عملت اختبار كبس للمكنه والنتايج خوفتني

[smalltoto10]

السلام عليكم

عربيتي نوبيرا 2 2001 ماشية 90 الف كيلو

مبدأيا انا عربيتي مش بتاكل زيت نهائي .. السحب كويس .. العربية جبت بيها 180 .. ومفيش اى دخنه خالص

روحت لمركز صيانة اتاكد من ان الرشاشات بايزه عشان بشتكي من سحب البنزين 130 فى الصفيحة

لقيته قلي مبدائا الرشاشات ديه بتسيل ع 4 ونص وعاوزه تتغير

قلتله عندك اختبار كبس للمكنه قلي اة

راح قاس والنتايج كالأتي
150-100-160-80

قلي كدا عندك صبابين وحشين وصبابي كويسن وهنفتح بقا ف شنابر وصبابات و عمره

انا خدت العربية ومشيت وجالي أكتئاب

ازاي ده المكنه معايا كويسة جدا ومش حاسس باي حاجه من الكلام الى فوق ومفيش اى اعراض ويقولي عمره

انا كل الى عنده اكلان بنزين من الرشاشات

دلوقتي ايه الحل واللهي مبقاش ليا نفس حتى اغير الرشاشات

ممكن اى عنوان بنزينة كويسة او مركز خدمه محترم اعمل عنده كبس ويكون فى القاهره

عشان يمكن تكون القرايات غلط مع انه خدها مرتين

[elpasha1]

بنزينة شل فى شارع الهرم بجوار الخزان

[smalltoto10]

طيب ممكن وصفة الطريق بالظبط من الدائري

وهل يا ترى بيفتحوا يوم الجمعه بعد الصلاة كدا عشان يكون الطريق رايق

وايه رأي حضرتك ف الكلام الى انا كاتبه ده ؟

[elpasha1]

بص ياباشا طالما العربية زى الفل معاك وصوت الموتور مش عالى ومفيش دخان ومبتكلش زيت وسحب العربية كويس
يبقى فكك من الكلام دا كله
فى اختبار بسيط علشان تعرف الموتور خفيف ولا لأ ودا كنت اول مرة اشوفة لما كنت ببيع عربيتى من اسبوعين
دور العربية وروح شموار قصير واول ما توصل افتح غطا الزيت والعربية دايرة وشوف نسبة البخرة لو كتير بمعنى ان تصاعد البخرة وصل الى الكابوت يبقى خفيف
اما لوطلعت شوية بخرة خفيفة او مطلعتش خالص يبقى الموتور مفيهوش حاجة
وعلشان موضوع الرشاشات اللى مسيلة احسب استهلاك البنزين وانت تتاكد
ولو عاوز تعرف مكان البنزينة قول لى انت جاى منين علشان اعرف ادلك

[fosfos010]

بنزينة شل فى شارع الهرم بجوار الخزان

انا جربت البنزينة دى ودفعت 150 جنيها وبقشيش كمان وكلة على الفاضى وكلمهم غلط وفى فنى خلالى لمبة الشيك تنور معرفش كمان يخليها تطفى وانا كنت بقيس كبس بس ورفعت العربية بالمرة وقالى كشف عام 150 جنيها

[smalltoto10]

مشوار قليل يعني حوالي 5 كيلو كدا مثلا بعد ما العربية تسخن صح ؟

انا جاي من طريق اسكندرية الزراعي وهطلع الدائري من جمب غبور

[elpasha1]

طيب بس يا باشا مشوار تانى بس لحد التوكيل
توكيل فيرست كار فى كفر طهرمس فيصل ناس محترمة جدا
علشان نقطع الشك باليقين وتوكيل ولية مصداقية وهيتكلف حوالى 150 جنية وبردة كشفشامل على العربية (من اوكرة الباب لحد قلب الموتور)
علشان الاخ fosfos شكك فى البنزينة
حضرتك هتنزل نزلة صفط اللبن من على الدائرى وتسأل عن طريق كفر طهرمس واول ما توصل الطريق تسأل على (توكيل فرست كار اللى عند عربيات المساكن )وهو معروف جدا
ولو عاوز تروح البنزينة برضة توصل لشارع فيصل وتاخذ اتجاة الجيزة الى محطة المساحة وتاخذ يمين من امام الملف الى شارع الهرم هتلاقى البنزينة بعد حوالى 80 م

[smalltoto10]

