عندي كذا مشكلة في العربية النوبيرا و محتاج مساعده

[gassarian]

أول مشكلة: عفشة العربية لما بكون بعدي مزلقان مثلاً أو طريق مدغدغ مثلاً بحس بالمطبات حتى لو حصوة صغيرة في الشارع في الدركسيون في إيدي و كأن صوت كركبة في العجل الأمامي..... واحد صاحبي معاه كورولا سوقتها منه في نفس الشارع المكسر و بصراحة حسيت إني أنا اللي عندي مشكلة، و كنت قبلها متعقد من العربيات اللي بيمشوا الشارع المتكسر ده بسرعة و أنا اللي بحس إن عجل العربية هيتفكك، طلع إن عربيتي هي اللي تعبانه مش هم اللي بيكسروا عربياتهم

تاني مشكلة: لما بفرمل جامد حتى لو العربية يدوبك بتتحرك خفيف بسمع صوت كأن المساعد اللي قدام اتفعص و رجع تاني....مش عارف حد فهم حاجة؟؟؟؟ يعني العربية طبيعي بتميل لقدام و بعدين بترد تاني......أنا بسمع صوت تقيل كدة و هي بترد الردة ديه...............بس لما بفرمل عادي يعني مش بيبقى فيها حاجة

تالت مشكلة: أصوات زقزقة الكراسي اللي قدام و صوت حاجة ملخلخة ورا يمين و فصصت الباب إني ألاقي حاجة مفكوكة أو ملخلخة مش لاقي!!!!!!!

رابع مشكلة: ظبط الزوايا من أسبوع و النهاردة أول مرة أطلع على السريع على الدولي رايح من الإسكندرية لرشيد.....المهم أخدت بالي إن العربية كل شوية أعدلها كأنها بتحدف خفيف قوي مرة لليمين و مرة شمال!!!!!! كأن الدركسيون فيه بوش ... ولا يكون الطريق؟؟!!!! مش عارف

خامس مشكلة: العربية لما بكون مشغل التكييف و خصوصاً على السرعة الرابعة أو حتى التالتة بحسها خشنة قوي و نفسياً بحسها تقيلة من الخشونة دي......يعني بحس برعشة خفيفة قوي في الدواسات خصوصاُ لما بكون على سرعة بطيئة قوي يعني يدوب بدوس سنة بنزين و بشيل رجلي سنة من على الدبرياج مع صوت كأن ونة خفيفة كدة و الموتور بيرجع تاني لسرعة الثبات
و عموماً العربية من غير التكييف ساعات أحسها خشنة و ساعات تانية بحسها كويسة

سادس مشكلة: بسمع صوت الشكمان بنعرة خفيفة كدة جوة العربية مع خشونة في العربية نفسها و أنا بزود سرعة ....ساعات بيبقى الصوت حلو قوي لما بقرص على العربية في السحب بس غير كدة بحسه خشن و مزعج لما بكون بسوق هادي.....الرجل بتاع الشكمانات قال لي العلبة اللي في النص فيها خبطة و الصوت منها بس مفيهاش خرم و لا حاجة.....مش عارف ممكن يكون

سابع مشكلة: كنت عند الميكانيكي ، فبقول له حاسس دواسة الدبرياج تقيلة شوية.....قال ده الديسك ناشف و عايز يتغير و قعد يدوس الدبرياج بسرعة و يشيل رجله و كدة و كان في صوت تكة خفيفة قوي فيها قدام ...أنا ساعات بسمع تزييقه خفيفة قوي في الدواسة

تامن مشكلة: إضاءة العدادات كل كام يوم ألاقي لمبة تطفي شوية و بعدين أروح للكهربائي و أنا في الطريق تشتغل وحدها سبحان الله....لمبتين اللي على الشمال خالص عند الأر بي إم و اللي عند الحرارة و عداد السرعة عند ال12 أو 140 كدة............قال لي الفتيلة بتفوت وعايزين يتغيروا و فيها فك التبلوه كله تقريباً

أخر حاجة: مش عارف دي مشكلة و لا لأ.........الأر بي إم عند 3000 بالظبط بتبقى العربية على سرعة 105 كم

[A.samy]

بيعها واخلص منها

[Car's Sniper]

المشكلة الاولى والتانية والرابعة تقريبا بسبب حاجة واحدة وهى جلب المقصات عايزة تتغير
واخر مشكلة دى مش مشكلة ولا حاجة وهى بالتمام والكمال بتكون عند سرعة 107 تقريبا على ار بى ام 3000 بالظبط

[tarek_2005]

