بعد عمل فحص، مطلوب تغيير بعض الأشياء

[mabdelrahim]

السلام عليكم

النهاردة عملت فحص في بنزينة شل اللي جنب نادي السكة و الريبورت طلع ان حالة الموتور 74 و ان في بعض الأشياء يجب تغييرها و هي كالآتي ( العربية دايو لانوس موديل 1999)

1) أويل سيل كرنك خلفي
2) جوان كارتيرة الموتور
3) قاعدة جير بوكس
4) تيل فرامل أمامي

و بصراحة أخوكو ميح في العربيات و حاجاتها فكنت عايز أعرف اسعار الحاجات دي دلوقتي كام و أجيبهم منين بس يكون حد نظيف و موثوق فيه و مصنعية تركيبها تقريبا كام و عند مين برضه و يكون نظيف و موثوق فيه

و ألف شكر مقدما

[tarek_2005]

عليك وعلي ابو الحسن في بين السريات للمشتروات ومحمد عبده للصيانة ولو منطقة الهرم بعيدة عليك انتظر حد من الزملاء يقولك علي حد قريب منك

[mabdelrahim]

عليك وعلي ابو الحسن في بين السريات للمشتروات ومحمد عبده للصيانة ولو منطقة الهرم بعيدة عليك انتظر حد من الزملاء يقولك علي حد قريب منك

الف شكر يا طارق باشا ... انا ساكن في حدائق المعادي ، هو المكان مش مهم ... المهم ان الناس تكون امينة في شغلها و اخد منها الحاجة زي الفل ... فلو ممكن عناوينهم بالظبط و نمرة التليفون لو أمكن و أكون شاكر جدا

[tarek_2005]

في في اهم موضوعات القسم عنوان وتليفون كل من محمد السيد ومحمد عبدوا ودول يعتبروا قريبين من بعض ومعظم اعضاء منتدي الدايوا بيتعملوا معاه وانا شخصياً برتاح لمحمد السيد ومش برتاح لعبدوا

[zocor742]

مبروك ياباشا الفحص وعقبال الصيانة
حاجات سهلة ان شاء الله بس جيب اويسلات اصلى او نظيقة
كان ليا استفسار
كبس المكنة 74 دة يعتبر كويس ولا متوسط اصل انا كنت كابس المكنة فى الصيف وكان حوالى 81 او 82 تقريبا
المفروض المكنة الجديدة كبسها كام

[mabdelrahim]

بصراحة يا بوب مش عارف ... هو على حسب ما الراجل قاللي ان ده كويس و خصوصا إن في زميلي كان بيكشف معايا على عربيته هيونداي اكسنت 2005 و حالة موتوره 71 ، ياريت حد من اساتذة اللانوس هنا في المنتدى زي استاذ طارق أو استاذ محمد ممدوح يقولنا يعني ايه النسبة دي و بتتحسب ازاي

[mabdelrahim]

بعد البحث لقيت بشمهندس محمد ممدوح شارح كفاءة الموتور في رد على موضوع ... و ده اللينك

http://www.nilemotors.net/Nile/13004-a.html

[mabdelrahim]

السلام عليكم
أنا نزلت امبارح اشتريت الحاجات المطلوبة من أبو الحسن و عملوا كلهم 210 ... و بإذن الله بكرة أروح لمحمد عبده على وصف أخونا الاستاذ طارق و أركبها ... و لو قدرت بإذن الله أصورلكم الأجزاء و أرفعها هنا للإستفادة

[mailo]

فيه ميكانيكي في صقر قريش المعادي اسمه الشيخ تقريبا
ورشة كبيرة قوي وناس كتير قوي بتشكر فيه "محلات وصنايعية تانيين"
لو عايز تجربه اوصفلك مكانه

[mabdelrahim]

أوكي يا باشا نعرفه برضه ... بس اعتقد اني سمعت عنه .. مش ده اللي عند الجامع بتاع صقر قريش ؟؟

[mabdelrahim]

السلام عليكم

استكمالا للموضوع انا رحت يوم الجمعة لمحمد عبده و هناك إسلام اللي شغال معاه بصلي على العربية و لكن واضح ان بتوع بنزينة شل دول كانوا مابيشوفوش كويس او يا إما مش شايفين شغلهم صح ....

