلا متبقاش عجلة معندهاش اى تماسك و بتلف على الفاضى و اللى ماسكة فى الارض واقفة تماما و فى العربيات الرياضية لما تكبس بنزين جامد فى ملف العجلة الداخلية تامرك و اللى برة بتلف عادى (دة حبخللى العربية متعملش دريفت)

الرهان مع خالى رحمة اللى انة لو رفع كل جنب لوحدة العجلة اللى فى الهوا حتلف على الفاضى و العربية مش حتمشى و دة حيحصل فى الجنب اليمين و الشمال على حد سواء... و الحمد لله كسبت الرهان... ادعو لخالى بالمغفرة و ان يجعل مثواه الجنة

MMamdouh