ثاني مشكلة كوتش مساتر العجل نشف وما بيردش التيل لمكانه ودات لازم يتغير

ثامن مشكلة راجه اهم موضوعات القسم وهتلاقي طريقة فك التابلوه ومش هتاخد منك اكثر من نصف ساعة وتغير اللمبات ونصيحة غير الدوي بتاعتها كمان حتي تحل المشكلة جذرياً

[Car's Sniper]

ثاني مشكلة كوتش مساتر العجل نشف وما بيردش التيل لمكانه ودات لازم يتغير

ثامن مشكلة راجه اهم موضوعات القسم وهتلاقي طريقة فك التابلوه ومش هتاخد منك اكثر من نصف ساعة وتغير اللمبات ونصيحة غير الدوي بتاعتها كمان حتي تحل المشكلة جذرياً

ممكن لو مافيهاش تعب تجيبلنا لينك موضوع فك تابلوه النوبيرا
بعد اذن صاحب الموضوع

[mohnsar]

السلام عليكم
اولا مشكله العفشه والزوايا دي سببها المقصات و المساعدين بالنسبه للمقصات تجيب مقصات اسباني 450 ج لانك لوغيرت الجلب مش هتكمل اكتر من شهر وتبوظ تاني اما المساعدين هات اتنين استيراد 350 ج كاملين بالسست والبطاحات وغير كويتش الميزان مع شدادين الميزان ودا احسنلك انك تعملهم مع بعض مره وحده مع تغيير تيل امامي وغسل المساتر الاماميه

الشكمان غالبأ علبه البيئه غيرها بعلبه زنان ودا زي علبه البيئه لاكن بدون فحم وفي حدود 150 ج
نور الطبلوه غيره عند كهربائي والاحسن غير كل اللمبات وممكن تجيبها لدات باللون الي انتا عيزه
الدبرياج غير طقم كامل احسن ديسك + اسطوانه + بليه وهتحس بفرق كبير
وغالبأ انتا محتاج صيانه موتور يعني بوجيهات فلاتر تنظيف ايدل و بوابه

والحاجات دي ممكن تتعمل كلها في يومين بس بعد كده هتحس ان معاك عربيه جديده ومن هنا ورايح تعود نفسك عل الصيانه الدوريه دا احسن من انك تتطر تصرف مبلغ كبير مره وحده والله الموفق

[osama.m]

اعمل شوية الشغل اللي في العفشة الاول وشوف المساعدين لو ضعاف غيرهم بأستعمال وغالبا الاصوات دي هتروح بعد ظبط العفشة
لما تخلص الشغل دا ظبط زوايا ورصص
غير فلاتر زيت وهوا و بوجيهات

[gassarian]

النهاردة كان معايا السواق بتاع المستشفى و خد العربية و وداها لواحد بتاع شكمانات....أنا مفهمتش اللي عمله بالظبط لكن هو فتح على العلبة اللي في النص عشان كان صوتها مليانة رايش كتير و طلع منها كتير رايش و حتى جاب لي معاه كذا واحدة شبه الرش بتاع البندقية كده و قال إن الحمار اللي كان لحم الشكمان لصاحب العربية اللي قبلي لحمه لحام كهرباء و ده بيعمل الرايش ده كله و ده اللي يخلي العربية تبقى خشنة كدة معايا..... و فعلاً العربية نعمت معايا بس فيه صوت بسيط كده من الشكمان و قصة التكييف لسة في الخشونة

أما بالنسبة للصيانات فبعملها بإنتظام بس ناقص بس فلتر البنزين اللي مغيرتوش مع الصيانة الأخيرة و البوجيهات مغيرتوش بعد ما إشتريت العربية..... بس العربية مضبوطة كويس و إستهلاكها كويس......يعني على السريع على سرعة 90 مثلا بتعمل ممكن ال 380 أو 360 في ال20 لتر

هي كده شكلها الجلب في العفشة هي اللي عايزة تتغير .... أما بالنسبة لكاوتش ماستر العجل ده بيبقى فين بالظبط؟؟؟؟؟؟

[gassarian]

و شكراً جزيلاً لكل اللي رد و ساعدني

[gassarian]

في سؤال أخير إفتكرته: لما بنور العالي بعد الواطي في العربية إضاءة التابلوه بتوطى سنة صغيرة أوي و برضو لما مثلاً بفتح الإزاز و بيوصل لأخره لو فضلت دايس على الزرار بتاع الإزاز العربية بتتهز سنة صغيرة كأن الكهرباء بتاعت العربية مش مستحملة أي حمل زيادة

[tarek_2005]