نبدأ نقول ان من الحاجات اللي البنزينة قالولي عايزة تتغير كان جوان كارتيرة الموتور ، و لما رحت لمحمد عبده قالولي ان اصلا اللانوس مالهوش جوان كارتيرة ... :019f3b~14:
ثانيا إسلام لاحظ تسريبات زيت من كذا حتة و كانوا
1) جوان غطا التاكيهات
2) اويل سيل الموبينة
3) اويل سيل كرنك أمامي
و انا استغربت ان حاجات ظاهرة زي دي ماشافوهاش في البنزينة :019f3b~14:
حاجة كمان اني لاقيت طابات المية في الموتور فيها بارومة ، و عشان تتغير لازم يحل فرن الشكمان و يحل الموتور من ورا ... ده غير شوية تسريبات مية من كوعة الامونية و طلمبة المية كانت البارومة واكلها من جوا و متهربدة على الآخر

(واضح ان اللي انا شاري منه العربية كان مرات ابوه اسمها لانوس)

بالنسبة لبوابة الإنجيكشن كان عليها طبقة كده من الوساخة (سوري في اللفظ) عملت زي ماتكون طبقة كاوتش

بالنسبة للسيور ، سير التكييف و الدينامو كان مقطمين و سير الكاتينة كان بدأ يضعف

بالنسبة للجزء بتاع الفتيس بقى انا ماحضرتش لما حله لاني بيتها عندها و رحت خدتها السبت ، بس هو غير فيه القاعدة و اويل سيل كرنك خلفي مع حاجة اسمها جوان عقربة و بلية دبرياج و حاجات تانية ... للاسف ماحضرتش الحوار ده بس إن شاء الله بالليل ححاول اكتب بالظبط ايه الحاجات اللي اتغيرت لاني نسيت الفواتير عنده

و بعد ماخلص غسل الرادياتير و حط مية خضرا بدل مية الحنفية اللي كنت بستخدمها ... و مافتكرش ان البارومة و الحاجات اللي اتاكلت دي كانت مني أنا بس لاني لسه شاريها مافيش كام شهر و الحاجات دي شكلها حاصله من بدري ... بس ربنا يهديه بقى اللي كشفلي عليها و قالي مافيش حاجة

و بعدين طلع معايا محمد عبده بنفسه و جربناها على الطريق و فضل يكبس فرامل كذا مرة عشان التيل يطبع - بشد الباء .

و زي ما وعدتكم إن شاء الله بالليل أو بكرة بالكتير حاحط اسماء الأجزاء اللي اتغيرت

بس بصراحة يا جماعة الناس هناك بسم الله ماشاء الله عليها ايديها تتلف في حرير و الراجل وجب معايا صح علشان قلتله ان الناس هنا بتشكر فيه اوي

في الآخر الحوار ده عمل معايا بالظبط

قطع غيار 1400 جنيه
مصنعية و إكراميات 400 جنيه

[tarek_2005]

هوا ده محمد عبده اي شيئ اقل من 60% غير علاطول

[MMamdouh]

هوا ده محمد عبده اي شيئ اقل من 60% غير علاطول

و هو دة الصح

MMamdouh

[mabdelrahim]

هوا ده محمد عبده اي شيئ اقل من 60% غير علاطول

بصراحة يا طارق باشا الحاجة الوحيدة اللي كانت اقل من 60 % كانت سير الكاتينة على ما أفتكر ... الباقي بقى أظن انه أقل من 30% ، و بصراحة أنا حسيت الناس هناك امينة معايا جدا ... بصراحة أشكرك على انك عرفتني عليه

و هو دة الصح

mmamdouh

بشمهندس محمد ازاي حضرتك ، واضح ان الناس هناك متخذينك أخ ليهم و بيشكروا فيك كتير و بصراحة كان نفسي أقابل حضرتك هناك ... انا اتفقت مع محمد عبده إن شاء الله أني لما أجمع فلوس تاني كمان شهرين تلاتة أروحله يعمللي تعديل الفرامل اللي حضرتك كتبت عنه قبل كده. و كان ليا سؤال بعد اذنك ، كان عبده قال ان فيه تعديل بيعمله في الموتور و انا مافهمتوش ، حاجة زي مايكون بيشيل وش فوق كده 8 و يحط واحد 16 بيخلي الموتور زي 1600 ممكن تشرحلي الموضوع ده هندسيا لأني بصراحة مش فاهم ازاي

و كمان هل الحوار ده ممكن يأثر تأثير يبوظ حاجة بعد كده ولا لأ ؟

[mailo]

هو كده هيزود الصبابات مثلا ؟!!
إيه الكلام ده يا ممدوح
لو كده يبقى مش هيخليه 1600 هو بس ممكن تأثر على التسارع شويتين

ممكن تقابل ممدوح الخميس اللي بعد الجاي فالمقابلة الشهرية