لانساوى جديد

[alto_nx]

السلام عليكم ورحمه الله وبركاته

ازيكم يا شباب اخوكم بفضل الله . لسه مشترى دايو لانوس 2007 ومحتاج نصايحكم لانى جديد فى الكار

عايز النصائح الهامة للمحافظة على السيارة ياعنى امتى اغير زيت وايه الانواع الكويسه

- زيت المتور
- زيت البور
- المياه
- مياه المساحات

عايز نصايحكم اخواتى الاعزاء

وشكرا

[moaaz]

الف مبروك ..وربنا يديك خيرها و يكفيك شرها انشاء الله ...بس لازم تغير السيور مع الزيوت علشان تضمن ميحصل حاجة لا قدر الله .....اما عن المواعيد ف حضرتك تحاول تغير الزيوت و السيور ف اقرب وقت عشان انت مش ضامن اللى قبلك ...بالتوفيق

[S O P H O S]

الف مبروك يا باشا
وياريت تبتدي بتغير زيت المحرك ..
موفق

[alto_nx]

شكرا يا معاذ ، عايز اعرف الانواع بتاعت الزيت و السيور الكويسة

[alto_nx]

S o p h o s الله يبارك فيك يا عمنا (:

[M.Alaa92]

بالنسبة للسيور جيب charter gates ده انضف نووع و فية ال continental حلو بس بيعمل صووت .
و بيتغير كل 30-40 الف بس الاماان من 25-30

البوجيهات ngk 2 شمعة كل 10 الاف كابلات مرة و مرة او مرتين و مرة ( بالكتير)

الفلاتر gm ( زيت مرة اه و مرة لأ ) و بنزين و هواء ( انا عن نفسى كل 10 )
زيت الموتور كل وااحد برأى انا عن نفسى بستعمل فيسكو 3000 فى غيرى مقتنع ب شيل الاصفر .

زيت الباور فيسكو او موبيل ( معرفش اذا شيل عاملة زيت باور ولا لأ) و قولو يغيرو مش يزودوووو

بالنسبة للمية انت تكبس دورة تبريد و تغسلها و تحط مية خضرا iada . الكبس عشان تبقى ف الامااان

و تكشف على تيل الفراامل و جيب ال gm الاصلى ( اغلى بس بيعيش كتير و مش بيصفر ) و ممكن الجولد ( ارخص بس بيصفر ساعات) و زيت فراامل dot 4 و قولو يغيروو مش يزودووو

و اكشف ع زيت الفتيس و غيرو مش تزودووو

كدة ان شااء الله تركب العربية مرتاااح و متطمن ليها و فاايقة

ملحووظة : انا عارف انى الحاجات اللى مكتووبة كتير بس رخيصة مش غاالية هو بس اللى غالى التيل الاصلى و زيت الموتور و الفتيس . و ده اللى عملتو اما اشتريت عربيتى

[tarek_2005]

بلاش ngk 2 شمعه وخليك في الواحد شمعة

[mado83]

الف مبروك عليك وعلى فكره انا نفسى اغير للانوس علشان بس الدعم اللى هتلاقيه هنا فى المنتدى وخصوصا من الاستاذ محمد ممدوح
انتظر ردوده

[Mahmoud.Fathy]

الف مبروك عليك اللانوس وربنا يديك خيرها ويكفيك شرها .... ومبدئيا كده اعمل الاتي خلال النهاردة وبكرة بالكتير ومتروحش مشاوير كبيرة الا لما تظبط الحاجات دي

1- غير زيت الموتور فورا .... وأكشف على زيت الباور والباكم وانت فالبنزينة
2-غير فلتر الزيت وفلتر الهواء وفلتر البنزين
3-غير سير الكاتينة وسير الدينامو وسير التكييف وبلية شداد الكاتينة
4-غير البوجيهات (هات ngk شمعة واحدة التخينة مش الرفيعة ) وغير سلوك البوجيهات
5-اكشف على الاطارات

وبعد كده طير يا معلم

[alto_nx]

شكرا يا شاب انا غيرت الزيت وكان الزيت اللى فيها اسود طين و زوت زيت باكم بتاع الفرمال و الدبيرياج

و النهاردة بأذن الله هغير سير الكاتينة و هكشف على الفرامل

بس العربية تسخن ومؤشر الحرارة فى المنتصف !!

[Mahmoud.Fathy]

شكرا يا شاب انا غيرت الزيت وكان الزيت اللى فيها اسود طين و زوت زيت باكم بتاع الفرمال و الدبيرياج

و النهاردة بأذن الله هغير سير الكاتينة و هكشف على الفرامل

بس العربية تسخن ومؤشر الحرارة فى المنتصف !!

اكبس ورة التبريد شوف فيها تسريب ولا ولا .... وبعدين اغسلها كويس ... وبعدين حط ميه خضرا ... واتاكد ان المراوح شغالة ..... المفروض المؤشر يكون تحت النص بشرطة وميوصلش ابدا لنقطة المنتصف

[alto_nx]

يا جماعة صاحب العربية كان بيعمل الصيانة الدورية فى التوكيل

اكمل فى التوكيل ولا ايه ؟

[alto_nx]

وياجماعة ياريت حد يقولنا سير الكاتينة بكام و البلي بكام

ياعنى تكلفة تغيرة علشان اعمل حسابى

[MMamdouh]

ادخل على قسم اهم الموضوعات هتلاقى موضوعين يحلوا كل مشاكلك

الاول هو جدول الصيانة بتاع اللانوس... امشى عليه عشان تضمن ان العربية تفضل بحالة فنية ممتازة و متعطلش منك او تعمل اى حركات نص كم على الطريق

الموضوع التانى بيتكلم عن الاجرائات اللى لازم تعملها لما تشترى عربية مستعملة... الموضوع بيناقش القطع اللى المفروض تغيرها كاجراء وقائى عشان تضمن ان موتورك يعيش معاك و يديك احسن اداء

اعمل الكلام اللى فى الموضوعين مع شراء قطع الغيار الاصلية او اللى بينصح بيها الخبراء تضمن عمر طويل لعربيتك و اداء ممتاز طول الوقت و ربنا يبارك لك فيها

MMamdouh