ماشي متشكر ليك جدا

انا كدا كدا كنت هروح مركز تاني اكبس عنده المكنه

بس انا حبيت اعرف رأيكم عن التفاوت الرهيب ف القياسات ديه مع مكنه بتجيب 180 مسترح ولا دخنه ولا صوت تخبيط ورزع ولا خشونه ولا نقص زيت ولا اى كلام من الكلام ده .. والميكانيكي الى بتابع عنده بيأكدلي ان الموتور كويس جدا وقلي هتغير رشاشات و بوجيهات وسلوك وهتحس بفرق بالسحب ع السرعات العالية ودوسة البنزين هيبقا ليها حساب و البنزين هيبقا معاك كويس ع ضمانتي .. شكلي هتابع معاه

ما هو لو السحب تمام ومفيش اى اعراض والبنزين استهلاكه كويس بعد ما اغير الرشاشات والعربية بتجيب سرعه عالية

يبقا ازاي الموتور خفيف .. امال لو مش خفيف العربية هتطير من ع الأرض ههههههه

[elpasha1]

تلاقى الراجل التانى كان عاوز يعمل شغل ولا حاجة
علشان كدة قلت لك فى الاول (فكك من الكلام دا)

[aliyosef]

باشا دى نصبايه عربيتك زى الفل طالما مفيش دخنه بيضاء ولا أكل زيت اعمل زى مأقللك الميكانيكى رشاشات وبيجوهات والسلك وانت ادرى بعربيتك من اجدع بنزينه

[MMamdouh]

متزعلش نفسك قبل ما تعيد اختبار الكبس تانى فى حتة تانية و تتاكد من النتيجة... اصل النتيجة الاولى دى فيها تفاوت كبير جدا و لو دة صح المفروض المكنة دى تبقى بتعانى من ضعف و نقص قدرة و برجلة و حاجات كتير

MMamdouh

[smalltoto10]

عملت اختبار كبس ف حته تانية

والنتايج 90 % 80% 70% - مقاسش بستم واحد عشان كان البوجيه مربوط جامد قلي الجهاز مش هيربط كويس عشان القلاوظ مبقاش مظبوط ومش خيقيس كويس

النتيجة العامة حوالي 80%

والراجل قلي المكنه بتاعتك زي الفل ومتخليش حد يضحك عليك ويقولك فيها حاجه

ونضفلي الرشاشات القديمه بتاعت النوبيرا بتاعتي بـ wd 40 ومسحهم كويس وركبهم وشال بتوع البي ام .. قلي بتوع البي ام هياكلوا بنزين معاك والمكنه مش هتبقا مظبوطه ع سرعه .. وفعلا ده الي كان حاصل

وركبت بوجيهات ngk 1 شمعة .. وكشفت بالكمبيوتر وقلي العربية زي الفل الحساسات والرشاشات تمام دلوقتي

مون 92 وخلص التنك خالص وشوف هتعمل كام كيلو .. وكرر التجربة مع الـ 90 وخلص التنك وشوف هتعمل كام كيلو

وشوف فرق الأداء واختار الى انت عاوزه

وقفلت و مشيت بالعربية وحسيت بقيمة دواسة البنزين الى كنت عمال ادوس علي نصها ف المشي العادي و عليها كلها ف الجري البسيط .. دلوقتي تريحة رجلي بس بتطير العربية الحمد لله

هجرب بقا الاستهلاك وهتابع معاكوا

هو قلي كمان ان العربية هتحتاج غطا تاكيهات و جوان وش سلندر نظافة ليك .. وعندي نقص مياه احتمال احتمال يكون من الطبب بردة ( كل 200 كيلو نص لتر ) .. هبقا اروح واشوف موضوع المياه والتاكيهات ده

[MMamdouh]

يبقى بستم نمرة واحد طلع قرايتة وحشة فى الاختبار الاول لان الكبس هرب من القلاووظ

MMamdouh

[tarek_2005]

ملحوظة :
الموتور الخفيف بيجري اكثر من المتور السليم
بس مع حرق زيت واستهلاك غبي في البنزين
وطبعاً دخنة بيضاء مائلة للزرقان

[Seifmando]

ملحوظة :
الموتور الخفيف بيجري اكثر من المتور السليم
بس مع حرق زيت واستهلاك غبي في البنزين
وطبعاً دخنة بيضاء مائلة للزرقان

ممكن تشرحلنا ازاي