مشكلة فى المارش

[Mido_Vip]

السلام عليكم ورحمة الله وبركاته

اوقات لما اجي ادور العربية بسمع صوت تكه ومش بسع صوت المارش والعربية مبتدورش بس لو زقتها بتدور رحت للكهربائى قالى ده عيب فى اتوماتيك المارش فكه وعمله صيانة واشتغل تمام وبعد فتره رجع لنفس الحكية مره تدور ومره لاء رحت لواحد كهربائى تانى وقالى ده عيب الاوتوماتيك قالى جيب واحد تانى رحت جبت واحد تانى واشتغل وبعديها بأسبوع رجع لنفس الحكاية ولو فضلت اقفل وافتح فى الكونتاكت بيشتغل عادي

ياريت حد يقولى اعمل ايه ؟؟

[XGoGoX]

والله الموضوع ده حصل معايا إمبارح
كل ماجي أطفي العربيه
تحلف متشتغلش تاني
بس أنا كانت البطاريه عندي وصله من الوصلتين مملحه أخر 3 حاجات
حطيت عليها ميه سخنه وبالظبط خمس دقايق إشتغلت

رحت مشواري ورجعت طفيتها وأجي أدور
نفس الموضوع مش راضيه تدور
هزيت الوصلتين وشغلت إشتغلت

ياريت أضم المشكله دي لمشكلت حضرتك وحد من أصحاب الخبره في الموضوع ده
يطمنوني ويطمنو الأخ إن شاء الله

[Mido_Vip]

انا برضه عندى الوصله السالب للبطارية مملحة بس حاجه بسيطة

بس تفتكر هو ده العيب ؟ مع ان كل حاجه شغالة عادي جدا

ياريت حد يقولنا العيب فين بالظبط

[XGoGoX]

مهو ممكن يكون المشكله من الملح
ومحتاج يتفك الوصلتين وينضفو نضافه تمام
علشان ممكن قوي يكون الملح موجود في حتت مش بيوصلها الميه
ومش بتوصل الكهربه بالشكل السليم ومحتاجه تتفك وتتنضف صح

مع العلم إن العربيه مش بتبطل وهي ماشيه أو واقفه أبدا
هي بس مجرد ما أطفيها وأرجع أشغل تاني مش بتشتغل
الموضوع ده حصل معايا مرتين بس لحد دلوقت

[Mido_Vip]

لو هتيجى على نظافة الوصلات ديه امرها سهل ان شاء الله
بكره الصبح هنزل انظفهم واجرب

وعلى فكره انا برضه العربية مش بتبطل لو دارت
المشكلة بس لما ابطلها انا واجي ادورها تانى

ويارب حد يرد علينا ويقولنا العيب ممكن يكون ايه

[XGoGoX]

أنا إفتكرت حاجه بخصوص الموضوع ده
أفتكر من سنه الموضوع ده حصل معايا
بس وقتها كنت راكن العربيه أكتر من شهرين
ولما جيت أمشي بيها عملت نفس الموضوع ده
ولما نضفت الوصلات من الملح
المشكله دي مرجعتش تاني خالص
بس وديتها لكهربائي فك البطاريه والوصلات وإداها نضافه تمام بـ 5 جندي بس

جرب كده ياصاحبي وخلي كهربائي ينضف الوصلات والبطاريه
ويارب تكون المشكله من هنا وماتكونش مارش أو موبينه أو أي حاجه تانيه إن شاء الله

[Mido_Vip]

بكره ان شاء الله هنظفها وهجرب
المشكله ممكن اجي ادورها القيها دارت عادي وممكن متدورش
ولو دارت مش عارف كده العيب هيكون اتصلح ولا لاء
وربنا يستر وتطلع حاجه بسيطة الحكاية مش ناقصة تكلفة

[Ahmed Nasser]

نظف قواتيش البطارية بالصنفرة وسلك مواعين كويس جداا
وبعدين شوف النتيجة اية
لان نفس المشكلة كانت بتحصل فى عربية تمبرا

[tarek_2005]

اكشف علي بطاريتك عند واحد بتاع بطاريات كويس

[Mido_Vip]

مفتكرش انها بطارية علشان كل حاجه فى العربية شغالة عادي جدا

وساعات العربية بتبقى دايرة عادي واجي انا ابطلها وادورها تانى تظهر المشكلة

[tarek_2005]

اكشف علي البطارية لان ساعة الدوارة بتحتاج الامبير العالي اما باقي الاستهلاك لا يتعدي ربع الامبير المتاح من البطارية

[Mido_Vip]

شكرا على رد حضرتك
ان شاء الله هروح اكشف على البطارية وهبقى ابلغ حضرتك
والنهاردة انا نظفت القواطيش وهشوف ايه الى هيحصل

[Mahmoud.Fathy]

متابع باهتمام شديد

[E_medo77]

انا كان عندى نفس المشكله لكن لما غيرت الاوتوماتيك بتاع المارش اتظبطت وراىى الشخصى انه عيب وصلات وقواطيش اكيييد لان البطاريه لو فيها ربع هاتعتل فى الدوارة ومرة تدور ومرة لأ المهم هاتسمع صوت المارش بيدور لكن التكه دى من غير المارش معناها اوتوماتيك او قواطيش

[Mido_Vip]

انا كان عندى نفس المشكله لكن لما غيرت الاوتوماتيك بتاع المارش اتظبطت وراىى الشخصى انه عيب وصلات وقواطيش اكيييد لان البطاريه لو فيها ربع هاتعتل فى الدوارة ومرة تدور ومرة لأ المهم هاتسمع صوت المارش بيدور لكن التكه دى من غير المارش معناها اوتوماتيك او قواطيش

شكرا على رد حضرتك

اتوماتيك المارش لسه مغيره
ورحت كشفت على البطارية لقتها حالتها كويسة والحمد لله
بس بتاع البطاريات قالى لو عملت معاك كده تانى غير القواطيش