صوت زن داوشنى طول ما انا ماشى

[mohamed_berlitz]

السلام عليكم
بقالى كام شهر كدة باسمع صوت فى العربية داوشنى مش عارف دة صوت بلى عجل ولا الموتور عالى شوية ولا اية بالظبط . الصوت بسمعة عالى خصوصا لما بقفل الازاز . روحت للميكانيكى قالى البلى سليم والموتور سليم والعيب عيب كاوتش . انا فعلا كنت ماشى على 100 كدة وقفلت الكونتاكت لقيت الصوت برضة عالى

ولذلك يبقى يا صوت بلى العجل يا اما الكاوتش بس انا شاكك انة ممكن يكون صوت كاوتش لان الصوت زن زن يعنى ولو كان كاوتش كان حيعمل صوت فى الشارع اللى مش متسفلت كويس لكن الدائرى كويس جدا . انا حيران لدرجة انى فكرت ابيع العربية
لانوس 2007 وعاملة 70000

[mero100]

مش معقول كل واحد يطلعله صوت ف عربيته اللانوس ... يبيعها :-)))

انا عربيتي لانوس 2011 بقالها 4 شهور.... كل ما اسمع صوت ... اقول انا حبيععععععع العربيه ....

بص يا محمد : انا خبرتتي في اللانوس 4 شهور بس.... لكن انا دقيق شويه ف موضوع االاصوات دة

طالما انت كشفت علي البلي و متأكد انه سليم .... يبقي تمام

منظلمش الكاوتش لان النوع الوحش بيعمل دوشه مش زنه

الزنه لو مستمره ممكن تكون طرمبه بنزين و ركز في الزنه عشان بتييجي من ورا من عند الكنبه

فيه حاجةة حقولك عليها ....عاوزك تجربها : الصاجة بتاعه الفرن اللي لونها فضي تحت وش التاكيهات .... بتكون حروفها لازقه في الصوابع الميتال بتاعت البوجيهات .... شيل الصوابع الميتال بتاعت البوجيهات برااحة و شدهم من الميتال مش من السلك ... و حاول تضغغط بكلابه ععلي الحروف بتاعت الفرن عشان متبقاش الصوابع الميتال بتاعت البوجيهات مريحة علي صاجة الفرن ...االموضوع دة بيعمل زنه .

جرب و قولنا ايه الااخبار ....راحتت الزنه ولا لسه:-)

عمرو ابراهيم

[mohamed_berlitz]

شكرا يا باشا على الرد السريع
هو الحقيقة ان اللى عندى مش زنة فعلا ولكن دوشة . انت عارف الصوت بالظبط زى ماتكون راكب قطر وعربية القطر دية بعيدة عن الجرار . وسامع العجل مع القضبان.دة عشان تتهيق ان الصوت مش جى من الموتور بدليل انى قفلت الكونتاكت والصوت مراحش . هو دة الوصف اللى انا باسمعة وعلى فكرة انا باسمع الصوت قوى بعد ال100
بس لو كان عيب كاوتش ازاى يعمل دوشة على طريق ناعم زى الدائرى . والله انا شاكك فى البلى.مش عارف

[al_manara]

ارفع العربية بالكوريك ولف كل عجلة وشوف هايطلع منها صوت ولا لا . لو عملت صوت يبقي البلي

[mashaly]

البلي لو بايظ صوته مش بيبان على السرعات العاليه

[محمد الشامي]

ارفع العربية بالكوريك ولف كل عجلة وشوف هايطلع منها صوت ولا لا . لو عملت صوت يبقي البلي

+1

وغالبا المشكله بنسبة 95% من بلي العجل

[MMamdouh]

هو الكاوتش عامل كام الف؟

MMamdouh

[aam113]

ارفع العربية بالكوريك ولف كل عجلة وشوف هايطلع منها صوت ولا لا . لو عملت صوت يبقي البلي

+1
انا كمان اؤيد هذا الاقتراح ، لأن لسة كان عندى صوت زى موتور صوته عالى بس جاى من ورا وكنت فاكره عيب فى الشكمان وكان بيظهر بعد سرعة 40 تقريبا ولما الميكانيكى جرب اول ما مشى قالى دا بلى العجلة الخلفية وعلشان يأكد لى رفع كل عجلة لوحدها بالكوريك ولفها فوجدنا واحدة هى اللى طلعت صوت بسبب البلى وقمت بتغييرها.

[aam113]

البلي لو بايظ صوته مش بيبان على السرعات العاليه

بلية العجلة الخلفية عندى كانت بايظة وكان بيظهر الصوت فى السرعات العالية .

[elpasha1]

البلي لو بايظ صوته مش بيبان على السرعات العاليه

مع احترامى يا كبير ليك لكن بيتسمع فى السرعات العالية

[harphosh]

شكرا يا باشا على الرد السريع
هو الحقيقة ان اللى عندى مش زنة فعلا ولكن دوشة . انت عارف الصوت بالظبط زى ماتكون راكب قطر وعربية القطر دية بعيدة عن الجرار . وسامع العجل مع القضبان.دة عشان تتهيق ان الصوت مش جى من الموتور بدليل انى قفلت الكونتاكت والصوت مراحش . هو دة الوصف اللى انا باسمعة وعلى فكرة انا باسمع الصوت قوى بعد ال100
بس لو كان عيب كاوتش ازاى يعمل دوشة على طريق ناعم زى الدائرى . والله انا شاكك فى البلى.مش عارف

الموضوع بلى عجل أكيد وغير البليتين الخلفى وكله هيبقى تمام

[mohamed_berlitz]

شكرا يا جماعة على الردود والاهتمامات انا فعلا انشاء الله حجرب ارفع العربية بالكوريك لاختبار البلى ولو البلى سليم يبقى اكيد الكاوتش عشان فى فردتين عاملين عندى بتاع 65000 بس انا بتهيألى مش الكاوتش عشان الصوت مش بيتغير سواء الاسفلت خشن او ناعم

[MMamdouh]

65 الف؟؟؟؟

الكاوتش دة مات من زمان

MMamdouh