الى اصحاب النوبيرا 1

[mahmoudysf]

السلام عليكم
انا حبيت اعمل الموضوع دة لان النوبيرا 1 مش منتشرة كتير
فحبيت اجمع هنا مشاركات لاصحاب النوبيرا 1
كل واحد من اصحاب العربية يتكلم عن مزاياها وعيوبها
المشاكل اللي قابلته مع العربية وازاي حلها
ايه الحاجات اللي مشتركة فيها مع النوبيرا 2 من حيث قطع الغيار والعفشة
بالنسبة للاكسوار الخارجي زي الفوانيس والاكصدامات هل موجود جديد ولا استيراد فقط
واللي عندو اضافة تانية يقولها
الهدف نعمل مرجع عن العربية لكي يستفيد الجميع من خبرات زمايلهم اللي معاهم العربية
وشكرا ليكم

[Ahmed Nasser]

انا عارف ان الموضوع قديم بس لازم نتكلم فيه عشان اللى ميعرفش النوبيرا 1 يعرفها
بدل مانعمل موضوع متشابه

العربية بصراحة جميلة ومريحة

المزايا
كل اللى فى النوبيرا 2 هو اللى فى النوبيرا 1

العيوب
واطية على الارض
واستهلاك بنزين عالى الى حد ما جوه البلد
الصاج ضعيف
دى كل اعيوب اللى قابلتنى

قطع الغيار متوفرة
لسة من شهر تقريبا جايب فانوس امامى شمال ب 150ج
ومن اسبوع تقريبا فانوس شبورة شمال ب 50ج
ومتوفر الجديد والاستيراد

الحجات المشتركة فى النوبيرا1 والنوبيرا2
المكنة بس بتاع النوبيرا1 1500 وبتاع النوبيرا 2 1600 بس النوبيرا 2 اللى بتيجى من بره 1500
والكاوتشات والجنوط واحد
وتقريبا المساعدين واحد

المشاكل اللى قابلتى
مافيش مشكلة الحمدلله قابلتنى غير كانت قفلة بسيطة فى الضفيرة وحلها كان بسيط

[Car's Sniper]

المزايا
1- واسعة ومريحة
2-تابتة على السرعات العالية
3-على الطرق السريعة مابتستهلكش بنزين

عيوبها زى ما a333 قال(بس يعنى ايه a333؟؟ههههه)
1-واطية جدا واى مطب بيعلم على علبة شكمانها بس فى المقابل الوطى ده بيديها ثبات على الطرق السريعة
2-استهلاك البنزين الفظيع جوة البلد
3-الصاج خصوصا بتاع الشنطة لو حد ريح عليه براحة بيدخل لجوه

المشاكل اللى قابلتنى
اول حاجة حساس السرعة باظ وغيرته فى التوكيل
وتانى حاجة خرطوم الماب اتخلع وكانت اعراضه نفس اعراض الرشاشات وركبته وكل شىء بقى تمام الحمد لله
وثالثا العجلة اللى ورا شمال بقت بتصفر من يوم ماخدت مطب من اللى بيبقوا لتحت
ومؤشر البنزين بيهيس
وكلها مشاكل فردية

من يوم ماجبتها من 3 سنين ونص ماغيرتش فيها غير الزيت وفلتره والبوجيهات وحساس السرعة
وكل حاجة فيها زى ماهى حتى المية الخضرا بتاعتها

[mahmoudysf]

ياه اخيرا حد عبر الموضوع ده
شكرا للمعلومات يا باشا
ويا ريت اللي معاهم نوبيرا 1 يخشو يقولو تجربتهم مع العربية
واهم المشاكل اللي قبلتهم وازاي اتعاملو معاها

[Ahmed Nasser]

استاذ محمود انا بعتلك 3 رسائل على الخاص وصلوا ولا لأ

[Ahmed Nasser]

عيوبها زى ما a333 قال(بس يعنى ايه a333؟؟ههههه)

يعنى ايه !!!!!!

[Car's Sniper]

يعنى ايه !!!!!!

بجد نفسى اعرف تفسير a333..هل هو اختصار لحاجة...مجرد فضول
واوعى حضرتك تفهمنى غلط بخصوص الضحكة ..دانا حاططها بس عشان ماحدش يفتكرنى باتكلم بتعصب...مش قصدى حاجة تانية والله
تحياتى لحضرتك..وباعتذر لو كنت خرجت عن الموضوع

[Ahmed Nasser]

ياباشا ولا زعل ولا حاجة انا كنت عاوز اسم مختصر وسهل وانا اول حرف من اسمى بيبتدى بحرف a فعاوز اعمل اسم مختصر اعمل ايه ..... اعمل ايه ....... قلت هكمل 333 وهيبقى اسم مختصر وسهل ايه راى حضرتك .........

[Car's Sniper]

ياباشا ولا زعل ولا حاجة انا كنت عاوز اسم مختصر وسهل وانا اول حرف من اسمى بيبتدى بحرف a فعاوز اعمل اسم مختصر اعمل ايه ..... اعمل ايه ....... قلت هكمل 333 وهيبقى اسم مختصر وسهل ايه راى حضرتك .........

