العربيه دارت وبطلت ومكنتش عايزه تدور

[shaddadfalcon1]

من شويه وانا لسه جي من الشغل جيت ادور العربيه دارت وهوب مفيش ثانيتين وقامت مقطعه ومبطه
ادور تاني مفيش فايده كانها بتلقط وتدور وفيه صوت تحتيل بس مش من البطاريه

المهم قلت شكلها هتعملها معايا لحد مالامن يتاع الشركه خد باله وجه ورفعت الكبوت وفضلت اضعط علي البوجيهات والسلوك والخراطيم اللي رايحه وطالعه من فلتر البنزين وبعدين دورت قامت دايره بس زي ماتكون متلته او متبرجله فضلت ادوس بنزين وفضلت دقيقه كده وبعدين اتعدلت

ياتري ايه السبب؟؟؟ انا بقالي فتره بس مش كتيير قوي يعني يجي سنه كده مثلا مغيرتش الفلاتر والبوجيهات
هل ده السبب ولا ايه؟ انا خايف تعملها معايا تاني ولا انا مسافر ولا العربيهه كانت سقعانه ولا ايه؟

[ahmed_mido1889]

البوجيهات ممكن تكون جابت اخرها انت عملت كام الف في السنه دي

[shaddadfalcon1]

البوجيهات وفلتر الهواء عاملين حوالي 20 الف كيلو او اكتر حتي الأن
فلتر البنزين عامل اقل من كده

[MMamdouh]

البوجيهات دى ماتت من زمان

MMamdouh

[shaddadfalcon1]

طيب في القاهره لو حبيت الغير البوجيهات عند اي ميكانيكي وفي واحد جنبي في الحي التامن وفي فرع صيانه الموضوع يتكلف كام عشان كنت بعمله ببلاش عند الميكانيكي بتاعي

والبوجيهات ال ngk بتعمل كام دلوقتي هي وفلتر البنزين ؟

[ahmed_mido1889]

البوجيهات الngk في التوكيل بتاعها ب50 جنيه الواحد شمعه

الفلتر مش فاكر كام بالظبط

[tarek_2005]

فلتر البنزين الاصلي ب 40جم

[shaddadfalcon1]

طيب المصنعيه كام.؟
وينفع امشي بيها كده كمان اسبوع وارجع بيهال الأسكندريه ؟ ولا خطر
علما بناها دارت كويس الصبح

[memofree]

يا سيدى الموضوع بشلن اشترى مفتاح بوجيهات انتا و غيرهم بنفسك الموضوع موش مستاهل حد انا بغيرهم بنفسى من ساعت ما جيبت العربية

[biomedo]

انا كنت خايف اغيرهم بنفسي و اما جربت لقيت الموضوع سهل
هاتلك مفك بوجيهات و فيللر "علشان تقيس الخلوص" و دووس

[shaddadfalcon1]

انا اشتريت البوجيهات والبارح واحد صاحبي كان معاه المفتاح وغيرنا اتنين وجينا عند التالت كنت بفكه بس اتغبيت علي المفتاح فااتكسر وهي دلوقتي ماشيه باتين جداد واتنين قدام بس العربيه صوتها واطي قوي لدرجة اني مش بحس انها دايره

بس هل ده مشكله لحد اما اجيب واحد او اوديها للميكانيكي النهارده اغير الاتنين اللي فاضلين؟

وايه الفيللر ده؟ صاحبي كانب بيحط السلاح بتاع سكينه كده في البوجيه الحته اللي بطلع الشرراه وجاب سيرة الفيلر بس مفهمتش السبب

وكمان لما كنا بنخلع بوجيه من مكانه كان بيقولي دور وكنت بدور لمدة ثانيه ولا اتين عشان تنظف -- هل ده صح برده ولا غلط؟

[mailo]

البوجيهات اللي خرجت كان شكلها عامل إزاي وآخر مرة غيرت سلوك البوجيهات كانت امتى ؟

ليه هتوديها الميكانيكي ماتجيب مفتاح تاني وتكمل شغل

[biomedo]

وايه الفيللر ده؟ صاحبي كانب بيحط السلاح بتاع سكينه كده في البوجيه الحته اللي بطلع الشرراه وجاب سيرة الفيلر بس مفهمتش السبب

زي ما انت قولت بالضبط هوا عباره عن اداه عباره عن مجموعه من المساطر (او زي ما انت قولت سلاح سكين" كل واحده ليها سمك معين لو جيت تحطها في البوجيه بين القطبين " في البوجيه الحته اللي بطلع الشرراه" تضمن ان البعد بين القطبين هوا نفسه السمك بتاع المسطره و اللي مكتوب في مانيوال العربيه للبوجيهات الواحد شمعه العاديه اما لو كنت بتستخدم اي بوجيه اكتر من واحد شمعه او بلاتنيون فانت مش محتاج الكلام دا كله

وكمان لما كنا بنخلع بوجيه من مكانه كان بيقولي دور وكنت بدور لمدة ثانيه ولا اتين عشان تنظف -- هل ده صح برده ولا غلط؟

في ناس بتعمل كدا علشان تطرد الوساخه من الفرن "ممكن حبة تراب تقع جوا وانت بتركب البوجيه وانت مش واخد بالك" قبل ما تركب الجديد

[shaddadfalcon1]

البوجيهات اللي خرجت كان شكلها عامل إزاي وآخر مرة غيرت سلوك البوجيهات كانت امتى ؟

ليه هتوديها الميكانيكي ماتجيب مفتاح تاني وتكمل شغل

البوجيهات كان طين خالص واسوووووووووود
وبعد ماغيرت اتنين بس العربيه بقي صوتها واطي جدا لدرجة في السلانسيه بحس انها مبطله

[mailo]

طب خلاص كده هات مفتاح تاني وكمل شغل ولو مغيرتش السلك من مدة غيره بالمرة

بس إزاي البوجهات كانت طالعة طين بعد 20000 بس ؟؟!!!!!!!!!!!!!!!