تجربتي في تنظيف تكييف اللانوس

[fmesiha]

اولاً احب اني اشكر كل الناس اللي فهموني و ساعدوني بالشرح و الصور علشان اعمل الموضوع ده

اللي خلاني افكر اعمل الموضوع ده بعد ما شوفته على المنتدي هو اني كنت بشم ريحة مش حلوة كل ما اشغل التكييف و ده كان بيدايقني جدا خصوصا اني عندي حساسية فمش بقدر استخدم المعطرات
في البداية مرضتش افك الكرسي و اشتغلت على كده بس بعد كده فكيته لاني لقيت الموضوع صعب

1- بدات الاول فكيت المروحة و دي مربوطة بـ 3 مسامير فكهم سهل بالمفك و شيلت السوكيت بتاع الكهرباء بتاعها و خرطوم اظن انه لتبريد موتور المروحة
و دي الصورة بعد فك المروحة

2- فكيت الدرج علشان اسهل على نفسي و اشوف المسامير فين و ده فكه سهل هما مسمارين تحته من عند المفصلات و هيطلع في ايدك
و دي صورة بعد فك الدرج و المكان بقى واضح اكتر

3- فكيت الفبرة اللي عند الباب اليمين و الفبرة اللي فوق الكمبيوتر و رفعت الموكيت و طبقة الفوم اللي تحتيه بس لقيت الفوم تعبان قوي و بيتبهدل بسرعة فياريت لو حد يعرف منين اقدر اغير الفوم ده او اعمل ايه علشان عزل الحرارة يرجع كويس تاني يبقى كتر خيره
و دي صورة الفوم و هو للاسف متبهدل

4- اصعب حاجه هي فك العلبة اللي تحت و دي ممسوكة بـ 13 مسمار و اغلبهم في اماكن صعبة قوي و افضل حاجه ان يكون معاك عدة كويسة
اكتر حاجة ريحتني مفك والدي اداهوني من العدة بتاعته مرن بيتني و ركبت عليه لقمة 8 و اشتغلت فك
و دي صورة المفك ... طبعا دي من النت بس هو هو اللي عندي

صراحة الموضوع قتلني صعب قوي و متعب جدا فلو معاك حد هتبقى افضل كتير للاسف انا اشتغلت لوحدي
فكيت كمان سوكيت بتاع ما اظن انه ثيرموستات التكييف و دي صورته

5- في مسمارين رابطين العلبة من الجنب اليمين في جزء حديد ماسك في جسم العربية و دول هيتفكوا عن طريق انك تفتح الباب اليمين و تفك الفبرة اللي في الجنب و توصلهم

6- فكيت الكمبيوتر و ده اتنين سوكيت و هيطلع عادي و فكيت القاعده بتاعته علشان اوسع لنفسي

7- نزلت بعد كده العلبة و دي لوحدها مشكلة لان المكان ضيق جدا
لقيتها مليانه بلاوي لان كان في ورق شجر و طين مع الميه اللي نازله من التكييف هي اللي عامله الريحة دي. قعدت اغسل فيها و نشفتها و ركنتها على جنب

8- بعد كده احترت انضف السربنتينه بتاعت التكييف بايه و خصوصا اني ملقتش السائل بتاع التنضيف. رحت جايب البخاخة و حطيت فيها ميه مع شوية مسحوق غسيل عادي و نضفتها بيه و بعد كده بميه لوحدها

غسلتها من اثار مسحوق الغسيل و نشفتها بالبلاور

9- رجعت ركبت علبة التكييف تاني و طلعت عيني اكتر ما جيت انزلها بس الحمد لله رجبت في الاخر و ربطت المسامير تاني بس في 2 معرفتش اركبهم و صراحة كنت تعبت قلت يركبوا في وقت تاني

10- رجعت كل حاجه تاني زي ما فكيتها و ركبت الكمبيوتر و عملت ايدل ليرن و طلعت اجرب. اهم حاجه ان الريحة بقت تمام .... في الاول كانت ريحة مسحوق الغسيل موجوده بس بعد شوية راحت خالص
و بالنسبة لقوة التكييف مش حاسس انها فرقت كتير بس انا اساسا مكونتش بشتكي منه كمان مكنش في حاجات سادة السربنتينه.

