اهلا اصدقائى انا بعت الدايو بتاعتى ورجعت لليابانى

[ahmedezzat78]

اكيد اليابانى احسن من الكورى لان مش معقول ان عربيه ب 70 الف فيها نفس امكانيات عربيه يابانى ب 130 الف و تكون بنفس الجوده اكيد اللاعتماديه اقل شويه و العمر اقل شويه

بس اللى مش قادر يجيب اليابانى يعمل ايه؟؟؟؟؟؟؟؟؟؟؟؟؟؟؟؟؟؟؟؟؟؟؟

مش معقول يكره عربيتوه و يولع فيها .......... اكيد لازم يعيش بيها لغايه ما ربنا يوسع رزقه

يا استاذ مودى انت كده اكنك شوفت واحد لابس بدله و قولتلو ايه البدله العفشة اللى انت لابسها دى ؟؟
شوف بدلتى احسن و افخم و اغلى و احسن من بدلتك

اكيد رايك الشخصى ده يبقى جارح للطرف الأخر......... فمن الأفضل مراعاه مشاعر الغير و خصوصا اذا كان صاحب البدله ما سالش حضرتك عن رايك

[Ahmed Anwer]

يا جماعة الموضوع قعد يوم محدهش رد عليه ،،

و بصراحة قلت الناس بتوع منتدي دايوو دول مية مية ،،

و هيطنشوا الموضوع ،،

لأنه في وجهة نظري مش مستاهل ،،

الأخ صاحب الموضوع ،،

الموضوع ده تعمله علي عربة لسه نازلة السوق ،،

مش علي عربة اتباع منها 160 الف عربية و بقالها عشر سنين في مصر ،،

الناس حفظتها بمعني الكلمة ،،

حضرتك جاي تقول الكلام ده و هيا أساسا خلاص هيوقفوا انتاجها


يعني مرت بكل الإختبارات ،،

[emadno1]

انا معاك ان الدايو مش بنفس كفاءة اليابانى و دة طبيعى عربيه صديقى انا باسوقها كتير تويوتا موديل 2006 اتوماتيك 1300 و بجيب بيها سرعة اعلى و ثبات اكبرمن الدايو بتاعتى لكن مش هوا دة اسلوب الحكم على عربيه و الدليل ببساطة المثل دة

انا وواحد صاحبى كنا عاملين تست درايف من يومين لعربيه كرايسلر M 300 طلعنا من خليج مكادى لسفاجا و العودة لما نزلت من العربيه حسيت ان الدايو و التويوتا والنيسان و ......عباره عن بط بلدى و ان دى اول مره اركب عربيه كانت ماشيه على سرعه 200كم ال rpm كان 4000 لفه بس و معدتش بيها ال 200 علشان كانت بتعمل cutoff لما توصل 200 ده غير حاجات تانيه كتير عاوزك انتى تحكم انهو احسن

لكن انا عربيتى الدايو موديل 99 مشتريها مستعمله من حوالى سته شهور كانت عامله 130000 كم و دلوقت عامله 148000 يعنى ثمانيه عشره الف كيلو فى سته شهور بمعدل 3000 كم فى الشهر بامشى بمتوسط سرعة 140 كم و عادى جدا امشى على 170 كم دة طبعا لانى مقيم حاليا فى الغردقه و قبلها فى شرم
خلال الست اشهر كل الصيانه اللى عملتها غيرت تيل فرامل مره و لما اشترتها غيرت سيور و فلاتر و زيوت بس
اعرف ناس كتير عندها دايو و مش بتشتكى منها خالص

لكن عيوب الدايو من وجهة نظرى
1- الاضاءه ضعيفة جدا لما باكون ماشى فى طرق صحراء بالليل مش بابقى شايف كويس
2- الفرامل ضعيفة شويه و دى مبحسش بيها قوى لانى مش من النوع اللى بلزق فى العربيات اللى قدامى غير لما انزل اجازه فى القاهرة ربنا يكون فى عونكم لانى بكره السواقه و اليوم اللى اتعلمتها فيه فى الاجازة

كل اللى اقدر اقولهولك ربنا يديك خيرها و يكفيك شرها

[badblood]

انا عندى لانوس 99 و الصراحة العربية يعتمد عليها الى اقصى الحدود و عمرها ما سخنت و المياه ببص عليها كل كام شهر و عمرى ماتكسر عامود و لا حاجة و انا مبعملش صيانة, بغير لما الحاجة تبوظ و عموما حضرتك حر فى رايك و طبعا من غير كلام اليابانى احسن بس الدايو برضه عربية ممتازة.

