مناقشة عامة بخصوص صوت العربية اللانوس

[تامر.محمد]

سلام عليكم
جوة الكابينة بتاعة العربية
على السرعات البطيئة , و العالية احيانا
عندي العربية بيبقى صوتها مسموع اوي كأنها عربية موديل تمانينات , او مش هاقول تمانينات اوي يعني , بس انا مثلا سقت النهارده شيفروليه لانوس جديدة , فرق الصوت واضح جدا , الشيفروليه اهدااااااااااااااااااااااااااا بكتير اوي , في المقابل انا متأكد ان موديلات اللانوس الأخيرة من الدايو كانت هادية برده ؟
ايه في رأيكم اللي ممكن يسبب ان العربية يبقى صوتها مسموع ؟؟

[محمد الشامي]

من رأيي ان اكتر الأسباب اللي ممكن تزود الصوت داخل كابينه اللانوس هي :-

1- خشونه في بلي العجل
2- صوت الموتور عالى بسبب خلل ما
3- مشكله في الشكمان (ثقب او انسداد في مجرى العادم)
4- الجنوط والكاوتش وحشين
5- عفشه وحشه او ناشفه زياده عن اللزوم وبالتالي توصيل اي صوت او اي حركه لجسم العربيه ومنها للكابينه
6- وجود تريحيات بسيطه في الأبواب نتيجه هلاك كاوتش عزل الأبواب
7- عدم صيانه أجزاء العربيه بشكل عام حسب الجدول الدوري لها , صيانه محرك , عفشه
8- اتوقع كمان ان العازل الداخلي لشنطه العربيه بيكون ليه تأثير في ظهور الصوت في حال عدم وجوده

[تامر.محمد]

صباح الفل يابو حميد

طب انت كده قلت مجموعة من النقط
عشان نبقى واضحين انا اقصد صوت ال( عنننننننن) اللي بتسمعها لو تدوس بنزين و تتحرك على اي سرعة , و بتبقى اوضح في السرعات البطيئة

1- خشونه في بلي العجل
و دي متهيأ لي ممكن نكشف عليها برفع العربية و نخلي العجلة تجري بالقصور الذاتي و نشوف
اظن ان ممكن يبقى فيه مشاكل من بلي تاني كمان زي بلية الدينامو و التكييف , بس مش عارف نعرفها منين , و اظن لو وحشين الصوت هايبقى عالي لو العربية ماشية ممورة , ده مش عندي

2- صوت الموتور عالى بسبب خلل ما
و دي نعرفها ازاي ؟

3- مشكله في الشكمان (ثقب او انسداد في مجرى العادم)
و دي برده نعرفها ازاي ؟ , انا اصلا مفروض شكماني جديد , بس اهو الواحد يعرف , و هل ممكن يكون عيب جوان مثلا ؟
4- الجنوط والكاوتش وحشين
اظن لو وحشين الصوت هايبقى عالي لو العربية ماشية ممورة , ده مش عندي الا على الارض الخشنة و ده كاوتش
5- عفشه وحشه او ناشفه زياده عن اللزوم وبالتالي توصيل اي صوت او اي حركه لجسم العربيه ومنها للكابينه
بس دي بتبان في الأرض المسكرة بس , ما اظنش هايبقى ليها علاقة بال ( عنننننننننننننن ) بتاعة العربية دي و هي اللي انا اقصدها بالصوت العالي
6- وجود تريحيات بسيطه في الأبواب نتيجه هلاك كاوتش عزل الأبواب
دي تقصد تعمل تكتكة , فاهمها و تقريبا مش عندي الحمد لله
7- عدم صيانه أجزاء العربيه بشكل عام حسب الجدول الدوري لها , صيانه محرك , عفشه
اظن دي بتصب فيما سبق
8- اتوقع كمان ان العازل الداخلي لشنطه العربيه بيكون ليه تأثير في ظهور الصوت في حال عدم وجوده
لو تقدر تديني تفاصيل اكتر عن دي يبقى جزاك الله خيرا

[محمد الشامي]

صباح الفل عليك يا باشا

كده انا فهمت من كلامك انك تقصد صوت (زننننننننن) بتيجي من ناحيه الموتور للكابينه

صح ؟

لو انا كنت متخيل الصوت صح يبقه في الغالب قواعد الموتور والفتيس , ودي ليها اختبار سهل

[تامر.محمد]

صوت عااااااااالي مصحوب بزن فعلا , و اللي انا ملاحظه انه بيبقى اوقات و اوقات , في بعض الأوقات بتبقى هادية اوي , بس مش زي الجديدة برده

بس كل اللي شافوا العربية قالوا لي قواعد الموتور و الفتيس سليمة , واقعيا انا مغيرهم من فترة مش بعيدة

