الكبوت االامامى

[KarimAbulEla]

السلام عليكم و رحمة و الله

شاء الله ان المدام تعمل حادثة بالعربية و الحمدالله ان نتج عن الحادث تلفيات بالسيارة فقط

الكبوت الامامى تبهدل تماما مع خبطة بالسيارة من الامام


الان اريد تغيير الكبوت الامامى و السمكرى يقترح على ان يشترى لى هو الكبوت بسعر 500 جنيه بجانب 150 مصنعية التركيب و رد الخبطات الامامية و خلافه ، علما بانه قال لى ان الكبوت الذى سيحضره هو عن طريق شركات التامين و حالته سوف تكون ممتازة و بمشتملاته و مستخرج من سيارة اخرى مماثلة

و لما سالت ابو الحسن عن كبوت جديد قالى سعره 900 جنيه و للعم سوف يكون خالى من اى اكسسورات و لما سالت فى ش العشرين فى فيصل لدى تجار قطع الغيار الاستيراد قالى 1400 وواحد تانى قالى 800 و لما سألت محل قطع غيار جديد عن الكبوت قالى عنده و سعره 375 جنيه الصراحة فى حالة توهان و مش عارف اعمل ايه ، هل اعتمد على السمكرى و اخليه يجيبه و يركبه و لا اشتريه انا و اجيبه منين و هل فيه اصلى و غير اصلى


تحياتى

[Xpert]

بص يا سيدي ...قول ورايا .. الحمد لله انها جت في الحديد .. يغور الحديد ...
خلاص علي كده ..
بص بقي يا سيدي .. اول عيب تقع فيه .. انك تخلي الميكانيكي يجيب حاجه ...
اول حاجه .. انزل الحرفين شوفه استيراد بكام ..(اسال كذا واحد و خد رينج اسعار)
تاني حاجه تعملها بقي ... قول للسمكري .. وريني يا معلم الكبوت بتاعك ده شكله ازاي ..شكله ازاااي ؟ انت عاوزه اقرب الي الزيرو ..
مش عاوز كبوت بقي السمكري يكون فاكه و مسمكره و لازق القشره علي العضم بمعجون استيل ...
سوري يعني .. لو مش هاتفهم فيهم .. هاتله واحد استيراد يكون لون العربيه او لونه ابيض من عند مستورد مضمون ...
(افتح كبوت اي لانوس نضيفه عندك اتفرج علي الكبوت من جوه شكله ازاي .. لاحظ ان فيه (معجون) بين العضم و الصاج .. شوف المعجون ده عامل ازاي .. شوف حروف الكبوت عامل ازاي (الحرف) ...

[KarimAbulEla]

شكرا يا Xprt على النصيحة و ان شاء الله سوف اراعى جيدا ما قلته علما بانه كلام متلكف بصحيح

شكرا جزيلا

[Xpert]

يا باشا اني تايم و اتمني اني اكون ساعدت .. و لو كنت اقدر اجبهولك كمان كنت جبته يا باشا ;)

[MMamdouh]

الكبوت الاستيراد بمشتملاتة حيخش فى 1000 جنية... حراااااااااااااااااااااام

انا راءيى تجيب الكبوت التايوانى ب 375 و تخللى بتاع الدوكو يلزقلك الفلتو بتاعة و شكرا على كدة... الكبوت الاصلى عند موزع دايو اللى فى وسط البلد بحواى 800 جنية و دة برضة مبلغ كبير اوى اوى

MMamdouh

[Xpert]

لما الاصلي ب 800 .. ليه الاستيراد ب 1000 ؟ ايه يا عم الاسعار العجيبه دي ههههههههه

[MMamdouh]

عشان الاستيراد بيتباع بالبطانة و الشبكة

MMamdouh

[Xpert]

مش عارف بقي .. انت اللي عارف في الدايو ... قوله يعمل ايه ;)

[MMamdouh]

get the Taiwan made hood

MMamdouh

[KarimAbulEla]

شوف يا محمد باشا انا لفيت على شوية سمكرية و محلات قطع غيار و بعدين فى الاخر قولت اجرب سيد العجوز بعد ما لقيتك بتتعامل معاه و رحتله و هو اقترح على موضوع الكبوت بتاع التامين ده و بيقولى انه يضمنه و قالى شوفه و لو معجبكش مدفعتش تمنه و انا سوف احاول بحث المسألة ديه بقدر الامكان و ربنا يكرم - احتمال كبير اروحله بكرة الصبح اول ما يفتح - انا فى الشغل دولقتى و حخلص شغل الساعة 7 الصبح ، و اقضيها فى اى مكان بعد كدة و بعدين اعديى عليه و اشوف موضوع الكبوت ده / انا مكنتش متخيل ان الاسعار كانت حتبقى بالشكل ده -

ربنا يكرم الحال و الواحد يطلع من الموضوع ده بخسارة مؤقة فى الفلوس و بس و متبقاش خسارة دائمة فى السيارة .