الغطاء اللي بيحدد التكييف هيجيب هواء من بره ولا جوه مش عارف اقفله كويس حاولت بافيز زي ما هو باين في الصورة

و منفعش و حاولت باني لزقته بشريط لزق كانت النتيجة ان بعد كام يوم فك اللزق و الشريط نزل يخبط في المروحة و طلع صوت مزعج رحت شايله خالص و انا دلوقت عاوزها مقفولة على طول و مش عارف اعمل ايه
بفكر الزقها بسيليكون بس مكسل افك المروحة تاني فلو حد عنده فكرة يبقى حلو قوي.

[tarek_2005]

اولاً الف مبروك
ثانياً هناك بعض الملاحظات
1 - المسامير لقمة 7 مم وليس 8 مم
2 - دا مش ثرموستات التكيف دي مقاومات سرعات بلاور التكييف
3 - مصورتش السربنتينة ليه علشان كنا شوفناها بالمرة
4 - كان لازم تعلم مكان المسامير علي الفبرة من تحت علشان تحدد مكان المسامير بعد ركوب الفبرة

[tarek_2005]

موضوع قفل بوابة دخول الهواء من الخارج الافضل تشتري طقم السلوك بتاعت التكيف الاصلي ودول ب 50 جم وتركبهم وتغلقها من المفتاح الاصلي بتاعها

[mahmoudysf]

الف مبروك
على الشغل العالي ده

[fmesiha]

اولاً الف مبروك
ثانياً هناك بعض الملاحظات
1 - المسامير لقمة 7 مم وليس 8 مم
2 - دا مش ثرموستات التكيف دي مقاومات سرعات بلاور التكييف
3 - مصورتش السربنتينة ليه علشان كنا شوفناها بالمرة
4 - كان لازم تعلم مكان المسامير علي الفبرة من تحت علشان تحدد مكان المسامير بعد ركوب الفبرة

1- بالنسبة لموضوع لقمة 7 فده صحيح بس انا افتكرت ان مفيش حاجه اسمها 7 فقولت يبقى اكيد اللي مكتوب على اللقمة غلط و هي 8

2- شكرا على المعلومة انا صراحة معرفتش فقولت تخميني

3- انا في الوقت ده كنت بموت و كلي عرق مفكرتش اني اصور حاجه كان كل همي اني اخلص

4- دي فعلا غلطة انا وقعت فيها علشان كده طلعت عيني و انا بدور عليهم و بحاول اركبهم

بس دي اول مره ليا و على قد ما عرفت عملت ... كمان المشكلة ان الموضوع اللي كان مكتوب قبل كده مكنش فيه تفاصيل فانا كنت برتجل
و شكرا على التوضيح

[tarek_2005]

انا مش قصدي غير التوضيح فقط ودا لا يقلل ابداً من المجهود الجبار الذي قمت به يكفي انك صورة العملية بالكامل ورفعت الصور انا بس اوضحت هذه الملاحظات علشان لو عضو اخر فكر يعمل الشغل ده يكون الموضوع كامل امامه

[fmesiha]

يا استاذ tarek_2005 انا فعلا بشكر حضرتك على توضيح الامور ليا انا لاني فعلا مكونتش اعرف موضوع المقومات بتاعت سرعة البلاور و لا ان في لقمة 7 اساسا
انا مليش خبرة في الامور دي انا مبرمج مليش في الميكانيكا و السيارات غير من المعلومات اللي بتعلمها من حضرتك و باقي الناس في المنتدى

هو انا بس ليا سؤال بالنسبة لاسلاك البوابة دي بيبقوا اتنين ولا واحد لان عندي واحد راكب و سليم بس هو بيفتح بس مش بيقفلها تاني.
كمان هو فين الثرموستات بتاعت التكييف ولا اللانوس مفيهاش ثيرموستات و بتفضل شغالة على طول و ده اللي حاصل عندي انه مش بيفصل.

