سعر الاكصدامين الامامي والخلفي كام

[hossamhindawi]

السلام عليكم
اليوم والحمد لله عملت حادث وربنا العالم مكنتش السبب عربية فيات خبطت في العربية من الخلف وربنا ستر قامت العربية نازله فى طريق جانبي نازل المهم عدت على خي لكن التلفيات كانت
1- الاكصدام الامامي اتكسر خالص
2- الاكصدام الخلفي اتكسر طبعا
3- الفانوس الخلفي يمين
4- الفانوس الامي يمين
5- الشنطة وغطاها اتطبق على الاخر
رحت للسمكري قالي هأخد 500 جنيه واظبطهالك زي الاول طبعا غير المعجون والدهان والكهرباء وغيره
المهم دلوقي عايز اعرف ثمن الحاجات اللي ذكرتها جديده او استيراد
+ غطاء شنطة العربية
على فكرة العربية لانوس 1 موديل 99
وشكرا جزيل لكم واسف على الاطالة

[yssryaae]

حضرتك ممكن تشوف موضوع قائمة باسعار قطع غيار الدايو لانوس فى الموضوعات المثبته اكيد هتلاقى بعض الحاجات اللى انت بتدور عليها

[hossamhindawi]

شوفتها مكنش فيها سعر الحاجات دي
الرجاء اللي يعرف يقوللي ضروري محتاج اسعارهم

[dr.hany]

الحمد له وربنا ستر....شوف المشاركه ديه كده

للاخ
megosoft

http://www.nilemotors.net/Nile/19945-a-17.html

[محمد الشامي]

قدر الله وما شاء فعل يا اخي , والف حمد لله على سلامتك ودي اهم حاجه

بالنسبه للشنطه والغطاء بتاعها ممكن تروح لسمكري محترف فعلا هيرجعلك الدنيا دي زي ما كانت بإذن الله , ونصيحه بلاش الاكصدامات الجديده (الصيني والتايواني) لانها من اقل لمسه بتتكسر زي البلاستيك , لو الاكصدامات القديمه فيهم امل ممكن تظبطهم عند واحد بتاع فايبر

[mahfouz1983]

والله يا باشا انا شاري اكصدام امامي لعربيتي النوبيرا ب160 جنيه وبعدين لو اتكسر فعلآ في داهيه مش مشكلة بس بيدي منظر حلو للعربيه احلي من المنظر بتاعها لو هتصلح القديم هيبقي معجز العربيه ولو حتي اتكسر هيترمي ونجيب واحد جديد شوف التكلفة كام لو التكلفة بتاع التصليح هتبقي قريب من السعر الجديد يبقي الجديد افضل بكتير

[mahmoudysf]

الف سلامة ليك
في عضو عامل مشاركة النهاردة بيقول انو جاب اكصدامين استيراد ب 800 جنية

[popahly]

الف حمد الله على سلامتك انت وقدر الله ما شاء فعل وكله بيتعوض الحمد لله على كل حال...
انا ممكن افيدك فى اللى انا اعرفه لانى كنت من يومين تقريبا بدور على أكصدامات المهم انا سألت على الجديد لاقيت مفيش الا الخلفى عند المنير وكان بـ 150 ج صينى طبعا.. ريحت نفسى وقولت بدل مرش الجديد اجيب استيراد بنفس اللون بالظبط بتاع العربية وكانوا غالين شوية بـ 800ج الأمامى والخلفى بس منزلهم من على نصين عربية لانوس بتوع الفبريكة وربنا يعوض عليك

[yssryaae]

روح لصنايعى محترف يصلح لك الاكصدامين ومع الدهان النضيف هيبقوا كويسين اوى بدل التكلفة العالية لو انت اشتريت غيرهم بالنسبة لاسعار الفوانيس فهى موجودة فى موضوع قطع غيار اللانوس بس شوف واتاكد

[dr.hany]

انا سالت على الفانوس الامامى.الصينى ب65 والتايوانى ب120

[تامر.محمد]

بالنسبة للفوانيس
رأيي انك تجيب اصلي و ده غالي شوية (حوالي 400 جنيه للفانوس الأمامي ) او تجيب استيراد من الحرفيين ( حوالي 200 جنيه للفانوس الأصلي النضيف )

بالنسبة للفانوس الخلفي
انا كنت جايب فوانيس تركي جزئين الفانوس مع بعض بحوالي 100 جنيه , بعد سنة واحدة اصفرت , في حين ان الجزء الأصلي اللي كان راكب من قبلهم لسه بلونه

[yssryaae]

طيب لو عندى جزء من وش الفانوس الخلفى مكسور لازم اغير الفانوس كله والا الوش بس بيتغير والاقيه فين وش الفانوس لو موجود

[تامر.محمد]

طيب لو عندى جزء من وش الفانوس الخلفى مكسور لازم اغير الفانوس كله والا الوش بس بيتغير والاقيه فين وش الفانوس لو موجود

فيه ناس قالوا لي ان فيه مصنع بلاستيك في الضاهر بيعمل وشوش , بس انا عمري ما رحته
لو مش كده يبقى هاتغير الفانوس كله

[hossamhindawi]

شكرا يا جماعة على كل الردود لكن الاكصدامين فعلا حالتهم مش ممكن يتصلحوا انا قولت اعمل العربية على نضيف واظبطها على الاخر بس
الاسعار دية شاملة كل حاجة في الكصدام ولا ده وش الاكصدام بس لان السمكري بيقولي عايز وش الاكصدام اللي حامي الشاسيه وهو حديد بيتحط ورا الاكصدام
والف شكر يا جماعة على ردكم

[YOUSSEF_JO]

قدر الله وما شاء فعل
.................................................. .............
انزل بنك الاسكان في بورسعيد (فصال وحجات اصلي )
رحت وجبت مراية نوبيرا شمال كاملة كهربا ب90 جنية بعد الفصال طبعا حين انها هنا كانت ب 130 الي 150
..............................او ..............................
الحرفين في القاهرة بس حاول تفك الي انت عايزة من انصاص العربيات
وفاصـــــــــــــــــل براحتك
واسئل عند كازا محل