الحرارة مع التكييف

[amazingahmed]

السلام عليكم
عندي مشكلة في سيارتي دايو ماتيز 99
لما بمشي بيها من غير تكييف، الحرارة بتبقى قريبة من مؤشر النصف و لا تزيد، لكن عند تشغيل التكييف تزيد و تعدي مؤشر النصف لحد قبل مؤشر التلاتربع و التكييف يفصل لحد لما الحرارة ترجع مؤشر النصف يشتغل تاني و هكذا.
يا ترى ايه سبب الحرارة الزيادة دي؟
رحت لميكانيكي و قالي ان غطاء القربة بينقط، و غيرته لكن محلش المشكلة.
واحد تاني قالي ان الريدياتير محتاج يتسلك
مع العلم اي قريب لسة مغير سير الدينامو و سير التكييف.
شكرا

[samirayad]

طيب التكييف شغال تمام

يعنى بيسقع كويس

وهل عندك مروحتين زى الانوس والنوبيرا ولا مروحه واحده

وهل بتطمن على أن المروحه ( أو المرواح ) شغاله بسرعتين

ولا سرعة المراوح ثابته دائما

وهل مستوى الميه بالقربه ثابت ولا بيقل

[amazingahmed]

اولا شكرا على ردك السريع.
التكييف شغال تمان و بيسقع كويس و انا لسة شاحنة من شهرين.
عندي مروحة واحدة بس و هي شغالة لكن مش عارف سرعة واحدة ولا سرعتين.
مستوى المياه كان بيقل لحد ما غيرت غطاء القربة و بعد كده بقى ثابت.

هو ممكن يكون فيه حاجة في طرمبة المياه؟

[samirayad]

هو ممكن يكون فيه حاجة في طرمبة المياه؟

كل شىء وارد فى الهندسه الميكانيكيه

عموما طالما مفيش أصوات غير طبيعيه فى منطقة سير الكاتينه
زى ونة بلى وغيره

يبقى مبدئيا ..........دوران الطلمبه معقول

وإلى حد ما بعيده عن المشكله دى

بدليل أن الحراره كويسه (بدون تكييف )

عموما

المفروض تطمن على أن المروحه شغاله بسرعتين

سرعه بطيئه أول ماتشغل التكييف

وسرعه عاليه بعد مرور الحراره لمنتصف مؤشر الحراره وبداية زيادتها

لأن ده سلوك المراوح عامة فى عائلة الدايو

_____________________

فا أحتمال يكون عندك مشكله كهربيه فى دايرة المروحه

أى تكون المروحه شغاله بسرعه واحده فقط ( السرعه البطيئه )

[amazingahmed]

انا مش عارف الاحظ سرعة المروحة. ازاى أقدر أعرف؟
لاحظت حاجة كمان امبارح بالليل، لما شغلت التكييف سمعت صوت تزييق فلقيت ان سير التكييف مش بيلف كويس و ساعات بيقف و بعدين يشتغل تاني بسرعة و بعد كده طول الطريق التكييف شغال كويس.
دي تبقى مشكلة بلية التكييف؟ و يا ترى هي اللي عاملة مشكلة الحرارة؟؟

[tarek_2005]

انا مش عارف الاحظ سرعة المروحة. ازاى أقدر أعرف؟
لاحظت حاجة كمان امبارح بالليل، لما شغلت التكييف سمعت صوت تزييق فلقيت ان سير التكييف مش بيلف كويس و ساعات بيقف و بعدين يشتغل تاني بسرعة و بعد كده طول الطريق التكييف شغال كويس.
دي تبقى م[gdwl]شكلة بلية التكييف[/gdwl]؟ و[gdwl] يا ترى هي اللي عاملة مشكلة الحرارة[/gdwl]؟؟

احتمال كبير اوي بلية التكيف هي الي عملة المشكلة ولكن هراجع كاتلوج كهرباء المتايز علشان اقولك لو في عيب في المروحة وكيفية اختبار السرعه العالية

[MMamdouh]

انا مش عارف الاحظ سرعة المروحة. ازاى أقدر أعرف؟

صوت المروحة بيبان... لو صوتها عالى و انت سامعة و الكابوت مقفول تبقى السرعة العالية

لاحظت حاجة كمان امبارح بالليل، لما شغلت التكييف سمعت صوت تزييق فلقيت ان سير التكييف مش بيلف كويس و ساعات بيقف و بعدين يشتغل تاني بسرعة و بعد كده طول الطريق التكييف شغال كويس.
دي تبقى مشكلة بلية التكييف؟ و يا ترى هي اللي عاملة مشكلة الحرارة؟؟

طالما السير بيفوت يبقى السير مش مشدود كويس

MMamdouh

[khater87]

