الحقونى : غيرت لزيت فالفولين و بعدها لمبة الزيت نورت

[ahmedjumpo]

زى ماهو باين فى عنوان الموضوع
غيرت من يومين لزيت فالفولين max life بعد ما كنت بأستخدم زيت شيل الأصفر
و لكن بالأمس لمبة الزيت رعشت و نورت و طفت و النهاردة كنت عند الميكانيكى بيبص على حاجات و كان بيجرب الموتور و قالى صوت السبيكة اخشن عن الأول و قلتله انى لسه مغير الزيت فبدأنا نشك فيه
فدلوقتى انا عايز اعرف هل ممكن تكون المشكلة من الزيت لان موضوع لمبة الزيت ده عمره ما حصل من ساعة ما اشتريت العربية
و الميكانيكى خوفنى و قلى مع الوقت هنعوز نفتح الموتور و مش عارف اعمل ايه
هل اغير الزيت و اشوف و لا أعمل ايه
حد يدلنى الله يباركلكم فالقلق بدأ يتملكنى

[tarek_2005]

يفضل تغير الزيت والفلتر من واحد موثوق به

[ahmedjumpo]

الزيت اللى مغيرهولى شركة فالفولين نفسها عن طريق خدمة التغيير بتاعتهم و الفلتر برده جديد و جايبه من الخواجة اللى فى البحر الاعظم

[Shiref_mohamed]

موتورك عامل كام كيلو متر ؟؟
بتصين في مواعيدك ولا مهمل في الصيانة ؟؟

[Shiref_mohamed]

يفضل تغير الزيت والفلتر من واحد موثوق به

هتخلى الراجل يغرم تمن زيت وفلتر تاني ليه ياطارق ؟؟
المفروض طالما الزيت مقاسه مظبوط يكون العيب في الفلتر ممكن يكون مكتوم
او يكون الموتور اصلاً مرزع وجايب طقم سبيكة .
يبقى الصح انه يبداُ الأول بتغيير الفلتر على نفس الزيت ويظبط مستواه ويجرب لو الدنيا ظبطت يبقى تمام ..

[ahmedjumpo]

موتورك عامل كام كيلو متر ؟؟
بتصين في مواعيدك ولا مهمل في الصيانة ؟؟

الموتور عامل 190 ألف كم و علشان كده جبت max life
و الصيانات و السيور و الفلاتر مصينها فى ميعادها
و الحركة ديه أول مرة تحصلى بعد ما غيرت الزيت و الفلتر من يومين
هل ممكن مثلا يكون الفلتر لانى لما اشتريته من الخواجة كان ب 15 جنيه و بصراحة ساعتها قلقت
و لا الزيت مش مناسب لعربيتى
بصراحة انا قلقان فعلا لان الميكانيكى كمان بدأ يشككنى فى السبيكة و مش عارف اعمل ايه

[a7mous]

انا كنت بفكر فى فالفولين max life طمنى

[S O P H O S]

بصراحة سعر الفلتر قليل الي حدا ما

[kimo-nubira]

انا حاطط فالولين ماكس لايف بقالي حوالي 4 شهور وبصراحه محصلش عندي حاجه من ديه نهائي

[ahmedjumpo]

انا كنت بفكر فى فالفولين max life طمنى

يا باشا انا اللى عايز اللى يطمنى
بص حضرتك انا لسه مش عارف ايه السبب فممكن يكون الفلتر و ممكن يكون الزيت و ربنا يستر و مايكونش الموتور
و ممكن تكون مشكلة الزيت مع ماتورى بس و زى ما قال الاستاذ كيمو انه بيستخدمه و مافيش مشاكل
فامتقيس على حالتى لانى مش عارف السبب لسه و مش عايز اظلم الزيت
و ربنا يستر

[ma7amadk]

مممم
أنا مش عايز أفتي بس المفروض إنك إنت أدرى بصوت عربيتك وحافظها صم
مش معقولة الميكانيكي هيبقى حافظ صوت عربية كل زبون عنده
طب ما تشوف ساعة الزيت يمكن عايزه تتغير عشان حصلت معايا من يومين واللمبة قعدت ترعش مرة واحدة
وشكيت بسبب طريقة السواقة وان العربية ما استحملتش وقلت جابت طرمبة زيت
عملت موضوع هنا وأستاذ طارق قال ساعة الزيت وطلعت هي فعلا
وبمناسبة الصوت أنا كنت بستخدم موبيل وغيرت لليكوي مولي
وما حستش بفرق صوت بعد ما غيرته غير بعديها باسبوع
كانت تقريبا 500كيلو وصوت الموتور بقى أهدى شوية
فيمكن عشان العربية مش متعودة على الزيت أخدت وقت
مش عارف
بس ده اللي حصل معايا
وفالفولين ده نوع محترم برضو وما افتكرش العيب منه

[wga64]

الفلتر بنسبة كبيرة ممكن يكون هو المتسبب فى المشكلة

[Eng.Geo]

انا حاطت نفس الزيت بتاعك وحتي الان كويس
عشان تعرف اللي عندك بالظبط
لو صوت العربية زي ما هو يبقي ساعة الزيت باظت وده سهلة جدا
لو الصوت أختلف يبقي في كذا حاجة
ممكن طلمبة زيت ... أكشف عليها
الزيت مستواه قليل جدا .... سهل تعرفها
فلتر الزيت نفسه يكون مش كويس
أكيد الزيت لزوجته كويسة ... ماهو مش حاطين عند ناس زيت وعن ناس تانية بيبسي :)
حاول تشخص العيب الأول صح
ربنا معاك

[ahmedjumpo]

الفلتر بنسبة كبيرة ممكن يكون هو المتسبب فى المشكلة

ما هو أنا بفكر فى كده بس اللى مصبرنى ان الحركة ديه ماحصلتش تانى من ساعتها فمش عارف

[ahmedjumpo]

انا حاطت نفس الزيت بتاعك وحتي الان كويس
عشان تعرف اللي عندك بالظبط
لو صوت العربية زي ما هو يبقي ساعة الزيت باظت وده سهلة جدا
لو الصوت أختلف يبقي في كذا حاجة
ممكن طلمبة زيت ... أكشف عليها
الزيت مستواه قليل جدا .... سهل تعرفها
فلتر الزيت نفسه يكون مش كويس
أكيد الزيت لزوجته كويسة ... ماهو مش حاطين عند ناس زيت وعن ناس تانية بيبسي :)
حاول تشخص العيب الأول صح
ربنا معاك

انا حاسس ان صوت العربية زى ما هو كل اللى عندى صوت الكستبانات بسيط و ده من زمان و ماكانش فيه مشاكل
و النهاردة قرصت عليها شوية و مافيش أى حاجة حصلت
طلمبة الزيت أعتقد انها كويسة و كنت قريت ان ممكن عمل تشيك عليها من فتحة التزويد
و مستوى الزيت ثابت على ال max
و الفلتر مش عارف و طبعا مش عايز اظلم الزيت
و من ساعة ماحصلت رعشة لمبة الزيت ماحصلتش تانى
فى النهاية شكرا لحضرتك يا هندسة