علبة البيئة بالفحم ولا بدون

[knightmido]

من فضلكو كان فيه صوت غريب فىالعربية وصنايعى الشكمانات قال ان المشكلة فى العلبة الامامية .. سالت عند ابو الحسن لقت علبة البيئة بالفحم ب 750 والعادية "بدون فحم" ب 250 والاتنين مصرى صناعة ابواليزيد يا ريت حد يفيدنى اشترى انهى علبة وايه الفرق فى الاداء والعمر وصوت العربية وشكرا

[ahmed.zahra]

على حد علمي ان اللي من غير فحم دي بيبقى صوتها أعلى شوية و بتخلي سحب العربية أحسن لكن مضرة للبيئة

[هيثم]

بدون فحم
السحب افضل

[tarek_2005]

روح لابو اليزيد هيركبهالك كمان وعنده منها ثلاث انواع
والافضل الي بالفحم علشان الصوت والبيئة علشان هتكره صوت العربية لو انتا متعود علي الهدوء

[محمد الشامي]

علبه البيئه الاصليه بيكون فيها فحم لامتصاص بعض الانبعاثات الضاره , ودي بتخلي صوت العربيه هادي شويه و سحب العربيه مش 100% , يعني بتكون مخنوقه شويه

العلبه الفاضيه اللي حضرتك بتقول عليها دي بيسموها علبه رنانه , وهي بس شكلها زي علبه البيئه لكن بلا وظيفه حيويه , ولو ركبتها بيكون صوت العربيه اعلى حاجه بسيطه من لما بتكون مركب علبه البيئه الحقيقيه وكمان السحب بيزيد , ولكن على حساب تلوث البيئه :)

انا عن نفسي لغيت علبه البيئه من سنه ونص تقريبا , وحتى ماركبتش علبه رنانه , وركبت وصله من الموتور وفيها سوسته رايحه لغايه العلبه الوسطى مباشرة
وطبعا السحب اصبح افضل بشكل ملحوظ , وصوت العربيه زاد بنسبة 5% مثلا

وبخلاف كل ما سبق :-
نصيحه لوجه الله اعمل شغل الشكمان في ابو اليزيد (المصنع) او اي مركز خدمه , لان بتوع الشكمانات مش مضمونين في الحاجات دي , خاصه وان علبه البيئه الاصليه كانت عند ابو اليزيد من سنه ونص ب 800 جنيه على ما اتذكر , ويمكن اكتر كمان
وحضرتك بتقول ان بتاع الشكمانات قالك ب 750 جنيه :) يعني هو بيرخص سعرها عن الشركه المصنعه كمان

[محمد الشامي]

https://www.nilemotors.net/Nile/178045-a.html

[knightmido]

انا متشكر جدا لحضراتكم وارائكم انا فعلا ركبت العلبة من غير الفحم "ابو اليزيد" والنتيجة فى الحقيقة صوت العربية زاد بطريقة بسيطة للغاية ولكن السحب الجيد غطاعلى المشكلة دى فعلا اتحسن جدا وتكلفة العلبة الفاضية 250 جنيه

[محمد الشامي]

مبروك عليك يا باشا :)

[tarek_2005]

مبروك علي الاصلاح وتدوبها ف ي شوارع مصرنا الحبيبة هههههههههههه

[hosar]

الف مبروك يا كبير

[kimoo2002]

الف مبروك يا باشا على فكرة العلبة بتاعت ابو اليزيد عندنا فطنطا كنت سائل عليها من شهرين كانت ب 185 جنية والراجل دة بيبيع مش بيركب وقالى خد بدلها علبة بتاعت الفيات 131 ب 45 جنية والله سمعت كلامة ورحت ركتبتها وماشية معايا الحمد لله تمام من يومها

[محمد الشامي]

الف مبروك يا باشا على فكرة العلبة بتاعت ابو اليزيد عندنا فطنطا كنت سائل عليها من شهرين كانت ب 185 جنية والراجل دة بيبيع مش بيركب وقالى خد بدلها علبة بتاعت الفيات 131 ب 45 جنية والله سمعت كلامة ورحت ركتبتها وماشية معايا الحمد لله تمام من يومها

نصيحه يا باشا بلاش تركب حاجه عربيه قديمه على عربيه جديده :) سواء شكمان او غيره
لان القديم نظام والجديد نظام تاني خالص