أفيدوني عن الماتيز

[nossa1980]

أولا أشكر أكرم وحازم وأحمد علي الأراء والاهتمام , وشرفتم موضوعي .

ثانيا , العربيات دي فعلا حلوة وأنا قرأت رانج الأسعار ده علي السايتات المختصة ببيع السيارات المستعملة , بس أنا كنت عايزة أراء تدلني علي الصح لأن طبعا إللي بيعرض عربية مابيقولش عيوبها إيه , وهو ده فايد المنتدي , أشكركم يا جماعه مرة تانية .

ثالثا , أنا رأيي رايح للكيا برايد أو الشاهين , حاسه إن ديه أحسن عربيات في الرانج بتاعي.

[MMamdouh]

الكيا قطع غيارها غالية بالنسبة للدايو و ثباتها مش قد كدة لكن حجمها مناسب ليكى خصوصا انك حتتعلمى عليها و غالبا مش حتجرى على سرعات و الكلام دة فا موضوع الثبات مش حيبقى مشكلة بالنسبالك

الشاهين ارخص قطع غيار لكن العربية كبيرة و يمكن اطول من اللانوس كمان... تكييفها مش قد كدة لو فيها تكييف و مش كل الشاهين فيها باور و قعدتها مش مريحة

اللادا حتخليكى تكرهى اليوم اللى فكرتى فيه تسوقى عربيات اصلا... تقيلة و مش مريحة اكتر من الشاهين... بس حمالة اسيه و قطع غيارها رخيصة

الماتيز صغيرة و استهلاك بنزين فى القليل... هى مقرفة فى التصليح لان موتورها مزنوق بس طبعا انتى مش حتشتغلى فيها بايدك... انا عمرى ما فكرت اسال على توافر قطع غيار الماتيز بس معتقدش ان فيها مشكلة

اللانوس تجمع كل المميزات السابقة و مفيهاش اى من العيوب السابقة... شوفى لانوس 99 بحالة نضيفة تعملها 42 او 43

MMamdouh

[adidas_vip2]

كدة محمد ممدوح جاب الكلام المفيد وطالما انتى بتفكرى فى اللادا والشاهين ودول اصلا حجمهم اكبر من اللانوس والسعر متقارب طيب يبقى اكيد انسب بديل ليكى هو اللانوس ودة فيها كذا ميزة بالنسبالك وهى اولا سواقتها سهله جدا للمبتدئين وعلى فكرة انا اتعلمت عليها وكمان فيها ميزة تانية واكيد كلنا محتاجنها وهى توافر عامل الامان بشكل اكبر من الشاهين واللادا ودة اكيد كلنا محتاجينة حتى لو مش بنجرى بالعربية ...اما لو انتى مصممة على الحجم الصغير فا يبقى هناك اختيارين مناسبين وهما الكورسا والابيزا او البولو.. واحنا قولنالك الكلام دة وعلى تجربة وليكى انتى الاختيار...وبالتوفيق ان شاء الله

[nossa1980]

ممدوح وadidas شكرا علي المشاركة المفيدة , اللانوس فعلا جميلة بس أنا أول مرة أعرف انها كويسة في التعليم عليها , علي العموم أنا سعيدة بكل المشاركات الكريمة وأرائكم كلها أفادتني بجد مش مجاملة , علي الأقل حصرت مجال البحث في كام نوع ,
ربنا يكرمكم ويوفقكم جميعا .

[mohamed ibiza]

انا رأيي من رأي احمد سامي العربيات اللي قالها ممتازة و لو عجبتك الابيزا 94 و فكرتي تجيبيها انا هعمل موضوع بعد 7200 كيلو تقريبا في قسم سيات هيكون فيه خلاصة تجربة 400 الف كيلو او 15 سنة مع الابيزا هيكون فيه كل حاجة عن الابيزا اسعار القطع مكانها اللي موجود و مش موجود مشكالها مميزاتها عيوبها مرجع كامل للابيزا 94 بس اول ما تقفل 400 الف كيلو لاني هسمي الموضوع احتفالية ال 400 الف كيلو و لو عجبتك و عايزة تسألي علي حاجة انا تحت امرك:)

[nossa1980]

شكرا يا محمد , أنا أسفه علي التأخير في الرد بس بجد كان في ظروف منعتني , وأنا في إنتظار موضوعك وألف شكر