نويت - ان شاء الله - اجيب شيفروليه لانوس زيرو

[alaafahmy]

السلام عليكم ورحمة الله وبركاته
انا كان معايا جولف 2 وبعتها وبقالى سنه بركب مواصلات وطول الفتره دى بفكر فى عربيه زيرو عشان تعبت من المستعمل بس تكون مناسبه لظروفى وبقالى كام يوم كده ربنا الهمنى بالشيفروليه اللانوس بس عندى طلب من اهل الخبره .. محتاج رد على الاسأله دى بعد أذنكم
وطبعا لو حد عنده نصيحه لوجه الله هكون شاكر ليه مقدما :)

- ايه الفرق بين 2011 و 2012 ؟
ايه الفرق بين Full option اللى هيا (LS) واللى نازله بباور+تكييف+كاسيت اللى هيا (L) ؟
- هل العربيه دى فيها عيب شائع زى عيب صناعه او ماشابه ؟
- ايه احسن طريقه اقسط العربيه دى (فى القاهره) بصراحه مش عايز اتعامل مع بنك عشان حرام وبياخدوا فايده كبيره

وشكرا على مساعدتكم الكريمه

[medododo]

مش هقدر افيدك
بس لو نازل من جولف شوف اللوجان

[mailo]

الفروق بين ال fo و ho مش الكتير بس كلها للراحة
يعني إزاز كهربة
الدركسيون بيتحرك وحزام الأمان كمان
الاريال كهربة وفي 2012 تقريبا بقى فالإزاز مش خارجي
عازل مبطن الكبوت من جوه
egr
مراية كهربة
الإزاز و 2012 ملون
الشماسه بتاعت اللي جنب السواق فيها مراية
وسنتر لوك
ال فريم الاسود بتاع التابلوه لونه سيلفر

بس كده تقريبا مش حاجات جامدة قوي
بس فرق برده
يعني حركة الدركسيون وال إزاز الكهربة والمراية كفاية قوي عندي

[Ahmed Nasser]

ضيف كمان علبة البيئة

[MaZaGAngeE]

ايه ال egr ?

[mailo]

ضيف كمان علبة البيئة

فاتتني دي
وكمان فيه حلية فالشكمان

[alaafahmy]

الله كل ده بألفين جندى طب والله كويس

[alaafahmy]

يارجاله محدش رد على اخر سؤالين بتوع عيوب الصناعه واحسن طريقه للتقسيط (الحلال)

[tarek_2005]

عيوب الصناعة او بالاخص عيوب التصميم (( ضعف نظام الفرامل ))

2011 و 2012 فارقة زجاج خلفي حراري
بجانب الي ذكره الاخوة الافاضل

التقسيط الحلال هوا القرض الحسن ودا غير متوفر في مصر اما الباقي الله اعلم

[alaafahmy]

ألف شكر ياباشا وشكرا للمحترمين اللى ردوا كلهم وفى انتظار مشاركات اخرى لو حد حابب يعلق على اى حاجه

[hpxp]

والدي سائل علي موضوع القسط قبل ما بشتري العربيه
الشيخ قله حلال
لسبب انه بيادي خدمه تقسبط مبلغ يعني مش بيسلفك فلوس ويخدها بزياده (ربا) فبالتالي انت بتسد بس واحده واحده وهو خد خدمه تقسيط
لو انا غلطان حد يصححلي

[alaafahmy]

حضرتك تقصد تقسيط البنك (قرض السياره) يعنى ولا التقسيط مع المعرض داريكت ؟

[mailo]

فيه علماء اباحوا تقسيط السيارات عشان الزيادة بتبقى مقابل خدمة
بس فيه ناس اختلفوا فالكلام ده كتير قوي

[crayvor]

أولا لو مستعمل خليك ف اللانوس وش.. لأن ماحدش حايبيعلك لوجان ماكملتش معاه سنتين الا لو عامل بيها عاملة.. أما لو زيرو أنا شايف حرام تجيب حاجة بتتصنع من عام 97 ماغيروش فيها مسمار (اللهم الا الفانوس الخلفي ف 2001 بعد ما جاجوار كسبت قضية ضدهم) حتلاقي نفسك كمان سنتين تلاتة ماشي بحاجة تعتبر حجرية مقارنة بأي زيرو تاني (احساس وحش خصوصا انك جايب زيرو عشان يريحك).. اللوجان عيوبها عن اللانوس ان اللانوس شكلها ألطف شوية والباور فيها أخف وقطع غيار أرخص.. غير كدة اللوجان تكسب في كل حاجة حتي قدرة الموتور.. وحتي التوكيل بشهادة الكل رينو توكيل محترم جدا لأقصي حد حاتحس فعلا انك بني آدم علي عكس منصور حمبوله اللي خلاني أساسا خلعت منه وباصين دلوقتي برة.

برضه فكر كدة ودور ع النت براحتك.. ماتعملش زي اللي كانو بيشترو الشاهين ف 2006 و 2007

فيه علماء اباحوا تقسيط السيارات عشان الزيادة بتبقى مقابل خدمة
بس فيه ناس اختلفوا فالكلام ده كتير قوي

أنا شايف ان جميع أنواع التقسيط مافيهاش ربا.. ومكاسب البنوك كمان بالمرة.. السبب واضح.
أولا: أنا كابنك مش باجبر حد يتعامل معايا.
ثانيا: من جميع مواقف الربا كان الربا لاستغلال الظروف ودي عكس كدة خالص.. بدليل انه يقدر مثلا يشتري حاجة أقل بس فضل التقسيط في مقابل رفاهية أعلي.. ودا كدة تحول الموضوع من ربا الي تقديم خدمة بيعامله بيها البنك زي ما بيعامل أي حد تاني.. يعني مثلا البنك مايعرفش ان دا ظروفه صعبة فا يعلي عليه الفايدة ولكن الموضوع اتفاك مرضي بين الطرفين مافيش منه ضغط من جهة علي التانية.
ثالثا: كلا الطرفين حققو مكسب.. أنا كابنك كسبت من ورا التقسيط ليك وانت كاعميل كسبت سرعة الحصول علي رفاهيتك بدل ما كنت حاتستني لغاية ما تحوش المبلغ.

[ahmedezzat78]

ايه ال egr ?

EGR valve= Exhaust valve recirculation valve

يعنى صمام تدوير العادم و ده دوره انه ياخد جزء من غازات العادم يدخلها على مانفولد السحب و بالتالى يدخل غرف الحريق و ده بيقلل درجه الحراره داخل غرف الحريق و بالتالى يمنع تكون أكاسيد النيتروجين الضاره بالبيئه و اللى بتتكون على درجات حراره عاليه

الفالف ده فى الانوس شغال بالفاكيوم أو خلخله الهواء و فى عربيت تانيه شغال بالكهرباء