الرخصة وقعت ورا التابلو

[Car's Sniper]

النهاردة كنت عند واحد صاحبى وكنت مفضى كل حاجة فى جيبى على الكرسى بتاعى ..المهم صاحبى راح شايل الرخصة والبطاقة والمفاتيح وحاططهم عالتابلو من ناحية الازاز !!!! طبعا الرخصة وقعت ورا بين التابلو والازاز :(
حاولت اوصلها مش عارف

فدلوقتى الافضل انى افك التابلو عند صنايعى ولا اروح بكرا اعمل رخصة تانية افضل
لانى خايف افك التابلو مايركبش زى ماكان او الصنايعى يبوظلى حاجة كالعادة (عمرى ماصلحت العربية برا التوكيل الا لما الصنايعى يبوظلى حاجة تانية)

الموضوع دا خانقنى ..كل شوية اروح اطلع بدل فاقد

[srm]

اكيد تفك التابلوه طبعا وتجيب الرخصه

وكل حاجه بترجع زى الاول واحسن....

[ahmed_toto]

السلام عليكم ورحمة الله وبركاته\ اسهل من فك التابلوا مفيش

[mshmshm3]

طيب سؤال يطرح نفسه لو رحت طلعت بدل فاقد و بيعت العربية ما ممكن اللي هاتبيعله العربية لاي سبب من الاسباب يفك الطابلوه فكه احسن
ده انا نفسي افك الطابلوه و اركبه من جديد

[MOK3336]

يا عم فك التبلوه و خلاص

[alu]

فك التبلوه احسن

[Car's Sniper]

انا اللى قتلتـــه ..انا اللى قتلتــــــه
براحة عليا وبشوييش ههههههههه :)

لو جيتوا الشرقيه هاتعرفوا انا قصدى ايه

اخر حاجة عملتها كانت بلية الدبرياج والديسك والصنايعى ضيعلى حساس السرعة والكبوت مبقاش بيقفل كويس وتقريبا مشكلة الفتيس بدأت ترجع تانى
اللى قبله كنت رايح اصلح طلمبة البنزين وغيرتها بالفعل ومن بعدها الكنبة بقت بتزن واللى يغيظكوا ان المشكلة ماطلعتش منها اساسا
اللى قبلها غيرت جلب المقصات عشان العربية كانت بتعوم على 140 واول ماغيرتها بقت بتعوم على 70 وفى النهاية طلع العيب من الكاوتشات
وخايف دلوقتى اروح افك التابلو يضيعلى حاجة فى المنطقة دى
فك التابلو هنا مش بالساهل يا اخونا ..هنا هانطبق اللى درسناه فى الصيدلة( نقارن بين ضرر الدوا وفوايده)
بس المشكلة ماعرفش ايه اللى ممكن يتضرر من فك التابلو
وانا واثق 100% ان فيه حاجة هاتبوظ بس ايه هى ..الله اعلم
بس هاتكل على الله ثم عليكم وهجازف :d
وانتظروا الموضوع الجديد قريبا اللى هسألكوا فيه عن حل المشكلة اللى هاتحصل بكرا ههههههه
ومتشكر جداااا على ردود حضراتكم..اللى خضتنى

[tarek_2005]

اكتفي بفك العدادات لو وقعت خلف العدادات ولو وقعت خلف الدرج فك الدرج فقط ولكن متطلعش التابلوه بالكامل

[Car's Sniper]

اكتفي بفك العدادات لو وقعت خلف العدادات ولو وقعت خلف الدرج فك الدرج فقط ولكن متطلعش التابلوه بالكامل

للاسف وقعت ورا التابلو خالص ولازم يتفك بالكامل وحاسس انها ممكن تكمل ورا العازل اللى تحت التابلو...

[tarek_2005]

طلع بدل فاقد وريح دماغك بس متقولش لح علي الموضوع ده الا لما تنتهي مدة الرخصة هههههههههه واحنا هنا هنكتم السر في بير ههههههه