تحياتى لكم جميعا

[Xpert]

المهم راجع علي الكبوت كويس زي ما قلتلك ;)

[KarimAbulEla]

تمام يا Xprt سوف اتاكد جيدا من هذا الموضوع وبعد ما نبهتنى للموضوع ده سوف افحصه جيدا من ناحية اللحام و الجوانب .

[Akram]

شوف يا كريم ,
انا كنت لسه عامل حادثة و السمكري قاللي نغير الكبوت و الإكصدام ,
و انا دورت عند بتوع الإستيراد في ش العشرين و رحت الحرفيين (مدينة السلام) و رحت وسك البلد و دورت كويس و النتيجة:
إن الإستيراد كامل باللباد بتاعه و الشبكة بيعمل أقل حاجة 1000ج و أقل من كده يبقى فيه شغل ,
و فيه جديد صيني و تايواني ,
الصيني بيعمل 350ج و التايواني بيعمل 525ج و ده من غير الفلتو و اللباد و الشبكة ,
انا جبت التايواني و هنقل اللباد من الكبوت القديم و الشبكة كمان ,

انا أول مرة أسمع عن كبوت من خلال شركات التأمين و لكن لو كان أصلي و كامل و حالتة سليمة و بـ 500ج يبقى أحسن من التايواني ,

بس دا من شركات التأمين يعني من عربيات عاملة حوادث و الله اعلم هل كان فيه شغل و الا لأ ,
يعني لازم السمكري اللي هيشتغل فيها يشوف الكبوت ده الأول قبل ما تدفع فلوس.

[KarimAbulEla]

شكرا يا اكرم على المعلومات ديه

انا رحت للسمكرى النهاردة الصبح و بصيت على الكبوت اللى عنده لقيت فيه شغل و معجبنيش
و رحت للحرفيين النهاردة لقيت الاستيراد كله من 850 الى 1200 جنيه و بعض منهم كان فيه بعض الردود و بعضهم سليم تماما
و مفيش لون السيارة بتاعتى للاسف حيث كنت اطمع فى ذلك

و لقيت الجديد تايوانى ب 550 ماركة Hood

انا غالبا مستريح للحل اللى انت عملته يا اكرم بشراء جديد تايوانى و نقل الشريط العازل اللى بيسموه فليتوه من القديم الى الجديد ، بس يا ترى تركيب كبوت جديد و استعدال بعض الردود فى مقدمة العربية يعنى مصنعية السمكرى مم تكلف قد ايه ، و هل الواحد يعمل كل حاجة فى الحرفيين احسن يعنى شراء و سمكرة و دوكو و لا الواحد يشترى من هناك و يرجع بعد كدة للناس اللى نعرفهم على نعمل عندهم السمكرة و الدوكو ؟؟

انا اول مرة اروح الحرفيين و بصراحة عجبانى جدا فكرة وجود كل شىء فى مكان واحد .

شكرا جزيلا

[Akram]

على ايه يا كريم باشا,,,
انا بفضل انك تعمل الشغل ده عند ناس متجربين سواء في الحرفيين أو في أي مكان ,
بس لازم تأخد في إعتبارك انك المفروض تروح للسمكري و هو شغال و بعد كده لبتاع الدوكو , و لو مشوار الحرفيين بعيد عليك يبقى ليه تعمل الشغل ده هناك ,

و كمان الكبوت ده موجود في التوفيقية بـ 525 و هو نفسه اللي في الحرفيين بـ 550 لأني شفت الاتنين ,
و موضوع الفلتو ده مش بيتنقل من القديم للجديد , لكن بيتعمل في الجديد و بيكلف من 30 الى 50ج ,
و مش فارقة قوي , أهميته لو هتبيع العربية بيبان ان الكبوت تم تغييره لأن الاصلي بيبقى فيه الفلتو ,
لكن لو الكبوت القديم فيه لباد و ده الكسوة الداخلية للكبوت يبقى ممكن تنقلها للجديد ,

ربنا يقويك و تخلصها على خير .