شوف المروحه وسرعتها

هو فيه حاجه تانيه
بس انا مش عاوز اقولهالك
دوره التبريد بتاع الماتيز صعبه ومحكمه جدا
انتا فتحت الموتور ده قبل كده ؟؟
يعني ضرب منك جوان مثلا
او عمرت
او نص عمره حتي
انا بسأل السؤال ده
علشان الموتور بتاع المايتز مش بيظبط خالص ولو حتي غيرت الجوان
وممن يكون ده سبب السخونه مع التكييف

[amazingahmed]

أنا رحت امبارح عند كهربائي و قاللي ان المروحة سرعة واحدة علشان داخلها سلكتين بس. المهم لقى سير التكييف مرخي فشده.
و بعدين قرر انه يعمل اختراع أنا مش مستريحله . ركب كتاوت (ريلاي) على المروحة علشان تشتغل مع التكييف (مكانتش بتشتغل مع التكييف).
طبعا أنا النهاردة هجرب في الحر هتعمل ايه.
أنا مش مستريح للحل ده علشان هو كده لف حوالين المشكلة و ملقاش السبب الحقيقي.
احتمال أروح لمحمد السيد اللي الناس بتحكي عليه النهاردة لو خلصت شغل بدري علشان العربية رجعت تبرجل تاني بعد ما عملت أيدل ليرن و اتظبتت لمدة أسبوع.

أنا قريب غيرت جوان وش التاكيهات علشان كان بيجيب زيت بس كده.

[MMamdouh]

انت رحت لواحد فران مش كهربائى

MMamdouh

[amazingahmed]

انت رحت لواحد فران مش كهربائى

mmamdouh

ياريت تنورني أكتر من كده. منتظر النصيحة

[MMamdouh]

يعنى الراجل دة بطيخة... روح لمحمد السيد

MMamdouh

[tarek_2005]

عزيز الاخ الفاضل
انا راجعت دائرة المروحة بكاتلوج الدايو الماتيز

ومرفق الصورة



وللاسف النسخة فرنسي بس الرموز طبعاً واحدة

مروحة الماتيز سرعيتين

وتعمل بمجرد تشغيل التكيف

لاختبار السرعة العالية شغالة ولا لاء

سخن متور العربية حتي تدور المروحة

ثم افصل الكتاوت ( فكه ) الموجود علي اليسار في الديجرام
لابد في خلال نصف دقيقة ان تعمل المروحة اذا كانت دائرة اصلاً بالسرعة البطيئة اما لو كانت دائرة اصلاً بالسرعة العالية فلن تتوقف اصلاً عن العمل

جرب وفيدني بالنتيجة وانا متابع معك لاي استفسار

[amazingahmed]

صباح الخير
امبارح أخيرا قدرت الاقي وقت و توكلت على الله و رحت لمحمد السيد.
الصراحة أنا أول مرة أشوف كهربائي سيارات فاهم هو بيعمل ايه و مذاكر كويس و مش بيفتي. و مع ذلك الراجل في منتهى الاحترام و التواضع

أولا حط العربية على الاسكانر و لقى أن حساس العمة (IAT) مش بيقرأ و قاس الفولت في السلك اللي رايحله ملقاش ال5 فولت فراح مغير الفيشة و لمبة التشك في التابلوه طفت و غيرت فلتر هواء بالمرة ب20 جنيه.

تاني حاجة مشكلة التكييف و الحرارة طلعت ان كتاوت السرعة العالية كان البنز اللي بيدخل فيه في علبة الفيوزات مهرب فعدل البنز و التكييف بقى بيشغل المروحة على السرعة العالية.

تالت حاجة، كان فيه كهربائي كفتجي رحتله من سنة علشان العربية كانت بتقطع كتير ففضل يلعب في الاسبراتير (distributer) و يقدم و يأخر كهربه العربية. لكن محمد السيد كان بيقرأ لفات الموتور من الاسكانر لحد ما ظبت الاسبراتير على وضعه الطبيعي و العربية صوتها هدي.
العربية أداءها اتحسن 75 في المية حيث أن التقطيعة مبقيتش بتيجي في المشي العادي لكن بتيجي خفيفة لما أشيل رجلي من على البنزين فقالى ان حساس الشكمان ممكن يكون محتاج يتغير لأن قراياته مش مظبوتة و احتمال أحتاج أغير الاسبراتير علشان هو ممكن يكون السبب في التقطيعة.
أنا هجرب كام يوم كده و هشوف لو الحكاية مضايقاني هروح و أغير الحاجات دي لكن لو هعرف أعيش بيهم هسيبها كده و هي كده مش وحشة.

شكرا لكل الناس اللي حاولت تساعدني

[tarek_2005]

الف مبروك علي الاصلاح وبردو طلع ان السرعة العالية مش شغالة وعيب في الكتاوت زي ما قلتلك