[M.Zaher]

صباح الفل عليك يا باشا

كده انا فهمت من كلامك انك تقصد صوت (زننننننننن) بتيجي من ناحيه الموتور للكابينه

صح ؟

لو انا كنت متخيل الصوت صح يبقه في الغالب قواعد الموتور والفتيس , ودي ليها اختبار سهل

على فكره انا عندي الصوت ده و الميكانيكي قاللى القواعد فعلا ناشفه
بس عايز اعرف اختبارهم ازاي

[تامر.محمد]

ما بتفكروش نقابل بعض , و اهو بالمرة نشوف عربيات بعض ؟

[MMamdouh]

محنا كنا مع بعض الاسبوع اللى فات يا استاذ و انت اتاخدت غياب

MMamdouh

[تامر.محمد]

اخييييييييييييييييي
:(
ادي اخرة اللي ما يتابعش موضوع المقابلات
انا الخسران و الله يا باشا

ايه رأيك طيب يا باشا في موضوع الصوت ده ؟

[MMamdouh]

لازم اسمع الصوت بنفسى عشان اقدر احكم

MMamdouh

[محمد الشامي]

على فكره انا عندي الصوت ده و الميكانيكي قاللى القواعد فعلا ناشفه
بس عايز اعرف اختبارهم ازاي

بالنسبه لأختبار القواعد في حاله انها تكون بايظه او هلكانه

1- افتح كابوت العربيه , وتكون مطفيه
2- عشق ترس الغيار الأول
3- وانت واقف ادام الكابوت ومعاك واحد كمان مثلا , زق العربيه لورا وادام بقوه وهي واخده الغيار وتابع حركه الموتور والأصوات , وياريت لو تبص على القواعد وحركتها
---- لو القواعد سليمه هتلاقي الموتور بيتحرك ورا وادام مع الزق شويه صغيره وهتلاقي مفيش صوت طقه عاليه مثلا يدوب صوت تعشيق الترس مع الموتور
---- لو القواعد بايظه خالص هتلاقي الموتور بيتحرك بشكل مبالغ فيه مع الزق ورا وادام , وممكن تسمع صوت زي طقه عاليا شويه

4- بعد الإنتهاء من المرحله دي كرر نفس الخطوات بنفس الطريقه لكن مع تعشيق الترس على الرجوع للخلف (المارشدير)

اتمنى اكون قدرت اوضح الطريقه شويه , وسامحني لو كنت اتأخرت في الرد عليك شويه

[تامر.محمد]

يعني كده الموضوع وقف على ان لازم اللي يقول يسمع صوت العربية

[M.Zaher]

بالنسبه لأختبار القواعد في حاله انها تكون بايظه او هلكانه

1- افتح كابوت العربيه , وتكون مطفيه
2- عشق ترس الغيار الأول
3- وانت واقف ادام الكابوت ومعاك واحد كمان مثلا , زق العربيه لورا وادام بقوه وهي واخده الغيار وتابع حركه الموتور والأصوات , وياريت لو تبص على القواعد وحركتها
---- لو القواعد سليمه هتلاقي الموتور بيتحرك ورا وادام مع الزق شويه صغيره وهتلاقي مفيش صوت طقه عاليه مثلا يدوب صوت تعشيق الترس مع الموتور
---- لو القواعد بايظه خالص هتلاقي الموتور بيتحرك بشكل مبالغ فيه مع الزق ورا وادام , وممكن تسمع صوت زي طقه عاليا شويه

4- بعد الإنتهاء من المرحله دي كرر نفس الخطوات بنفس الطريقه لكن مع تعشيق الترس على الرجوع للخلف (المارشدير)

اتمنى اكون قدرت اوضح الطريقه شويه , وسامحني لو كنت اتأخرت في الرد عليك شويه

جزاك الله خيرا
طريقة سهلة و عمليه

طب الطريقة دي لو القواعد بايظه او اتهلكت
طب لو ناشفة عادي ولا برضه بتعمل صوت

[محمد الشامي]

طب الطريقة دي لو القواعد بايظه او اتهلكت
طب لو ناشفة عادي ولا برضه بتعمل صوت

بصراحه حكايه ناشفه دي صعب انها تبان بالطريقه اللي قولنا عليها

لكن في الحاله دي الميكانيكي نفسه ممكن لو بص عليها من اقرب مكان (من تحت العربيه مثلا) فأتوقع انها هتبان اكتر

وبعدين هو الأسوأ انها تكون بايظه خالص , لكن لو ناشفه فهي كده كده شغاله

[amgada7555]

مشكله في الشكمان (ثقب او انسداد في مجرى العادم)