هههه نظرية بردو
اصل فيه ناس ممكن فى اول تسجيل ليها فى المنتدى بتروح كاتبة اى حاجة زى مثلا fghjk ولما يشوفوا المنتدى ويعجبوا بيه بيغيروا الاسم لاسم حقيقى وليه معنى
فانا فاكر ان حضرتك كنت عامل كده وبعدين لاقيت مشاركات حضرتك كتيرة فقلت اكيد الاسم ده ليه معنى ...ومن ساعتها الفضول مش عاتق
شكرا لرد حضرتك

[Ahmed Nasser]

هههه نظرية بردو
اصل فيه ناس ممكن فى اول تسجيل ليها فى المنتدى بتروح كاتبة اى حاجة زى مثلا fghjk ولما يشوفوا المنتدى ويعجبوا بيه بيغيروا الاسم لاسم حقيقى وليه معنى

اه بيحصل كتير جدا

فانا فاكر ان حضرتك كنت عامل كده وبعدين لاقيت مشاركات حضرتك كتيرة فقلت اكيد الاسم ده ليه معنى ...ومن ساعتها الفضول مش عاتق
شكرا لرد حضرتك

انا تحت امرك

[mero824]

نوبيرا 1

مميزات
- السياره يمكن تكون العفشه معمره قليلا عن ال2
- سحبها بعد الخامس ماتور 1500 بيكون مخيف عايزه تطيير اكتر من ال2
- تكيفها الكورى احسن من ال2
- مريحه زى ال2
- البوابه بتعتها مقرفة

العيوب
- الماتور نتيجه ماسبق عمره اقصر نسبيا من 2
- قطع الفيار الجديد منها قليل
- المرور بيقرفك كتير علشان المعوقيي منها كتير
- كل واحد يشفها حيقلك مبروك مش دى بتاعت المعوقيين
- شكل ال2 اقيم مش عارف ليه

[mahmoudysf]

استاذ محمود انا بعتلك 3 رسائل على الخاص وصلوا ولا لأ

وصلو يا باشا وانا متشكرا لذوقك

[mahmoudysf]

مميزات
- السياره يمكن تكون العفشه معمره قليلا عن ال2
- سحبها بعد الخامس ماتور 1500 بيكون مخيف عايزه تطيير اكتر من ال2
- تكيفها الكورى احسن من ال2
- مريحه زى ال2
- البوابه بتعتها مقرفة
انت تقصد البوابة بتاعة الاوربي لاكن الكوري مفيش منها مشاكل
العيوب
- الماتور نتيجه ماسبق عمره اقصر نسبيا من 2
- قطع الفيار الجديد منها قليل
- المرور بيقرفك كتير علشان المعوقيي منها كتير
- كل واحد يشفها حيقلك مبروك مش دى بتاعت المعوقيين
- شكل ال2 اقيم مش عارف ليه

بلنسبة للشكل دى اذواق وبتعجبنى كشكل عن 2
ويا ريت تفسير ازاي ماتورها اقصر عمرا من 2

[Car's Sniper]

مميزات
- السياره يمكن تكون العفشه معمره قليلا عن ال2
- سحبها بعد الخامس ماتور 1500 بيكون مخيف عايزه تطيير اكتر من ال2
- تكيفها الكورى احسن من ال2
- مريحه زى ال2
- البوابه بتعتها مقرفة

العيوب
- الماتور نتيجه ماسبق عمره اقصر نسبيا من 2
- قطع الفيار الجديد منها قليل
- المرور بيقرفك كتير علشان المعوقيي منها كتير
- كل واحد يشفها حيقلك مبروك مش دى بتاعت المعوقيين
- شكل ال2 اقيم مش عارف ليه

شكل حضرتك جربت ال1 وال2
ممكن حضرتك توضح حكاية البوابة والماتور...هل حصل ليهم مشاكل متكررة عند حضرتك؟؟
وبالنسبة للمرور فياما مشيت قصاد لجان (عتية) والحمد لله ماحدش وقفنى...لان معظم العربيات دى بتكون بتاعت ظباط (بعتبرها مصلحة) لان معظمها معوقين
والشكل بصراحة ال1 بتعجبنى اكتر من قدام وال2 بتعجبنى اكتر من ورا...بس ال1 من ورا شكلها هيبقى قيم جدا لو شلنا علامة الدايو ..هاتبقى ليموزين حقيقى:)
كنت انا وواحد صاحبى معاه نوبيرا 2 عايزين نبدل شنط عربياتنا مع بعض لان كل واحد عاجبه عربية التانى من ورا :)

[Ahmed Nasser]

معلش ياحماعة هو يقصد ايه بالبوابة ؟؟؟
الموتور عمرة اقصر من ال2 لانه 1500 ولا ايه ؟؟؟
حكاية المرور دى انا مجربتهاش غير مرتين
ساعة ما جبنا العربية كنا مركبين نمر تجارية وجينا بيها من بور سعيد للفيوم
وعدينا على لجان تفتيش مفيش حد قال بم
وسفرنا بعدها باسبوع من الفيوم الى شبرا مصر فى المظلات ركبنا جهاز الاعاقة
ورجعنا الفيوم ومفيش حد قال بم
لان العربية انتشرت انتشار رهيب اكتر حاجة بشوفها هية النوبيرا1