في سؤال أخير إفتكرته: لما بنور العالي بعد الواطي في العربية إضاءة التابلوه بتوطى سنة صغيرة أوي و برضو لما مثلاً بفتح الإزاز و بيوصل لأخره لو فضلت دايس على الزرار بتاع الإزاز العربية بتتهز سنة صغيرة كأن الكهرباء بتاعت العربية مش مستحملة أي حمل زيادة

اعراض بداية تلف البطارية او الدينامو اكشف عليهم

[Sameh]

أول مشكلة: عفشة العربية لما بكون بعدي مزلقان مثلاً أو طريق مدغدغ مثلاً بحس بالمطبات حتى لو حصوة صغيرة في الشارع في الدركسيون في إيدي و كأن صوت كركبة في العجل الأمامي..... واحد صاحبي معاه كورولا سوقتها منه في نفس الشارع المكسر و بصراحة حسيت إني أنا اللي عندي مشكلة، و كنت قبلها متعقد من العربيات اللي بيمشوا الشارع المتكسر ده بسرعة و أنا اللي بحس إن عجل العربية هيتفكك، طلع إن عربيتي هي اللي تعبانه مش هم اللي بيكسروا عربياتهم

المساعدين الفابريقة بتوع النوبيرا تعبانين أصلا ، انا غيرت الأربعة بمونرو ، الجوز بحوالى 700 فى حين الكورى بيبدأ من 350 حتى 500 ، الفرق شاسع بكل ما تعنيه الكلمة فى معظم أشكال وألوان الطوب والحفر

تاني مشكلة: لما بفرمل جامد حتى لو العربية يدوبك بتتحرك خفيف بسمع صوت كأن المساعد اللي قدام اتفعص و رجع تاني....مش عارف حد فهم حاجة؟؟؟؟ يعني العربية طبيعي بتميل لقدام و بعدين بترد تاني......أنا بسمع صوت تقيل كدة و هي بترد الردة ديه...............بس لما بفرمل عادي يعني مش بيبقى فيها حاجة

انت قلت بنفسك المساعدين ، غيرهم بقا ، وبعدين لو العربية بتميل أوى لقدام اعمل رجلاش الفرامل اللى ورا عشان ممكن يكون الخلوص بتاعها زاد فالعربية شبه مش بتفرمل من ورا فترمى لقدام وكمان تاكل التيل الأمامى أسرع

تالت مشكلة: أصوات زقزقة الكراسي اللي قدام و صوت حاجة ملخلخة ورا يمين و فصصت الباب إني ألاقي حاجة مفكوكة أو ملخلخة مش لاقي!!!!!!!

انا الحاجات دى بتجننى وبتحسسنى انى راكب كارو ، بس لو عادية تعايش معاها لأن لازم يبقا شوية زقزقة دى دايو برضه ، لو عالية أوى يعنى فيه حاجة غلط ممكن تروح لواحد بتاع فرش

رابع مشكلة: ظبط الزوايا من أسبوع و النهاردة أول مرة أطلع على السريع على الدولي رايح من الإسكندرية لرشيد.....المهم أخدت بالي إن العربية كل شوية أعدلها كأنها بتحدف خفيف قوي مرة لليمين و مرة شمال!!!!!! كأن الدركسيون فيه بوش ... ولا يكون الطريق؟؟!!!! مش عارف

لو خفيف أوى وانت لسة ظابط زوايا ممكن يكون الهوا مش مظبوط فى الجنبين مش زى بعض ، والأفضل ابقا اظبط عند حد عنده جهاز نضيف زى بتوع فيت أند فيكس

خامس مشكلة: العربية لما بكون مشغل التكييف و خصوصاً على السرعة الرابعة أو حتى التالتة بحسها خشنة قوي و نفسياً بحسها تقيلة من الخشونة دي......يعني بحس برعشة خفيفة قوي في الدواسات خصوصاُ لما بكون على سرعة بطيئة قوي يعني يدوب بدوس سنة بنزين و بشيل رجلي سنة من على الدبرياج مع صوت كأن ونة خفيفة كدة و الموتور بيرجع تاني لسرعة الثبات
و عموماً العربية من غير التكييف ساعات أحسها خشنة و ساعات تانية بحسها كويسة

مش فاهم أوى الصراحة ، انت تقصد حاجة تانية غير ان العربية بتتقل التقل الطبيعى مع تشغيل التكييف ؟ ده طبيعى - وعموماً هى العربية فايقة ولا مكتومة ؟ بمعنى انت بتغير فلتر الهوا والبنزين وبتغير زيت الموتور والبلى بتاع الكاتينة فى مواعيده ولا لأ ؟ كل دى حاجات بتتقل العربية لو طنشتها ، وكمان بلى العجل الفابريقة بيتقل ويخشن على 80 الف كدة ولما بتغيره بتلاقى العربية كأن كان حد ماسكها عشان ماتجريش وبعدين سابها

