سؤال عن جوان غطاء التاكيهات

[mohamedhamdy82]

سؤالى بخصوص تسريب زيت خفيف جدا بيظهر تحت الغطاء الفيبر بتاع الماكينه فى الجنب اليمين ولكنه لا يؤثر فى مستوى الزيت يعنى الزيت مش بينقص عندى ولما سألت قالوا ان جوان غطا التاكيهات هو السبب فهل الكلام ده صحيح ؟
سألت عن سعر الجوان لقيته ب 90 جنيه ..
عايز اعرف دلوقت هل اغيره ولا ممكن اسيبه طالما الزيت مش بينقص ؟
وتغييره ده يعتبر حاجه كبيره كأنها نص عمره يعنى ولا دى حاجه عادى ؟
وممكن يتكلف كام ؟
وهل ده اساسا يعتبر عيب خطير فى العربيه ولا حاجه عادى ؟
وهل فى الحاله دى تبقى المكنه خفيفه ولا الكلمه دى مقصود بيها حاجه تانيه ؟
العربيه نوبيرا عامله 75 الف كيلو

[ahmedaliaeg]

اولا الموضوع لو جوان غطاء التكيهات موضوع سهل جدا ميختش 10 دقائق
تانى حاجه سعر الجوان اقل من كده وهوه مش عيب ولا حاجه
وملهاش علاقه بخفيه المكنه فى بعض الاعضاء بيغيرو الجوان بنفسهم

[blazer]

سعره 50 او 60 جنيه اصلى
وحط سليكون حرارى من نوع جيد وانت بتركبه
ودا سهل جدا يتعمل فى ربع ساعه
انا آخر مره غيرته بنفسى

[attaa11]

سعره 50 او 60 جنيه اصلى
وحط سليكون حرارى من نوع جيد وانت بتركبه
ودا سهل جدا يتعمل فى ربع ساعه
انا آخر مره غيرته بنفسى

ياريت لو ترفع لنا صور عن طريقة تغييره ولو بمعلومات بسيطه .. مش لازم انك تفك وتركب وكده
بس نعرف هنفك ايه وهنربط ايه .. ولك الاجر والثواب ان شاء الرحمن

[lanos2004]

الجوان كورى من 35 الى 50 الاصلى 100 جنيه ممكن تجيب الكورى ومعاه انبوبه سليكون حرارى بعشرة جنيه وحد عندة ضمير وانساه تماما انا لسه مغيرة بسبب رشح الزيت

[blazer]

بإذن الله هنزل بس اصور كام صوره للتوضيح وهعمل موضوع فى أقرب فرصه بإذن الله

[mohamedhamdy82]

شكرا للأعضاء اللى جاوبوا على سؤالى .. والله الواحد فى المنتدى هنا بيحس انه مش لوحده ودايما بيلاقى المشوره من الأعضاء.
سعر الجوان ده فى التوكيل كده ب 90 جنيه اصلى بعمل كل الصيانات فى التوكيل من يوم ما اشتريت العربيه من 4 سنين .
شكرا

[mohamedhamdy82]

النهارده غيرت الجوان فى التوكيل .. لقيت سعره 60 جنيه مش 90 زى ماكنت فاكر
تغييره أخد تلت ساعه طبعا شامله الفك والتركيب والتنظيف مكان الزيت القديم
العمليه سهله جدا
وكمان عملت الصيانه الدوريه .. زيت xhp وفلتر زيت وغيرت تيل فرامل وتربيط العفشه وصلحوا صوت كان عندى فى العفشه من ورا كان بيظهر مع الملفات وقالوا ان ده صوت بلي العجله الخلفيه .. قالوا هنعملها رجلاش ونشوف وفعلا الصوت اختفى .. وغيرت لمبه شبوره ولمبه فى الفانوس الامامى كانوا محروقين
واخدوا مصنعيه 120 جنيه
تيل الفرامل ب 160 جنيه
اجمالى التكاليف 560 جنيه

[memofree]

ياراجل الموضوع مكنش محتاج التزكيل مهائيا انا بغيره كان كل سنه تقريبا و اخر مره غيرت بالجوان التخيين و الحمد لله ما بتجيبش زيت خلاص داخله على سنتين
اولا سعره 5 جنيه جوان الرفيع
و 10 السميك
و من غير سيليكون حرارى كمان تفك و تركب و تربط المسامير من جوه لبره عن طريق x

و السلام عليكم