تحويل اللانوس Se الى زجاج كهرباء مثل S

[hefnawy77]

السلام عليكم يا شباب..

بصراحة منتدى نايل موتورز و اخص منه منتدى الدايو انا استفدت منه فى حاجات كتير جدا..

و كان هو السبب انى اخترت العربية اللى اشترتها من نوع دايو لانوس... لان الانوس تعتبر هى ال 128 الحديثة من حيث الشكل الاسبور و الكفاءة و سعر قطع الغيار المعتدل نوعا عن سيارات اخرى غيرها..

اسعدنى الحظ بشراء لانوس 2005 سماوى موديل SE ..و كنت اتمنى ان اجد موديل S لكن قدر الله و ما شاء فعل..

و بعد الشراء مباشرة قمت بتركيب جهاز انذار و سنتر للسيارة من النوع wolf ..

و كنت افكر فى تركيب زجاج كهربائى و وحدات رفع .. المهم ان فنى تركيب السنتر قال ان فيه حلين..

الحل الاول : تغيير مكن الزجاج العادى بمكن كهرباء و وضع ازرار التحكم فى علبة وراء مكان الفتيس فى الصالون ... و دى شكلها هيبقى مش حلو قوى..

الحل الثانى : تغيير فرش الابواب الاربعة بفرش استيراد لعربية زجاجها كهربائى و ده هيبقى مع مكن الزجاج الكهربائى الاصلى و ضفيرة الكهرباء و الاكر ...يعنى مش هتختلف عن ااعربية اللى نازلة اساسا بزجاج كهرباء... و ده يكلف حوالى 1000 ...1200

بصراحة انا فضلت الحل التانى..قال عليك و على الحرفيين...اخدت معايا واحد ميكانيكى صديقى و رحنا هناك..

مكانش فيه غير واحد بس اللى عنده الفرش لاربع ابواب بكل مستلزماتهم من مكن و ضفيرة و اكر .... طيب عاوز كام يا عم الحاج..

عاوز الفين جنيه ...و مش عاوز ينزل منهم جنيه لانه متأكد انه هو الوحيد اللى عنده الطقم على بعضه...



المهم طبعا استغليت المبلغ ده ...و دورنا عند كل محلات الدايو بس ملاقيناش..


قلت استشير خبراء الدايو فى المنتدى و هما اكيد هيقدورا يفيدونى انشاء الله... ايه هو السعر المناسب للطقم الكامل ..و منين اقدر اجيبه.

و لو حاولت اركب فوج لايت ....ممكن يتكلف كام ...و اقدر اجيبه منين.





و شكرا لحسن تعاونكم معنا ...

[Hossam_Hassan]

انصحك بالاختيار الأول و تركب المفاتيح على يمينك و كمان بصراحة الزجاج الخلفى ما يستاهلش يتعدل علشان بينزل للنص بس و على فكرة المفاتيح على اليمين مريحين اكتر

[hefnawy77]

شكرا يا حسام باشا على ردك ...

و الف مبروك ليك على الجنوط و الكاوتش الجديد ('',) ....

بصراحة الموضوع بتاعك عجبنى جدا و ناوى اغير الكاوتش فى عربيتى لان حالته طلعت مش و لا بد و كل شوية يريح الشنبر اللى فيه..
اصل صاحب العربية طلع قالب الكاوتش لشنبر بعد ما حط خوابير كتير فى الكاوتش..

فكان موضوع الكاوتش ده فى دماغى هو و الجنوط..

بالنسبة لموضوع المفاتيح اللى على اليمين فانا معرفش ليه مش متقبله نفسيا و حاسس انه هيبوظ الشكل العام...


انا حاليا مسافر و راجع إن شاء الله اخر الشهر و ناوى ابقى اشوف حل لموضوع الكاوتش..


و انا فى انتظار اراء الاعضاء بخصوص موضوع الفرش و مكن الكهرباء للزجاج ....

[islamkhidr]

ألف مبروك على العربية

و أنا من رأى زى ما الاستاذ حسام قال

أعمل الزجاج الامامى بس كهربا ووفر بقية المبلغ خصوصا ان الزجاج الخلفى مش مهم


اهم حاجة الزجاج الامامى اللى على اليمين لانة هوة اللى بتحتاجة علشان كدة خلى الاتنين كهربا

وربنا يوفقك

[KarimAbulEla]

هل غلق زجاج السيارة تلقائيا لو اى منهم تم تركه مفتوح سهوا فى اى واحد من الاربعة مع الغلق بالسنتر هو نظام ياتى مع السنتر لوك ام وحدة منفصلة

[Hossam_Hassan]

هل غلق زجاج السيارة تلقائيا لو اى منهم تم تركه مفتوح سهوا فى اى واحد من الاربعة مع الغلق بالسنتر هو نظام ياتى مع السنتر لوك ام وحدة منفصلة

بيتبقى وحدة منفصلة تسمى وحدة رفع و اشهر انواعها الوولف و تمنها حوالى 50 جنيه و بتحتاج وحدة لكل 2 ماكينة زجاج

[hefnawy77]

ألف مبروك على العربية

و أنا من رأى زى ما الاستاذ حسام قال

أعمل الزجاج الامامى بس كهربا ووفر بقية المبلغ خصوصا ان الزجاج الخلفى مش مهم


اهم حاجة الزجاج الامامى اللى على اليمين لانة هوة اللى بتحتاجة علشان كدة خلى الاتنين كهربا

وربنا يوفقك

الله يبارك فيك يا استاذ اسلام.. و متشكر قوى...