سادس مشكلة: بسمع صوت الشكمان بنعرة خفيفة كدة جوة العربية مع خشونة في العربية نفسها و أنا بزود سرعة ....ساعات بيبقى الصوت حلو قوي لما بقرص على العربية في السحب بس غير كدة بحسه خشن و مزعج لما بكون بسوق هادي.....الرجل بتاع الشكمانات قال لي العلبة اللي في النص فيها خبطة و الصوت منها بس مفيهاش خرم و لا حاجة.....مش عارف ممكن يكون

علبة البيئة صوتها خشن فى النوبيرا شوية ، تعايش معاها أحسن لو الصوت فى الحدود الطبيعية مش بايظة يعنى

سابع مشكلة: كنت عند الميكانيكي ، فبقول له حاسس دواسة الدبرياج تقيلة شوية.....قال ده الديسك ناشف و عايز يتغير و قعد يدوس الدبرياج بسرعة و يشيل رجله و كدة و كان في صوت تكة خفيفة قوي فيها قدام ...أنا ساعات بسمع تزييقه خفيفة قوي في الدواسة

مش عارف دى الحقيقة ، بس هو الدبرياج زيت مش سلك يا ريت تشوف الزيت بتاعه الأول على سبيل التجربة كحل أسهل وأرخص ، لو الديسك فيه مشكلة كانت الإسطوانة تعبت الأول وكنت عرفت من سحب العربية فى المطالع

تامن مشكلة: إضاءة العدادات كل كام يوم ألاقي لمبة تطفي شوية و بعدين أروح للكهربائي و أنا في الطريق تشتغل وحدها سبحان الله....لمبتين اللي على الشمال خالص عند الأر بي إم و اللي عند الحرارة و عداد السرعة عند ال12 أو 140 كدة............قال لي الفتيلة بتفوت وعايزين يتغيروا و فيها فك التبلوه كله تقريباً

غالباً كلامه صح اصل هى كدة مش محروقة ولا الفيوز محروق ، أنا عندى لمبة مروحة التكييف بتعمل زيك كدة بتنور و تطفى برضه بس انا مطنشها !! لو مضايقاك خليه يفك ويعملها عشان تستريح نفسياً وماتبقاش قرفان من العربية

أخر حاجة: مش عارف دي مشكلة و لا لأ.........الأر بي إم عند 3000 بالظبط بتبقى العربية على سرعة 105 كم

طبيعى جداً يا باشا ومش هتعمل أحسن من كدة ، ده يدخل فيه تصميم نقلات الفتيس ومقاس الكاوتش ، لو لقيت عربية نوع تانى موتورها مريح أكتر من كدة ما تحاولش تعمل حاجة عشان مافيش حاجة تتعمل أصلاً

بيعها واخلص منها

؟؟؟؟؟؟

[Car's Sniper]

ياجماعة الراجل معاه نوبيرا ...يعنى احتمال بنسبة 99.9% المشاكل اللى فى الاول دى تكون بسبب الجلب لان كان عندى المشكلة الاولى والتانية والرابعة وراحوا مع تغيير الجلب..... والمشكلة الرابعة هى الدليل ان الجلب هى اللى تعبانة...لان (كلام فى سركوا) الجلب اللى انا غيرتها شكلها مضروبة وبقت بتعمل معايا التعويمة دى اوحش من الجلب الاصلية لما كانت بايظة هههه
نصيحة لوجه الله اكشف عليها عند اى عفشجى وبعد كدة حاول حضرتك توديها توكيل فى اى حاجة تخص العفشة
لان الميكانيكية وشهم فقر وفى اول مرواح ليهم العربية بتفتح بوقها على طول كل شوية...والله مابهزر ...فيه فرق شاسع بين الميكانيكية والتوكيل
حضرتك هتصرف على العربية شوية فى التوكيل بس هتطلع مظبوطة وهتبقى ماشى براحتك عالطريق ومطمن
واوعى حضرتك تسمع كلام فلول الدايو لانوس وتبيعها(حلوة فلول دى؟؟)...لان مافيش عربية فى الفئة دى برفاهية النوبيرا فى صالونها وثباتها على السرعات العالية

[gassarian]

أنا العربية ماشية دلوقتي 54000 كم و شاريها من 11000 كم و غيرت لها سير التقسيمة و البيل ساعتها و طبعاً الزيت بغيره مع الفلتر بـإنتظام