مشكلة في ذراع الملتي فنكشن

[Mohamed A S]

الأخوة الكرام .. بعد التحية
العربية لانوس 2001 .. من يومين لقيت ذراع الملتي فنكشن بتاع النور بيعلق لما باجي افتح النور الواطي مينورش وبالتالي النور العالي مبينورش برده .. لكن أول تكه فيه اللي بتنور التابلوه شغاله وبرده لما باجي أقلب النور الاقي النور العالي شغال .. يا ترى تكون إيه المشكلة .. هل في الذراع نفسه والا فيه ايه ممكن يتعمل .. أفيدونا جزاكم الله خيراً.

[MMamdouh]

مش عارف

اسال كهربائى... اما حيصلح الدراع لو ينفع و اما حتجيب واحد تانى

متاكد ان فيوز النور الواطى مش ضارب؟؟

MMamdouh

[Mohamed A S]

أولاً شكرا لردك الكريم
أعتقد أن لو الفيوز بتاع النور الواطي بايظ مش هينور خالص .. هو ساعات ينور وساعات لا (بيعلق)
وهل لو فيه مشكلة في الدراع يبقى محتاج واحد ثاني فعلاً والا ممكن يتصلح
ويا ترى الجديد بكام
شكراً لك مرة ثانية

[Hossam_Hassan]

الجديد كان ب 105 شهر 10 اللى فات فى شارع دمشق

[Mohamed A S]

شكراً ليك يا أبو ليليا .. بس معقولة لما يعلق الدراع في النور العالي الواطي يبقى لازم يتغير .. على العموم أنا هسأل كهربائي .. وإن شاء الله اقولكم على الرد قريب .. شكراً لكم

[islamkhidr]

الجديد ب 110

[Mohamed A S]

الأخوة الكرام ..
علشان أقفل الموضوع ..
تم شراء ذراع جديد من نافع بشارع دمشق مصر الجديدة 110 جنيه، هو مكتوب على العلبة made in korea الله اعلم اذا كان أصلي والا لاء بس هو نفس شكل الدراع القديم.
بالنسبة للذراع القديم فيه كهربائي قالي ممكن يتفور ونظبطه ويرجع يشتغل ثاني، وفيه كهربائي ثاني قال لما الذراع يبوظ عمره ما يفنع يتصلح لازم واحد جديد أو استيراد برده في حدود 100 جنيه .. أنا قصرت الطريق وجبت الجديد .. بس الله أعلم كل صنايعي بيفتي زي ما هو عاوز. بالمناسبة كمان قالي متشغلش النور الواطي على طول علشان كده ممكن يبوظ المفتاح ثاني وابقى قلب ما بينه وبين العالي علشان تحافظ على المفتاح -أنا كنت بفتح النور الواطي على طول وانا ماشي بليل-
السؤال المهم: أن عندي الكلاكس لما بلف الدركسيون بدرجه معينة مش بيشتغل قلت له على المشكلة دي قاللي المشكلة اني معنديش زرجينه علشان أفك الدركسيون .. استغربت جدا قلت له هو الدركسيون لازم يتفك بزرجينه قالي اه وانا معنديش الزرجينة دي .. حسيت انه مش عاوز يشتغل وبيكبر دماغه.
معلش طولت عليكم

[Hossam_Hassan]

فعلا دركسيون اللانوس محتاج زرجينة علشان يتفك صح

[MMamdouh]

1- قصة النور الواطى دى حجسة كبيرة... انا بقالى 9 سنين بنور النور الواطى و انا ماشى بالليل و الحمد لله مفيش مشاكل

2- الدركسيون مش محتاج يتفك... الصباع اللى ورا الطارة عايز يتزود قصدير و دى اى كهربائى بيفهم يعملهالك فى 10 دقايق

MMamdouh

[Mohamed A S]

ما هو المشكلة يا محمد بيه ألاقي فين الكهربائي اللي بيفهم. يا ريت لو حد يعرف كهربائي بيفهم يدلنا عليه ونرجو انه يكون ناحية جسر السويس.
نسيت أقولكم على حاجة كمان .. لما قلت له عاوز اركب كتاوب علشان النور عندي ضعيف وفي نفس الوقت اني سمعت ان الكتاوت بتحافظ على الدراع .. قاللي لو ركبنا كتاوت هنبوظ شكل العربية قلت ليه إن شاء الله .. قاللي علشان السلك اللي هنمده ونوصله بالبطارية هيبقى شكله مش حلو لأننا هنحمل النور يبقى على البطارية مش على الدراع .. وقصة كده مفهمتش منها حاجة. قلت له شكراً

[MMamdouh]

انا اعرف كهربائى ممتاز لكن فى الدقى... ينفع؟؟

MMamdouh

[Shiref_mohamed]

الكهربائي ده عطلان باين عليه ده انا بنفسي يوم الجمعه الى فاتت روحت اشتريت سللك وكتاوت نور وكبتهم بايدى للعربية والنوراتظبط جدا وبقى اعلى من الأول كتير واتحداك لو شفت سلكه واحده مش فى مكانها في العربية كل الى باين الكتاوت من فوق انما مفيش سلكة واحده باينة

[Mohamed A S]

بالنسبة لكهربائي الدقي فكل اللي يجي من ريحتك بركه يا محمد بيه

أما أن الكهربائي عطلان فدا شئ واضح يا شوشو بيه ولو الموضوع سهل يا ريت تشرح لنا وأحاول أركبه أنا

[Shiref_mohamed]

لا يا باشا الموضوع محتاج خبره في كهربة العربيات روح للكهربائي الى قالك عليه محمد ممدوح وإن شاء الله هيظبطهالك تمام

[Mohamed A S]

ألف شكر ليكم جميعاً على مساعدتكم .. هحاول أشوف كهربائي قريب مني .. ولو جد جديد هستشيركم طبعاً قبل ما اعمل أي حاجة .. شكرا لكم جميعاً مرة ثانية.