ارجو الافادة من اهل الخبرة موضوع مهم جدآ للجميع ؟

[ebrahim_mh]

انا معايا عربية نوبيرا 1 موديل97 كورى اصلى. عربية جميله ومريحانى جدآ من كام يوم حاسيت انها بتاكل زيت روحت عند كذا ميكانيكى والكل اجمع انه شنبر لسه فى بدايته
المهم انا ناوى اعمله عشان مدخلش فى مشاكل.
بس المشكلة انى روحت عند كذا ميكانيكى
*واحد يقولى مش هفك الماتور هعمله وماتور العربية راكب .
*واحد تانى يقولى لازم افك الماتور وانزله على الارض عشان يتاكد من كل حاجة فيه . الخوف لاحسن ميعرفش يركبه زى الاول . مع العلم ان ده مجهود كبير عليه ووقت كتير.
المهم انه التكلفة زى بعضهم من 400 الى 500 جنيه عند كذا ميكانيكى
والتصليح والتليين من 4 ال6 ايام
ياترى يا هل الخبرة
افك الماتور ولا لأ ؟ ولو انتم مكانى هتعمله ايه فى الموضوع ده ؟ولا ابيع العربية واخلص ؟ مع العلم ان حالة الماتور لسه معقوله .
ارجو الاهتمام والرد من اصدقائى الأعزاء وشكرآ للمساعدة والمشاركة .

[karimfahmy99]

اول حاجة الزيت اللى فى العربية دا عملت بية كام كيلو و نوعة اية ؟؟

تانى حاجة نقص الزيت دا ممكن يكون من وش السلندر و ممكن يكون من شنابر الزيت او ممكن يكون من ال 2

حكاية انك فك الموتور او عدمة دى حسب الميكانيكى ما بيسمع صوت الموتور و لو شاكك فى سبيكة و لا حاجة يبقى لازم يطلع اما لو شايف ان كلة كوبس بيفك و الموتور راكب و يطلع البستم من وش السلندر يعنى هيفك من تحت الكارتيرة و يفك مسامير البيلات و من فوق يفك وش السلندر و يطلع البستم . طبعا فى حاجة مهمة لما تعمل طقم شنبر برضة لازم تعمل شغل فى وش السلندر يعنى زى ما هتحكم تحت تحكم فوق يعنى طقم جلد صباب و رودية . و طبعا هتحتاج جوان كارتير و وش سلندر و تاكيهات و احتمال فرن

400 او 500 جنية دى اية ؟؟ مصنعية و قطع غيار و لا اية انت مش موضح

و برضة نستنى راى باقى الاعضاء الكرام

[organic_magic]

تانى حاجة نقص الزيت دا ممكن يكون من وش السلندر و ممكن يكون من شنابر الزيت او ممكن يكون من ال 2

تمام +111


معلش اتأكد كويس جدا من النقطه دى


وبعدين ممكن تعمل اختبار كبس للماتور وتشوف

[ebrahim_mh]

مشكوور يا استاذى العزيز على الرد السريع والاهتمام الله يجزيك خير
اوضح لحضرتك النقطة الاولى
انا بحط زيت شيل 5000 كيلو بعد 1800 كيلو نقص حوالى نص كيلو
ثانيآ انا اتاكد من انها شنبر عشان كل المؤشرات اكدت ده اولا ريحة دخان الشكمان كريهة و فى كبس هواء من خرطوم الفايز اللى خارج من الماتور حتى غطاءالزيت بتاع الماتور بيطلع منه هواء لكن بسيط غير ان اكتر من 4 ميكانيكيى اكدو انه شنبر
بس المهم افك الماتور ولا ايه عشان اتأكد من كل شئ

[ebrahim_mh]

صحيح نسيت اقولك على حاجة يا استاذى كريم هو ان مصنعية الميكانيكى 400 او 500 جنيه وقابله للتفاوض من غير قطع الغيار مع العلم ان حاجة العربية ديه رخيصة يعن الموضوع مش موضوع تكلفة المهم التركيب والصيانة يكونو صح

[karimfahmy99]

صحيح نسيت اقولك على حاجة يا استاذى كريم هو ان مصنعية الميكانيكى 400 او 500 جنيه وقابله للتفاوض من غير قطع الغيار مع العلم ان حاجة العربية ديه رخيصة يعن الموضوع مش موضوع تكلفة المهم التركيب والصيانة يكونو صح

العربية عاملة كام الف ؟؟ و هل فى اى اصوات بتظهر من الموتور

[ebrahim_mh]

العربية عاملة كليوهات كتير متنساش انها موديل 97 بس الحمد لله احنا لسه موصلناش لمرحلة الترزيع والدخان الابيض الكثيف والسخونة الزيادة ونقص الزيت بزيادة
انا يا دوب لسه فى بديات الشنبر

يعنى يا جماعة يا خبراء الدايو افك واحل الماتور واانزله على الارض وافضى الشاسيه ولا احل وافك الجزء اللى فوق بس
حد يرشدنى ويدلى ومشكورررين للمساعدة