انا شايف ان الكل مع فكرة تغيير الزجاج الامامى فقط الى كهرباء.. و انا ابتديت اقتنع رغم انى مكنتش عاوز احس بفرق بين عربيتى و موديل S ...لكن عندكم حق ...

طيب لو انا هغير الزجاج الامامى بس مع عمل وحدات رفع مع ريموت السنتر ...الشكل العام للابواب هيبقى كويس مع مفاتيح الكهرباء اللى هتركب.. و هل يا ترى هاحتاج انى اغير فرش البابين برضه؟؟؟

و الموضوع ده ممكن يدخل فى كام بالطريقة دى ... و فين اقدر اعمله؟؟

[ahmedfra]

لو تسمع نصحتى بلاش تغير للزجاج الكهربى طالما هو مش اصلا كده و دا عن تجربة شخصية انا معايا لانوس 99 و موضوع تغير الزجاج لكهربا دا شغلنى قوى فترة لدرجة انى نت بحلم بيه و انا نايم و انا صاحى عادة مهببة فية لما اكون عاوز اعمل حاجة تبقة مسيطرة عليا قوى . عموما انا ركبت الزجاج الكهربى عند السجان فى شارع دمشق و طلعوا عين اهلى . الزجاج ساعات يحدف على جنب شوية . و تلاقى زجاج ناحية اتقل من الناحية التانية . و بيرزع فى اخر مجراه و صوته عالى عن صوت الفبريكة . و ساعات السلك يتقطع . خلاصة الموضوع من وجهة نظرى انا انه موضوع فاشل انا حسيت انى غلطت فيه .

[hefnawy77]

بيتبقى وحدة منفصلة تسمى وحدة رفع و اشهر انواعها الوولف و تمنها حوالى 50 جنيه و بتحتاج وحدة لكل 2 ماكينة زجاج

+111111111111

[Hossam_Hassan]

الله يبارك فيك يا استاذ اسلام.. و متشكر قوى...

انا شايف ان الكل مع فكرة تغيير الزجاج الامامى فقط الى كهرباء.. و انا ابتديت اقتنع رغم انى مكنتش عاوز احس بفرق بين عربيتى و موديل S ...لكن عندكم حق ...

طيب لو انا هغير الزجاج الامامى بس مع عمل وحدات رفع مع ريموت السنتر ...الشكل العام للابواب هيبقى كويس مع مفاتيح الكهرباء اللى هتركب.. و هل يا ترى هاحتاج انى اغير فرش البابين برضه؟؟؟

و الموضوع ده ممكن يدخل فى كام بالطريقة دى ... و فين اقدر اعمله؟؟

انا كنت عملته من سنة عند واحد كهربائى فى المقطم و اتكلفوا مع المفاتيح اللى جنب الفتيس 400 جنيه و الحمد لله شغالين زى الفل، واحد معرفة ركبهم من 8 شهور عند هشام لهيطة فى التوفيقية ب 450 جنيه و شغالين كويس

[hefnawy77]

لو تسمع نصحتى بلاش تغير للزجاج الكهربى طالما هو مش اصلا كده و دا عن تجربة شخصية انا معايا لانوس 99 و موضوع تغير الزجاج لكهربا دا شغلنى قوى فترة لدرجة انى نت بحلم بيه و انا نايم و انا صاحى عادة مهببة فية لما اكون عاوز اعمل حاجة تبقة مسيطرة عليا قوى . عموما انا ركبت الزجاج الكهربى عند السجان فى شارع دمشق و طلعوا عين اهلى . الزجاج ساعات يحدف على جنب شوية . و تلاقى زجاج ناحية اتقل من الناحية التانية . و بيرزع فى اخر مجراه و صوته عالى عن صوت الفبريكة . و ساعات السلك يتقطع . خلاصة الموضوع من وجهة نظرى انا انه موضوع فاشل انا حسيت انى غلطت فيه .

واضح ان فينا حاجات كتير مشتركة.. انا فعلا عامل زيك كده بالظبط... لما تبقى حاجة شغلانى انام احلم بيها .. او معرفش انام اساسا..

طيب جربت ترجع للراجل اللى ركبت عنده علشان يحل لك المشكلة دى او يظبط موضوع الصوت العالى ده...

ممكن يكون اللى ركبه معندوش ضمير و عامل كده مخصوص علشان ترجعهله تانى ..و كل مرة يعمل مصلحة.. انا شوفت ناس من النوعة دى.

و ممكن يكون المكن محتاج تزييت مش اكتر للجزء الميكانيكى ... الله اعلم

[hefnawy77]

انا كنت عملته من سنة عند واحد كهربائى فى المقطم و اتكلفوا مع المفاتيح اللى جنب الفتيس 400 جنيه و الحمد لله شغالين زى الفل، واحد معرفة ركبهم من 8 شهور عند هشام لهيطة فى التوفيقية ب 450 جنيه و شغالين كويس

إن شاء الله لما ارجع ابقى اروح التوفيقية للمحل ده و ربنا يسهل .... يا ترى السعر ده شامل للمكنتين و الزراير و وحدة الرفع؟


شكرا يا غالى على تجاوبك معايا..

[Hossam_Hassan]

شامل كل حاجة بالتركيب

[hefnawy77]

ربنا ما يحرمنى منك يا استاذ حسام...

[Hossam_Hassan]

تحت امرك فى اى وقت