انا كمان عملت حادثة

[احمد ابراهيم]

عملت حادثة و انا فى طريق الاسكندرية و الحمد لله ربنا ستر على الاخر
المهم ان دلوقتى بقى عندى رفرف اتعجن و الاكصدام كمان و الفانوس طبعا بقى زى فانوس رمضان
انا بس كنت عايز اعرف اسعار ال 3 حاجات دول ( رفرف - اكصدام - فانوس ) جديد و استيراد
و اايه الاحسن انى اجيب استيراد و لا اركب الحاجات التيوانى و الكلام ده لان بصراحة مفيش فلوس اجيب الحاجت دى اصلى
و يا ريت لو تنصحونى انى اجيب استيراد تقولوى اجيب منين احسن مكان

[propagaanda]

عليك و على سوسو أو الحرفيين هتلاقي كل حاجتها هناك بس انصحك بالاستيراد أحسن من التيواني خصوصا في الكبوت

و الأسعار هتلاقيها هنا
قأئمـــة بأسعـــار قطـع غيــــار اللانـــــوس - :: نــايــل مــوتــورز:: - :: NileMotors.net ::


بس سؤال معلش ايه اللي حصل عشان الواحد ياخد باله لأني مسافر اسكندرية انا كمان و انت ما شاء الله وهوشتني :) :)

[mahamede]

هات استيراد طبعا أحسن والأفضل يبقى من الحرفيين ,,, تحياتى ,,,,,,,

[mailo]

إيه يا رجالة هو موسم ولا إيه

الحمد لله إنك بخير وربنا يقويك فالتصليح
:)

[ahmedaliaeg]

الف سلامه عليك
انته جتلى على الجرح انا سابقتك يوم الاربعاء بس فانوس ديبو 140
كبوت استيراد بلفرش والشبكه 700
رفرف يمين جديد 150 لانى دوخت عليه استيراد
اكصدلم امامى بون الشاسيه 150
قدر الله وماشاء فعل المهم انك بخير

[احمد ابراهيم]

جزاكم الله خير على الشعور الطيب و على المساعده
هل الفانوس الديبو ده كويس و يفرق ايه عن الاصلى و هل هو افضل و لا الاستيراد ؟؟؟
الاكصدام اللى حضرتك جبته ب 150 استيراد ؟؟؟ و لا جديد؟؟؟
الرفرف بردو الجديد هل خامته كويسه و لا اى كلام و يا ريت اللى يعرف سعر الرفرف استيراد بكام يقولنا

و جزاكم الله خيرا

[propagaanda]

بس سؤال معلش ايه اللي حصل عشان الواحد ياخد باله لأني مسافر اسكندرية انا كمان و انت ما شاء الله وهوشتني :) :)

الرفرف مالوش دعوة بالخامة أوي لانه صاج و لو سمك واحد يبقى حلو و الجديد بيجي أسود بلانك ..... بس رشه عند واحد نضيف
الجديد ب 300 جنيه و الاستيراد بيبقى حسب التاجر بس أعتقد كان واحد صاحبي جابه ب 230 جنيه بس ده من سنتين...لو هاتجيبه استيراد يفضل من نفس لون السيارة و ركب على طول

[ahmedaliaeg]

جزاكم الله خير على الشعور الطيب و على المساعده
هل الفانوس الديبو ده كويس و يفرق ايه عن الاصلى و هل هو افضل و لا الاستيراد ؟؟؟
اللفانوس الديبو افضل فانوس بعد الاصلى الاستيراد كان ب 250
الاكصدام اللى حضرتك جبته ب 150 استيراد ؟؟؟ و لا جديد؟؟؟
جديد لانى عندى الشاسيه والفوم الى بيركب خلف الاكسدام سليم وملقتش استيراد فيبر فقط
الرفرف بردو الجديد هل خامته كويسه و لا اى كلام و يا ريت اللى يعرف سعر الرفرف استيراد بكام يقولنا
جديد ومن وجهه نظرى استيراد افضل
و جزاكم الله خيرا

ولو الكرتيره باظت انا كنت جايبها ب 50 جنيه بكلبستها وخلى بالك ان فى كرتيرات خامتها خفيفه جدا

[elpasha1]

ربنا يسترها علينا وعليكم

[egyptiandiver]

ربنا يسترها

[tarek_2005]

حمداً لله علي سلامتك

[احمد ابراهيم]

نزلت سالت على شوية اسعار امبارح و كانت كالتالى
رفرف استيراد 200 جنيه
فانوس استيراد 250
اكصدام الفيبره بس بدون الشاسية و الفوم استيراد 300

روحت لواحد تانى بتاع جديد و كانت الاسعار
رفرف جديد 200
فانوس ديبو 130
اكصدام فيبر بس بدون شاسية و فوم صناعه سعودى 120

و بعدين روحت لواحد بتاع استيراد تانى
الرفرف 150 بس ممكن يبقى فيه شغل
فانوس ديبو 150
و الاكصدام قالى عنده حاجات بس ممكن تكون متلحمه حاجات بسيطة و فى عنده الصينى ب 150 فيبره بس بردو

لسه هنزل اكمل تدوير و اشوف الاسعار تانى النهارده و اقولكم على اخر الاخبار

[احمد ابراهيم]

جزاكم الله خيرا على السؤال و ربنا يحفظكم و يعافيكم

بس بصراحة انا كنت شريك فى الخطأ لانى كنت بجرى

وربنا يحفظكم جميعا ان شاء الله

[propagaanda]

جزاكم الله خيرا على السؤال و ربنا يحفظكم و يعافيكم

بس بصراحة انا كنت شريك فى الخطأ لانى كنت بجرى

وربنا يحفظكم جميعا ان شاء الله

ربنا يحميك و يسترها معانا ان شاء الله

بس انا عندي ملاحظة : في بعض الناس مش بتهتم بالفوم و شاسيه الاكصدام و تتهتم بالفبرة بس
خلي بالك الاتنين دول اهم من الشكل الخارجي عشان حماية الشاسية و حمايتك
الفانوس الديبو محترم جدا جدا معايا لو مزنقة هاته و انت مطمن
الرفرف لو هاتجيبه استيراد هاته فابريكة
وشكرا

[احمد ابراهيم]

اخر الاخبار

رفرف حاجة اسمها خلع تامين 150 جنية
فانوس 200
اكصدام فيبر استيراد 250

بس الراجل سالنى سؤال غريب اوى
قالى انت الفانوس بتاعك من اللى فيه عدسه و لا من غير عدسه
هى اللانوس بتاعه بره الفوانيس بتاعتها بتنزل فيها عدسات ؟؟؟؟؟؟!!!!!!!