استفسار بخصوص عمل زرجينة لا ستعدال ضبط الزوايا ؟

[BomBom]

اشتريت لانوس لاحد قرايبي من اسبوعين ، العربية تمام و زي الفل و لكن خلال السواقة لاحظ ان الدركسيون بيحدف شمال على خفيف ، فرجحنا ان العربية محتاجة ضبط زوايا ، روحنا لمكان متخصص بضبط الزوايا فضبط العجلات الثلاث ما عدا الامامية الشمال وقال لنا انه مش ممكن يظبطها لانها محتاجة زرجينة علشان تتضبط لان ممكن العربية تكون قبل كده اتخبظت في الجنب ده ، و قال لنا ان الموضوع ده هيكلف 200 جنيه ، انا سؤالي : هل موضوع الزرجينة ده موضوع آمن و ممكن يصلح المشلكة دي و ترجع العربية زي ماكانت ، برضه هل الموضوع دي لو متعملش ممكن يأثر على العربية ، و هل يأثر على قيمة العربية عند اعادة البيع ؟

[karimfahmy99]

حسب معلوماتى المتواضعة . ترحيل العجلة ممكن يكون من خبطة او ممكن كمان من مطب جامد او دخلة فى رصيف . انا كل 4 او خمس شهور بلاقى تعديل فى الزوايا و الراجل يقولى من المطباط عادى مفهاش مشكلة .

موضوع الزرجينة طبعا مهم و زى ما قلت ممكن تكون لاى سبب من اللى قلتهم . و تاثيرة طبعا هيكون على الكاوتش اول حاجة هيعمل تاكل فى جنب و يبوظ فردة الكاوتش .

هو بتاع الزوايا مقلكش عاوز الزرجينة كام سنتيمتر ؟؟؟؟ و ملهاش تاثير فى البيع للدرجة دى متقلقش و ترجع زى ما كانت بس طبعا شوف حد كويس يعمل شغل الزرجينة و طبعا بعد ما تخلص تظبط زوايا للعجلتين اللى ادام مش واحدة بس

متنساش تبقى ترصص العجل اذا كان مش مترصص دى مهمة كمان

[ahmedyehia515]

انا الموضوع ده حصلى قبل كده بس كنت خبطه الكاوتش فى الرصيف جامد و الجنط اتعوج و الطنبورة كانت محتاجة زرجينة. و عملتلها الزرجينة فة محطة بنزين وطنية اللى جنب سيتى ستارز و غيرت الجنط و بقت زى الفل بعد كده بس دفعت 100 جنيه ( و شباب المنتدى هنا قالولى انو 100 جنيه كتير اوى على زرجينة) بس بعد شوية المشكلة ده حصلت فى الناحين الشمال و برده بتاع الزوايا قاللى انها محتاجة زرجينة بس رحت بريدجستون عمارات العبور و قاس الزوايا بالانفرا ريد و قاللى انها مش محتاجة زرجينة و كان فى حاجة تانية فى العفشة.

نصيحتى روح بريدجستون fix&fit و اعمل الزوايا عندهم و و لو العربية محتاجة زرجينة هيعملوهالك بس فرع عمارات العبور الزرجينة اللى عنده 4 مسامير بس فممكن تروح بتاع آخر عباس عشان ده اللى فيه كل حاجة

[BomBom]

هو بتاع الزوايا مقلكش عاوز الزرجينة كام سنتيمتر ؟؟؟؟

هو قاس المسافة ما بين العجلتين الاماميتين اسفل العربية و قالنا ان المسافة دي تقريبا المفروض بتبقا في العربية السليمة 165 او 168 سم ، بصراحة مش فاكر ، و ان العربية فيها حوالي زيادة 4 سم عن المقاس المفروض .

[BomBom]

انا الموضوع ده حصلى قبل كده بس كنت خبطه الكاوتش فى الرصيف جامد و الجنط اتعوج و الطنبورة كانت محتاجة زرجينة. و عملتلها الزرجينة فة محطة بنزين وطنية اللى جنب سيتى ستارز و غيرت الجنط و بقت زى الفل بعد كده بس دفعت 100 جنيه ( و شباب المنتدى هنا قالولى انو 100 جنيه كتير اوى على زرجينة) بس بعد شوية المشكلة ده حصلت فى الناحين الشمال و برده بتاع الزوايا قاللى انها محتاجة زرجينة بس رحت بريدجستون عمارات العبور و قاس الزوايا بالانفرا ريد و قاللى انها مش محتاجة زرجينة و كان فى حاجة تانية فى العفشة.

نصيحتى روح بريدجستون fix&fit و اعمل الزوايا عندهم و و لو العربية محتاجة زرجينة هيعملوهالك بس فرع عمارات العبور الزرجينة اللى عنده 4 مسامير بس فممكن تروح بتاع آخر عباس عشان ده اللى فيه كل حاجة

شكرا جدا لرد حضرتك ..

[karimfahmy99]

ان شاء الله بسيطة . و انا من راى الاخ الفاضل شوف محطة يكون فيها شغل الزرجينة يبقى منها فيها . انت كاتب انك من الجيزة شوف و اسال على محطة كدة . انا كنت اسمع عن محطة شل و انت رايح الهرم من طريق فيصل بعد المريوطية على شمالك كان فيها زراجين . بس الكلام دا كان من مدة . اسال و هتلاقى ان شاء الله .

[MMamdouh]

اللى روحتلة نصاب لعدة اسباب

اولا اللانوس مفيش فيها ضبط زوايا ورا يبقى ازاى ضبط 3 عجلات؟؟

ثانيا لو العربية عايزة زرجينة يبقى هو ضبط العجلة اليمين على اى اساس؟؟

ثالثا الزرجينة اخرها 80 جنية لما واحد يضحك عليك... 200 جنية دة استهبال

MMamdouh

[BomBom]

اللى روحتلة نصاب لعدة اسباب

اولا اللانوس مفيش فيها ضبط زوايا ورا يبقى ازاى ضبط 3 عجلات؟؟

ثانيا لو العربية عايزة زرجينة يبقى هو ضبط العجلة اليمين على اى اساس؟؟

ثالثا الزرجينة اخرها 80 جنية لما واحد يضحك عليك... 200 جنية دة استهبال

mmamdouh

شكرا لردك و ربنا يباركلك ، هو كان قدامه مونيتور شفنا فيه قيم العجلات بعد الضبط كان فيه قيمة كبيرة للعجلة الامامية شمال هي دي اللي فضلت قيمة كبيرة ، الحاجة الثانية ان لما نزلنا اسفل العربية و ضحلنا ان صاحب العربية السابق كان عامل جلبة بشكل معين علشان تعدل العجلة بقدر المستطاع و قال انه المفروض الجلبة دي تتشال و تتظبط العربية عن طريق جهاز عنده بالليزر .