[MMamdouh]

انا ناوى ان شاء الله اعمل القصة دى فى عربيتى... انا كنت نويت اعملها فى العيد بس للاسف نمت العيد كلة

MMamdouh

[tarek_2005]

يا استاذ tarek_2005 انا فعلا بشكر حضرتك على توضيح الامور ليا انا لاني فعلا مكونتش اعرف موضوع المقومات بتاعت سرعة البلاور و لا ان في لقمة 7 اساسا
انا مليش خبرة في الامور دي انا مبرمج مليش في الميكانيكا و السيارات غير من المعلومات اللي بتعلمها من حضرتك و باقي الناس في المنتدى

هو انا بس ليا سؤال بالنسبة لاسلاك البوابة دي بيبقوا اتنين ولا واحد لان عندي واحد راكب و سليم بس هو بيفتح بس مش بيقفلها تاني.
كمان هو فين الثرموستات بتاعت التكييف ولا اللانوس مفيهاش ثيرموستات و بتفضل شغالة على طول و ده اللي حاصل عندي انه مش بيفصل.

اللانوس ليس بها ثرموستات وبتشتغل علاطولللللللللل
اسلاك البوابة واحد ولما يفتح ومايقفلش يبقي الواير مقطوع من ناحية المفاتيح بتاعة التكيف

انا ناوى ان شاء الله اعمل القصة دى فى عربيتى... انا كنت نويت اعملها فى العيد بس للاسف نمت العيد كلة

mmamdouh

حدد الزمان والمكان وانا جاهز وهنصورها خطوة خطوة ونحسبها بالاستوب وتش لاني عملتها في عربية ميدو في ساعتين وعايز احطم الرقم القياسي

[popahly]

ساعتيييييييين ؟؟؟؟؟؟؟ هههههههههههه ربنا يديك الصحة يا هندسة دانا قعد من 3 العصر لـ 7 مساءً وحمدت ربنا على أنهم 4 ساعات بس مزادوش.... عموماً ربنا يباركلك على معلوماتك اللى زودتنا بيها فى موضوع السربنتينة دا..

[MMamdouh]

حدد الزمان والمكان وانا جاهز وهنصورها خطوة خطوة ونحسبها بالاستوب وتش لاني عملتها في عربية ميدو في ساعتين وعايز احطم الرقم القياسي

انا بفكر اضرب الخميس اجازة و اعملها الصبح فى الرحاب

MMamdouh

[osra26]

وايرات التكييف عددهم 3 وانصح بشراء التلاتة وتغييرهم مرة واحدة لان الكلبسات هاتلاقيها تعبانة
انا لسة مغيرهم امبارح بنفسى فى اللانوس بتاعتى والبوابات بقى تمام

[ahmed_mido1889]

حدد الزمان والمكان وانا جاهز وهنصورها خطوة خطوة ونحسبها بالاستوب وتش لاني عملتها في عربية ميدو في ساعتين وعايز احطم الرقم القياسي

الوقت الفعلي للشغل كان ساعه

الساعه التانيه علي بال ما العربيه نشفت

والصور عند مايلو بس مش راضي يجيبها لسه

[biomedo]

والصور عند مايلو بس مش راضي يجيبها لسه

ليه كده يا مايلو

[mailo]

ليه كده يا مايلو

الصور على الموبيل
ولازم انقلها على اللابتوب بلوتوث يبا لازم اللي فالبيت مش بتاع الشغل وأنا أصلا باقعد شغال 10 ساعات قدام الكمبيوتر فببقى تعبت غير إن أنا مبروحش أصلا
وكمان أنا مبعرفش ارفع صور على المنتدى لازم أعمل registration في سيت كده ومكسل بصراحة
شفت الموضوع معقد إزاي

هو بقى قابلني حوالي 3000599 مرة بعدها ولا مرة فيهم اخد مني الصور
تبقى دي غلطتي ؟