+100000000000000000000
طبعا كل واحد حر في رأيه (ولولا اختلاف الاذواق لبارت السلع)
بس انا بعشق اللانوس وخاصه لانوس 1

[lol656]

طيب مقوتش ان قطع غيارها برخص التراب مقارنة بالياباني والله كله بيعطل بعد كام سنه

[Shiref_mohamed]

انا مبسوط انك بعت الدايو مبروك عليك اليابانى

[shanodaa]

والله ان دلوقتى ركبت دايو 2004 ودايو 2000 مش لقى اى ميزة فى العربيه اللى انتم بتتكلموا فيها واحد صاحبى امبارح انكسر منه عمود الكامة وانا ايضا انكسر منى عمود الكامة اما مشكله الحرارة او نقص المياه واضح ان كل الاعضاء بيشتكو منه ولسه احنا فى الشتا مش عارف مش ملاحظين ان العربيه فيها مشاكل كتيرة طبعا انا عارف ان الكل حيرد على بهجوم جامد بس فعلا العربيه ده اعطلاها كتير جدا بالنسبه لليابانى عربيه لاتقارن وقطع غيرها غير معمرة يعنى العربيه ده تستعمل فى حاله الزيرو فقط ولكن يعنى بالكتير 3 سنوات وتبعها وتريح نفسك ويويل اللى يشتريها مستعمله والله انا ركبت عربيات يابانى وبعد ما ركبت اللانوس عرفت انى لازم ارجع اركب يابانى تانى واللى يكذبنى يشوف المواضيع والمشاكل انا اول مرة اشوف عربيه ينكسر عمود الكامة لوحده عن تجربه شوفت اربع عربيات واتنين فى المنتدى والشىء المهم فى العربيه مشكله الفرامل تعبانه اوى طبعا انتم عارفين الكلام ده فين بقى العربيه اللى انتم عاملين تشكرو فيها هى منظرها مش وحش بس مشاكلها كتير جدا وسلامى للجميع

وانت اشتريت اي ماركه في الياباني

[Thaer]

يا جماعة...
الموضوع رأي شخصي، و الاخ صاحب الموضوع قالاللي عنده و كان حابب ينصحكم "من وجهة نظره"
و ده بيحصل بكل حاجة، يعني لو انا اشتريت كمبيوتر عليه معالج Core 2 Due حيجي صاحبي و يقوللي يا راجل "ما دام انت جايب و جايب، يبقى تجيب Core 2 Quad و الا حتى Core i7"
طيب كلامه صح! بس انا معيش اشتري اللي قاللي عليه و على كل الاحوال اللي انا جبته مناسب لاحتياجاتي و كويس و ما شاء الله عليه، حلو و جميل.

يعني من وجهه نظري حضراتكم تقلتوها عليه شوية
و دمتم

[HAZOMAL]

يا جماعة عادى جدا اللانسر فيه ناس كتير بيهاجموها وهى عربية يابانى و رائعة

للاسف احنا ادمنا مهاجمة السيارات الممتازة

اكثر السيارات انتشارا اللانسر والدايو والهجوم عليهم مش حيقلل منهم ابدا

[lol656]

الله يسهلك عم وعقبالبنا

[محمد فريد]

أصلا موضوع حضرتك ولو انه من 2/2008 مالوش لازمه من الأساس ومبروك عليك اليابانى يا عم الحاج ولو فاتك اليابانى مش هيرجع تانى

[sayandro]

إزاي الa11 أحسن موش صعبة شوية

[samirayad]

الموضوع لا هو يابانى ولا ألمانى ولادياوله......الموضوع حسن استعمال وحسن تصادق مع السياره......والعربيه ممكن تقعد معاك مليون كيلو بدون مشاكل......بس المهم تعرف لونها.......أنا لسه وأنا مسافر فى طريقى لطنطا من يومين شايف عربيه كارو ساحبه وراها تويوتا كرولا موديلها مش أقل من 2005.....وياريتنى صورتها بالموبيل للتأكيد على صدق كلامى

[amirhamed]

كل حاجه وليها تمنها ولكن كم العربيات الدايو المنتشره دا اكيد له معنى واسباب وجيهه اللي تخلي الناس تقبل عليها بالشكل دا.
العربيه كويسه وعلى القد (اسعار قطع الغيار والصيانه) وليها ناسها اللي يعرفه قيمتها.
هذا لايمنع ان الياباني حلو والايطالي احلى والسويدي جميل والفرنساوي شيك والالماني شديد واعتقد كده وجهه نظري واضحه

[ahmed_bq]

يا جماعة عادى جدا اللانسر فيه ناس كتير بيهاجموها وهى عربية يابانى و رائعة

للاسف احنا ادمنا مهاجمة السيارات الممتازة

اكثر السيارات انتشارا اللانسر والدايو والهجوم عليهم مش حيقلل منهم ابدا

انتا جبت من الاخر على فكرة

خلي اللي يقول يقول لكن الحقيقة غير كده
لانسر ودايو اكتر سيارات منتشرة في مصر واكيد مش عشان هما وحشين بل بالعكس

وبالنسبه لبتعطل ولا لأا زي مالشباب قال ... على حسب استخدامك ومراعيتك للعربية وتمنها وقطع غيارها منتشرة وعلى اد القرشين اللي معاك